មន្ត្រីជាន់ខ្ពស់ក្រសួងមហាផ្ទៃ សង្ឃឹមនិងជឿជាក់ថា លោកអភិបាលរងខេត្តពោធិ៍សាត់ ដែលទើបទទួលការតែងតាំងថ្មី នឹងខិតខំប្រឹងប្រែងអភិវឌ្ឍមូលដ្ឋានខេត្តពោធិ៍សាត់ឱ្យកាន់តែមានភាពរីកចម្រើន
ពោធិ៍សាត់៖ ឯកឧត្ដម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ តំណាងឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាថ្ងៃទី២១ ខែវិច្ឆិកា ឆ្នាំ២០២៥ បានអញ្ជើញជាអធិបតី ក្នុងពិធីប្រកាសចូលកាន់មុខតំណែង អភិបាលរងនៃគណៈអភិបាលខេត្ត ដោយការចូលរួមពីឯកឧត្ដម ម៉ក់ រ៉ា ប្រធានក្រុមប្រឹក្សាខេត្ត និងឯកឧត្ដម ខូយ រីដា អភិបាលខេត្តពោធិ៍សាត់។
បន្ទាប់ពីទទួលបានអនុក្រឹត្យ, លោក សំ ណារិទ្ធិ ដែលទើបនឹងទទួលបានមុខតំណែងថ្មី ជាអភិបាលរងនៃគណៈអភិបាលខេត្តពោធិ៍សាត់ បានប្តេជ្ញាចិត្តយ៉ាងមុតមាំ ចំពោះអង្គពិធីទាំងមូល និងប្រជាពលរដ្ឋក្នុងខេត្ត៖ ប្តេជ្ញាគោរព និងអនុវត្តន៍តាម រដ្ឋធម្មនុញ្ញនៃកម្ពុជា គោរពដាច់ខាតចំពោះ ជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់។ ប្តេជ្ញាអនុវត្តការងារ តួនាទី ភារកិច្ច និងសិទ្ធិអំណាច ដែលច្បាប់បានកំណត់ ពិសេសច្បាប់ស្តីពីការគ្រប់គ្រងរដ្ឋបាលថ្នាក់ក្រោមជាតិ ដោយស្មារតីទទួលខុសត្រូវខ្ពស់។ ប្តេជ្ញាចូលរួមសហការយ៉ាងស្អិតរមួត ក្នុងស្មារតី សាមគ្គីភាព និងឯកភាពផ្ទៃក្នុង ជាមួយគណៈអភិបាលខេត្តទាំងអស់ ដើម្បីធានាប្រសិទ្ធភាពនៃការដឹកនាំរដ្ឋបាលខេត្ត។ ប្តេជ្ញាកសាង និងពង្រឹងកិច្ចសហប្រតិបត្តិការល្អជាមួយស្ថាប័ន កងកម្លាំងប្រដាប់អាវុធ មន្ទីរអង្គភាពជុំវិញខេត្ត អាជ្ញាធរក្រុង-ស្រុក និងភាគីពាក់ព័ន្ធ។ ប្តេជ្ញាចូលរួមចំណែកអនុវត្តយ៉ាងសកម្មនូវ កម្មវិធីកំណែទម្រង់ស៊ីជម្រៅ របស់រាជរដ្ឋាភិបាល និងយុទ្ធសាស្ត្រ បញ្ចកោណ សម្រាប់នីតិកាលថ្មី ដោយផ្តោតលើការបម្រើប្រជាពលរដ្ឋ។ ប្តេជ្ញាជំរុញការផ្ដល់សេវាសាធារណៈ ឱ្យកាន់តែមានគុណភាព តម្លាភាព និងឆាប់រហ័ស តាមរយៈការអនុវត្ត កំណែទម្រង់វិមជ្ឈការ និងវិសហមជ្ឈការ។ ប្តេជ្ញាខិតខំដោះស្រាយរាល់បញ្ហា និងសំណូមពររបស់ប្រជាពលរដ្ឋ ដោយតម្កល់ផលប្រយោជន៍របស់ប្រជាជនជាធំ និងចូលរួមថែរក្សា សន្តិសុខ សុវត្ថិភាព និងសណ្តាប់ធ្នាប់សាធារណៈ ក្នុងដែនសមត្ថកិច្ច។
ក្នុងឱកាសនោះឯកឧត្ដម ខូយ រីដា អភិបាលខេត្តពោធិ៍សាត់ បានសម្តែងការស្វាគមន៍យ៉ាងកក់ក្តៅ ចំពោះវត្តមានរបស់លោករដ្ឋលេខាធិការ ដែលបានចំណាយពេលវេលាដ៏មានតម្លៃ ផ្តល់កិត្តិយសអញ្ជើញប្រកាសចូលកាន់មុខតំណែងអភិបាលរងថ្មី នៃខេត្តពោធិ៍សាត់។
ឯកឧត្ដម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ តំណាងឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្តែងនូវការកោតសរសើរ និងវាយតម្លៃខ្ពស់ចំពោះក្រុមប្រឹក្សា គណៈអភិបាលខេត្តពោធិ៍សាត់ ថ្នាក់ដឹកនាំ មន្រ្តីរាជការ អាជ្ញាធរគ្រប់លំដាប់ថ្នាក់ និងប្រជាពលរដ្ឋទូទាំងខេត្ត ដែលបានខិតខំប្រឹងប្រែងរួមគ្នាយ៉ាងសកម្ម ក្នុងការបំពេញតួនាទីភារកិច្ច ប្រកបដោយស្មារតីទទួលខុសត្រូវខ្ពស់ ដើម្បីសម្រេចបាននូវសមិទ្ធផលជាច្រើនគួរឱ្យកត់សម្គាល់ ជាពិសេសក្នុងការធានាថែរក្សាសន្តិភាព ស្ថិរភាពនយោបាយ ការរក្សាសន្តិសុខ សណ្តាប់ធ្នាប់សាធារណៈ ការលើកកម្ពស់លទ្ធិប្រជាធិបតេយ្យ និងជំរុញការអភិវឌ្ឍសេដ្ឋកិច្ចសង្គមនៅមូលដ្ឋាន ស្របតាមកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត របស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។
ឯកឧត្ដមបន្តថា យោងតាមសំណូមពរចាំបាច់ លក្ខណៈសម្បត្តិ សមត្ថភាព និងបទពិសោធនការងារកន្លងមក រាជរដ្ឋាភិបាលបានសម្រេចតែងតាំង លោក សំ ណារិទ្ធិ ពីអភិបាលស្រុកតាលោសែនជ័យ មកជាអភិបាលរងនៃគណៈអភិបាលខេត្តពោធិ៍សាត់ ជំនួសលោក ឡាយ វិសិដ្ឋ ដែលត្រូវបញ្ចប់មុខតំណែង។
ឯកឧត្ដមរដ្ឋលេខាធិកាសង្ឃឹម និងជឿជាក់ថា លោកអភិបាលរងនៃគណៈអភិបាលខេត្ត ដែលទើបនឹងទទួលការតែងតាំងថ្មី នឹងខិតខំប្រឹងប្រែងអនុវត្តតួនាទី ភារកិច្ច តាមរយៈចំណេះដឹង សមត្ថភាព និងបទពិសោធការងាររបស់ខ្លួន ដើម្បីបន្តចូលរួមក្នុងការងារដឹកនាំ គ្រប់គ្រង និងអភិវឌ្ឍមូលដ្ឋានខេត្តពោធិ៍សាត់ឱ្យកាន់តែមានភាពរីកចម្រើន និងទទួលបានសមិទ្ធផលថ្មីៗថែមទៀត ពិសេសខិតខំការកៀរគរការវិនិយោគ និងដោះស្រាយបញ្ហាប្រឈមនានា ជូនប្រជាពលរដ្ឋនៅមូលដ្ឋានឱ្យបានទាន់ពេលវេលា៕
