គិតមកដល់ពេលនេះ ជនបង្កគ្រោះថ្នាក់បើករថយន្តបុកមនុស្សស្លាប់ ៦នាក់ នៅស្រុកមោងឫស្សី មិនទាន់ចូលបំភ្លឺនោះទេ ខណៈឪពុកពុំដឹងថាកូនរបស់ខ្លួនគេចទៅឯណា
បាត់ដំបង៖ គិតមកដល់ព្រឹកថ្ងៃទី១ ខែមេសា ឆ្នាំ២០២៦នេះ ជនបង្កគ្រោះថ្នាក់បើករថយន្តបុក មនុស្ស ៦នាក់ស្លាប់ នៅស្រុកមោងឫស្សី មិនទាន់ចូលបំភ្លឺ នោះទេ ខណៈឪពុកពុំដឹងថាកូនរបស់ខ្លួនគេច ទៅឯណា។
ជនបង្ក ឈ្មោះ ស៊ីវ ជ័យសិដ្ឋ ដែលបើករថយន្តបុក មនុស្ស ៦នាក់ ស្លាប់(រួមទាំងទារកក្នុងផ្ទៃ) មិនទាន់ចូលទៅបំភ្លឺ តាមពេលវេលាកំហិត គឺនៅម៉ោង១០ ព្រឹកថ្ងៃទី១ ខែមេសា នៅស្នងការដ្ឋាននគរបាលខេត្តបាត់ដំបងឡើយ។ នេះបើតាមអ្នកនាំពាក្យស្នងការនគរបាលខេត្តបាត់ដំបង។
នៅក្នុងសេចក្តីប្រកាសព័ត៌មាននៅយប់ថ្ងៃទី៣១ ខែមីនា ស្នងការដ្ឋានគរបាលខេត្តបាត់ដំបង បានបញ្ជាក់ថា ឈ្មោះ ស៊ីវ ជ័យសិដ្ឋ គឺពិតជាអ្នកដែលបើករថយន្តបង្កគ្រោះថ្នាក់បណ្តាល ឱ្យមនុស្ស៦នាក់(បូករួមទាំងកូនក្នុងផ្ទៃ) ស្លាប់យ៉ាងអណោចអធម៌។ ក្រោយកើតហេតុ ជនបង្ក បានគេចខ្លួនបាត់គ្មានដំណឹង សូម្បីតែឪពុករបស់គេ ដែលជាស្នងការរងម្នាក់ នៃស្នងការដ្ឋាននគរបាលខេត្តបន្ទាយមានជ័យ ក៏ពុំដឹងថាកូនរបស់ខ្លួន គេច ទៅឯណានោះដែរ។
បើតាមស្នងការដ្ឋានគរបាលខេត្តបាត់ដំបង កាលពីថ្ងៃទី៣០មីនា ឪពុកជនបង្កគឺលោក ស៊ីវ សុជាតិ បានទៅបំភ្លឺនៅស្នងការដ្ឋាននគរបាលខេត្តបាត់ដំបង។
បើតាមការបំភ្លឺនោះ លោក ស៊ីវ សុជាតិ នៅថ្ងៃទី២៧ ខែមីនា កូនគាត់បានបើករថយន្តខាងលើចេញពីភ្នំពេញ មកផ្លូវបាត់ដំបង មិនទៅតាមផ្លូវសៀមរាបទេ ហើយថ្ងៃដដែលគាត់បានទទួលទូរស័ព្ទពីប្រពន្ធគាត់ប្រាប់ថា កូនរបស់ខ្លួន ជួបគ្រោះថ្នាក់ចរាចរណ៍នៅខេត្តបាត់ដំបង។ ប៉ុន្តែមកដល់ថ្ងៃនេះ លោក ស៊ីវ សុជាតិ មិនបានទទួលដំណឹងថា កូនរបស់គាត់ស្ថិតនៅទីណានោះទេ។
ករណីគ្រោះថ្នាក់ បានកើតឡើងតាំងពីយប់ថ្ងៃទី២៧ ខែមីនារហូតដល់វេលារសៀល ថ្ងៃ ទី៣០ ខែមីនា ទើបសមត្ថកិច្ចជំនាញ នៃស្នងការដ្ឋាននគរបាលខេត្តបាត់ដំបង ចេញលិខិតកោះហៅម្ចាស់ឡានដែលបង្កហេតុទៅបំភ្លឺ។ កាលបរិច្ចេទចូលបំភ្លឺ ត្រូវបានកំណត់នៅ១០ ព្រឹក ថ្ងៃទី១ ខែមេសា។
ជុំវិញករណីគ្រោះថ្នាក់ចរាចរណ៍នេះ សាធារណជន នៅតែបន្តថ្កោលទោស និងទន្ទឹងរង់ចាំមើលសមត្ថកិច្ច ពិសេសការអនុវត្តច្បាប់ ដើម្បីផ្តល់យុត្តិធម៌ សម្រាប់គ្រួសារជនរងគ្រោះ។ ពាក់ព័ន្ធករណីនេះដែរសម្ដេច ហ៊ុន ម៉ាណែត នាយករដ្ឋមន្ត្រី រួមទាំងរដ្ឋមន្ត្រីក្រសួងមហាផ្ទៃ បានចេញមុខបញ្ជាឱ្យសមត្ថកិច្ច ចាត់វិធានការឱ្យបានម៉ឺងម៉ាត់ ដើម្បីផ្ដល់យុត្តិធម៌ដល់ជនរងគ្រោះ៕
