Washington Post៖ យោធាអាមេរិកបានបាញ់មីស៊ីល Tomahawk ច្រើនជាង ៨៥០គ្រាប់ ក្នុងរយៈពេលតែ ៤សប្តាហ៍នៃសង្គ្រាមជាមួយអ៉ីរ៉ង់

បរទេស៖ យោងតាមសេចក្តីរាយការណ៍របស់កាសែត Washington Post នាថ្ងៃសុក្រនេះ យោធាសហរដ្ឋអាមេរិកបានបាញ់មីស៊ីល Tomahawk ច្រើនជាង ៨៥០គ្រាប់ ក្នុងរយៈពេលតែ ៤សប្តាហ៍នៃសង្គ្រាមជាមួយអ៉ីរ៉ង់ ដែលជាអត្រាប្រើប្រាស់អាវុធដ៏ច្រើនសន្ធឹកសន្ធាប់ រហូតធ្វើឱ្យមន្ត្រីមន្ទីរបញ្ចកោណមួយចំនួនមានការព្រួយបារម្ភ និងឈានដល់ការជជែកពិភាក្សាផ្ទៃក្នុងអំពីវិធីបង្កើនសមត្ថភាពផលិតឱ្យបានទាន់ពេលវេលា។

បើតាមការចេញផ្សាយដោយ ទីភ្នាក់ងារសារព័ត៌មាន Reuters ទោះបីជាមានការលើកឡើងពីក្តីបារម្ភនេះក្តី សេតវិមានបានចេញមុខច្រានចោលយ៉ាងដាច់អហង្ការ ដោយអ្នកនាំពាក្យ លោកស្រី Karoline Leavitt បានបញ្ជាក់ប្រាប់ Reuters ថា៖ «កងទ័ពអាមេរិកមានសព្វាវុធ និងគ្រាប់រំសេវស្តុកទុកគ្រប់គ្រាន់លើសពីអ្វីដែលចាំបាច់ ដើម្បីសម្រេចបាននូវគោលដៅនៃ «ប្រតិបត្តិការកំហឹងដ៏មហិមា» (Operation Epic Fury) ដែលកំណត់ដោយប្រធានាធិបតី ត្រាំ»។

លោកស្រីបានបន្ថែមថា លោក ត្រាំ នៅតែបន្តជំរុញឱ្យក្រុមហ៊ុនការពារជាតិទាំងអស់ ពន្លឿនការផលិតអាវុធដែលផលិតដោយអាមេរិកផ្ទាល់ ដែលលោកអះអាងថាជាអាវុធដ៏ល្អបំផុតនៅលើពិភពលោក។

គួរបញ្ជាក់ថា ជម្លោះរវាងអាមេរិក-អ៉ីស្រាអែល និងអ៉ីរ៉ង់ ដែលកំពុងឈានចូលដល់សប្តាហ៍ទី៤នេះ បានបង្កឱ្យមានតម្រូវការប្រើប្រាស់មីស៊ីលដែលមានភាពជាក់លាក់ខ្ពស់ (Precision weapons) យ៉ាងច្រើនលើសលប់ ដើម្បីកម្ទេចហេដ្ឋារចនាសម្ព័ន្ធយោធា និងរោងចក្រផលិតអាវុធរបស់ទីក្រុងតេហេរ៉ង់។រហូតមកដល់ពេលនេះ ក្រសួងការពារជាតិអាមេរិក នៅមិនទាន់ផ្តល់ការអត្ថាធិប្បាយណាមួយជាផ្លូវការជុំវិញសេចក្តីរាយការណ៍នេះនៅឡើយទេ៕