ឯកឧត្ដម រិន វីរៈ អញ្ជើញបើកវគ្គបណ្ដុះបណ្ដាលស្តីពី ការប្រមូលទិន្នន័យ និងប្រកាសឱ្យប្រើប្រាស់ថ្នាលបញ្ចូលទិន្នន័យមូលដ្ឋានឃុំ សង្កាត់ (CDB)

សៀមរាប÷នៅព្រឹកថ្ងៃទី២៤ ខែតុលា ឆ្នាំ២០២៥ ឯកឧត្ដម រិន វីរៈ ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា រដ្ឋលេខាធិការក្រសួងផែនការ និងជាប្រធានក្រុមប្រឹក្សាភិបាលនៃវិទ្យាស្ថានជាតិស្ថិតិ បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្តីពី ការប្រមូលទិន្នន័យ និងប្រកាសឱ្យប្រើប្រាស់ថ្នាលបញ្ចូលទិន្នន័យមូលដ្ឋានឃុំ សង្កាត់ (CDB)។

ក្នុងពិធីបើកវគ្គបណ្តុះបណ្តាលនោះ ឯកឧត្តម រិន វីរៈ បានសម្ដែងនូវការអរគុណ កោតសរសើរ និងវាយតម្លៃខ្ពស់ ចំពោះក្រុមការងាររបស់វិទ្យាស្ថានជាតិស្ថិតិ និងប្រធានមន្ទីរផែនការរាជធានី ខេត្ត អង្គការ UNICEF និងក្រុមការងារបច្ចេកទេសទាំងអស់ដែល បានចូលរួមចំណែកក្នុងការធ្វើតេស្តបញ្ចូលសាកល្បង និងផ្តល់ធាតុចូលក្នុងការកែសម្រួលថ្នាលបញ្ចូលទិន្នន័យ ដែលឈានមកដល់ការរៀបចំវគ្គបណ្ដុះបណ្ដាលលើការប្រមូលទិន្នន័យ និងប្រកាសឱ្យប្រើប្រាស់ថ្នាលបញ្ចូល ទិន្នន័យមូលដ្ឋានឃុំ សង្កាត់ (CDB) នាពេលនេះ។
ឯកឧត្តមមានប្រសាសន៍ទៀតថា វគ្គបណ្តុះបណ្តាលស្តីពី ការប្រមូលទិន្នន័យ និងប្រកាសឱ្យប្រើប្រាស់ថ្នាលបញ្ចូលទិន្នន័យមូលដ្ឋានឃុំ សង្កាត់ (CDB) គឺជាដំណាក់កាលដ៏មានសារៈសំខាន់បំផុតមួយក្នុងការផ្តល់នូវចំណេះដឹងនិងសមត្ថភាពបន្ថែម ដល់មន្ត្រីជំនាញនៅមន្ទីរផែនការរាជធានីខេត្ត ដើម្បីយកទៅបណ្តុះបណ្តាលបន្ត នៅថ្នាក់ខេត្ត និងថ្នាក់ស្រុក មុននឹងចុះប្រតិបត្តិការប្រមូលទិន្នន័យនៅតាមភូមិទាំងអស់ទូទាំងប្រទេស។

ថ្នាលបញ្ចូលទិន្នន័យថ្មីនេះ គឺជាការអភិវឌ្ឍនិងកែលម្អប្រព័ន្ធមូលដ្ឋាន CDB ដើម្បីឱ្យមានភាពទាន់សម័យ ស្របតាមបច្ចេកវិទ្យាថ្មីៗ និងឆ្លើយតបទៅនឹងតម្រូវការរដ្ឋបាលឌីជីថលរបស់រាជរដ្ឋាភិបាល។ ប្រព័ន្ធនេះ សម្រួលដល់ការបញ្ចូលទិន្នន័យឱ្យបានត្រឹមត្រូវ មានប្រសិទ្ធភាពខ្ពស់ មានទិន្នន័យទាន់ពេលវេលា ងាយស្រួលក្នុងការកែសម្រួល និងអាចប្រើប្រាស់ភ្ជាប់ APP, Google map នៅពេលខាងមុខសម្រាប់ថ្នាក់ដឹកនាំ ងាយស្រួលទាញយកទិន្នន័យ និងសម្រាប់ការធ្វើសេចក្តីសម្រេចផ្នែកគោលនយោបាយ និងការធ្វើផែនការអភិវឌ្ឍន៍ នៅគ្រប់កម្រិត។

ផ្អែកតាមកម្មវិធីវគ្គបណ្តុះបណ្តាលនេះ ឯកឧត្តមមានជំនឿយ៉ាងមុតមាំថា សិក្ខាកាមទាំងអស់ នឹងចូលរួមយ៉ាងសកម្ម ដើម្បីទទួលបានចំណេះដឹងថ្មីៗ ឈានទៅអនុវត្តការងារជាក់ស្តែងឱ្យកាន់តែមានគុណភាព និងប្រសិទ្ធភាពខ្ពស់។