ឯកឧត្តម វ៉ី សំណាង ចុះសួរសុខទុក្ខវីរកងទ័ព កំពុងសម្រាកព្យាបាលនៅមន្ទីរពេទ្យបង្អែកស្រុកគិរីវង់ និងនៅគេហដ្ឋាន ស្រុកទ្រាំង
តាកែវ៖ បន្ទាប់ពីទទួលបានដំណឹងវីរកងទ័ព ដ៏អង់អាចក្លាហានបានរងរបួសដោយសារផ្សែងពុល និងគ្រោះថ្នាក់អំឡុង ពេលបំពេញភារកិច្ចនៅសមរភូមិមុខ ការពារបូរណភាពទឹកដី បានមកសម្រាកព្យាបាលនៅមន្ទីរពេទ្យបង្អែកស្រុកគិរីវង់ និងសម្រាកព្យាបាលនៅគេហដ្ឋាននៅស្រុកទ្រាំង ខេត្តតាកែវ នាព្រឹកថ្ងៃសុក្រ ទី១៩ ខែធ្នូ ឆ្នាំ២០២៥ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បាននាំយកអំណោយសម្ភារ និងថវិកាមួយចំនួន មកសួរសុខទុក្ខ ដោយផ្ទាល់។
មានប្រសាសន៍សំណេះសំណាលនាឱកាសនោះដែរ ឯកឧត្តម វ៉ី សំណាង អភិបាលខេត្តតាកែវ បានសម្តែងការគោរព ដឹងគុណ ការកោតសរសើរនិងវាយតម្លៃខ្ពស់ចំពោះបងប្អូនវីរកងទ័ពទាំងអស់ នូវវីរភាពនិងការលះបង់គ្រប់បែបយ៉ាង ដើម្បីការពារអធិបតេយ្យ និងបូរណភាពទឹកដីនៃកម្ពុជាយើង ពីការរំលោភឈ្លានពានរបស់កងទ័ពថៃ នៅតាមបណ្តោយ ព្រំដែនកម្ពុជា-ថៃ។
ឯកឧត្តមអភិបាលខេត្ត ក៏បានជូនពរឱ្យវីរកងទ័ពទាំងអស់ ឆាប់បានជាសះស្បើយ ហើយមាន សុខភាពល្អ កម្លាំងមាំមួន និងអាចវិលត្រលប់ចូលអង្គភាពវិញ ដើម្បីបន្តបេសកកម្មការពារប្រទេសជាតិរបស់យើង៕
