អាជ្ញាធរក្រុងក្រុងសៀមរាបអំពាវនាវ ចៅសង្កាត់ ចៅសង្កាត់រងនិងសមាជិកក្រុមប្រឹក្សាសង្កាត់ អាណត្តិទី៥បន្តអភិវឌ្ឍន៍ ក្នុងមូលដ្ឋានបន្ថែម
អាជ្ញាធរក្រុងសៀមរាប បានអំពាវនាវ ចៅសង្កាត់ ចៅសង្កាត់រងនិងសមាជិកក្រុមប្រឹក្សាសង្កាត់ អាណត្តិទី៥បន្តទាំអស់ត្រូវរួមគ្នាអភិវឌ្ឃន៍មូលដ្ឋានលើគ្រប់វិស័យឱ្យមានការរីកចំរើនបន្ថែមទៀត ដើម្បីមុខមាត់ក្នុងសហគមន៍។
ក្នុងពិធីប្រកាសសុពលភាពសមាជិកក្រុមប្រឹក្សាសង្កាត់សាលាកំរើកអាណត្តិទី៥នាព្រឹកថ្ងៃទី០៦ ខែកក្កដាឆ្នាំ២០២២នេះ លោក បូ ម៉េងទ្រី អភិបាលរងនៃគណៈអភិបាលក្រុងសៀមរាប បានមានប្រសាសន៍នែនាំដល់អស់លោក លោកស្រី ជាសមាជិកក្រុមប្រឹក្សាសង្កាត់ អាណត្តិទី៥ និង អស់លោក លោកស្រី ជាចៅសង្កាត់ ចៅសង្កាត់រងទាំងអស់ ដែលបានទទួលនូវការស្រឡាញ់ពេញចិត្ត និងការគាំទ្រពីសំណាក់ប្រជា ពលរដ្ឋ តាមរយៈការបោះឆ្នោតកាលពីថ្ងៃអាទិត្យ ទី០៥ ខែមិថុនា ឆ្នាំ២០២២ កន្លងមកនេះ ដើម្បី បន្តដឹកនាំសង្កាត់សាលាកំរើក ឲ្យបន្តអភិវឌ្ឍន៍រីកចម្រើនលើគ្រប់វិស័យជាបន្ថែមទៀត ហើយ ក្នុងនាមជា សមាជិកក្រុមប្រឹក្សាដែលបានជាប់ឆ្នោត ទោះបីជាលោកស្រី អស់លោកមានសមាសភាពមកពី គណបក្សនយោបាយតែមួយ ឬគណបក្សនយោបាយផ្សេងៗគ្នាក៏ពិតមែន ប៉ុន្តែតាមគោលការណ៍ ច្បាប់ ក្រុមប្រឹក្សាគឺជាតំណាងឲ្យប្រជាពលរដ្ឋក្នុងសង្កាត់សាលាកំរើកទាំងមូល។លោកអភិបាលរងក្រុងបន្តទៀតថា នៅក្នុង អាណត្តិការងារ០៥ឆ្នាំនេះ អស់លោក លោកស្រីជាសមាជិកក្រុមប្រឹក្សា ត្រូវខិតខំបំពេញតួនាទី ភារកិច្ចក្នុងការគ្រប់គ្រង ចាត់ចែងកិច្ចការមូលដ្ឋានរបស់ខ្លួន ដើម្បីឆ្លើយតបទៅនឹងតម្រូវការប្រជា ពលរដ្ឋ និងបម្រើផលប្រយោជន៍ ព្រមទាំងសេចក្តីត្រូវការរបស់ប្រជាពលរដ្ឋទាំងអស់ដោយស្មើភាព ដោយយុត្តិធម៌ និងមិនត្រូវប្រកាន់និន្នាការនយោបាយនោះឡើយ។ លោកបូ ម៉េងទ្រី ក៏បានគូសបញ្ជាក់ថា ក្រុមប្រឹក្សាសង្កាត់សាលាកំរើកអាណត្ដិទី៥នេះ គឺ កើតចេញពីឆន្ទៈរបស់ប្រជាពលលរដ្ឋ តាមរយៈការបោះឆ្នោតដោយផ្ទាល់ពីសំណាក់ប្រជាពលរដ្ឋ គឺត្រូវបន្ដនិរន្ដរភាពនៃការដឹកនាំគ្រប់គ្រង និង អភិវឌ្ឍន៍នៅមូលដ្ឋានក្នុងអាណត្ដិ៥ឆ្នាំបន្ដទៀត ហើយត្រូវបន្ដអនុវត្ដការងារគ្រប់គ្រង និងការអភិវឌ្ឍមូលដ្ឋាន សំដៅធានាឲ្យមាននិរន្ដរភាព ក្នុងកិច្ចការរដ្ឋបាល និង ការផ្ដល់សេវា ព្រមទំាងការអភិវឌ្ឍនៅមូលដ្ឋានឲ្យកាន់តែមានប្រសិទ្ធភាពថែមទៀត ដើម្បីឆ្លើយតបតម្រូវការរបស់ប្រជាពលរដ្ឋផងដែរ ។ លោកអភិបាលរងក្រុង បានមានប្រសាសន៍បញ្ជាក់បន្ថែមទៀតថា ដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ កាលពីថ្ងៃទី០៥ ខែមិថុនា ឆ្នាំ២០២២កន្លងមក ក៏ត្រូវបានវាយតម្លៃថាមានលក្ខណៈសេរី ត្រឹមត្រូវ យុត្តិធម៌ និងគ្មាន អំពើហិង្សា ហើយលទ្ធផលនៃការបោះឆ្នោតក៏ត្រូវបានទទួលស្គាល់ពីគណបក្សនយោបាយនានាដែល បានចូលរួមក្នុងការបោះឆ្នោតនេះផងដែរ។ចំពោះគណបក្សនយោបាយដែលបានចូលរួមប្រកួតប្រជែងក្នុង ការបោះឆ្នោតឃុំ សង្កាត់អាណត្តិទី៥នេះ មានចំនួន ១៧គណបក្ស។ យោងតាមការប្រកាសលទ្ធផល ផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ របស់ គ.ជ.ប ក្នុងចំណោមឃុំ សង្កាត់នៅទូទាំងប្រទេសចំនួន១,៦៥២ ដែលមានអាសនៈសរុបចំនួន ១១,៦២២ មានតែគណបក្ស នយោបាយចំនួន៩ តែប៉ុណ្ណោះ ដែលបានទទួលអាសនៈក្រុមប្រឹក្សាឃុំ សង្កាត់ក្នុងអាណត្តិទី៥នេះ។
បញ្ជាក់ថាយោងតាមសេចក្តីប្រកាសរបស់ក្រសួងមហាផ្ទៃដែលស្តីពីការទទួលស្គាល់សមាសភាពប្រធានក្រុមប្រឹក្សាសង្កាត់ ចៅសង្កាត់ ចៅសង្កាត់រង និងសមាជិកក្រុមប្រឹក្សាសង្កាត់នៃសង្កាត់សាលាកំរើកក្រុងសៀមរាបខេត្តសៀមរាប សមាសភាពជាសមាជិកក្រុមប្រឹក្សាសង្កាត់សាលាកំរើកអាណត្តិទី៥នេះមានចំនួន១១រូប ដោយក្នុងនោះមានលោក សាម ឡន ជាចៅសង្កាត់ លោកស្រី នួន គឹមសួរ ជាចៅសង្កាត់រងទី១ និងលោក នង ធារ៉ា ជាចៅសង្កាត់រងទី២ ៕
