បទវិភាគ៖ពីការផ្តួចផ្តើមដល់ការអនុវត្តជាក់ស្តែង ផែនការចិនបានជំរុញដល់ការអភិវឌ្ឍស្ត្រីទូទាំងពិភពលោក
ក្នុងកិច្ចប្រជុំថ្នាក់ដឹកនាំសកលស្តីពីស្រ្តីដែលបើកធ្វើនៅក្រុងប៉េកាំងកាលពីថ្ងៃទី១៣ខែតុលា លោក Xi Jinping ប្រធានរដ្ឋចិនបានអញ្ជើញចូលរួមពិធីសម្ពោធបើកនិងថ្លែងសុន្ទរកថាគន្លឹះ ដោយលើកឡើងសំណើ៤ចំណុចអំពីការពន្លឿនដំណើរការថ្មីនៃការអភិវឌ្ឍដោយគ្រប់ជ្រុងជ្រោយរបស់ស្ត្រី ហើយប្រកាសពីវិធានការចំនួន៥ចំណុចរបស់ភាគីចិនក្នុងការគាំទ្រការអភិវឌ្ឍបុព្វហេតុស្ត្រីសកល ។
“រួមគ្នាបង្កើតបរិយាកាសដ៏ល្អប្រសើរដែលមានអំណោយផលដល់ការអភិវឌ្ឍរបស់ស្ត្រី” “រួមគ្នាពូនជ្រំកម្លាំងចលករដ៏រឹងមាំសម្រាប់ជំរុញការអភិវឌ្ឍប្រកបដោយគុណភាពខ្ពស់នៃបុព្វហេតុស្ត្រី” “រួមគ្នាកសាងនិម្មាបនកម្មអភិបាលកិច្ចដែលធានាដល់សិទ្ធិនិងផលប្រយោជន៍របស់ស្ត្រី”និង “រួមគ្នាចារទំព័រថ្មីនៃការជំរុញកិច្ចសហប្រតិបត្តិការសកលខាងស្ត្រី” ។លោកXi Jinping ប្រធានរដ្ឋចិនបានលើកឡើងសំណើ៤ចំណុចដូចខាងលើក្នុងកិច្ចប្រជុំលើកនេះ ដែលមានគោលបំណងចាក់គ្រឹះមូលដ្ឋាន បង្ហាញពីគន្លឹះនិងផ្តល់ការធានាសម្រាប់ដំណើរការថ្មីនៃការអភិវឌ្ឍដោយគ្រប់ជ្រុងជ្រោយរបស់ស្ត្រី ដែលមានអំណោយផលដល់ការប្រមូលផ្តុំគំនិតឯកភាពរួមកាន់តែទូលំទូលាយនិងត្រួសត្រាយផ្លូវអភិវឌ្ឍន៍កាន់តែធំទូលាយ ។
បច្ចុប្បន្ននេះ ឃ្លាតពីការសម្រេចបាននូវគោលដៅអភិវឌ្ឍន៍ជានិរន្តរភាពនៅឆ្នាំ២០៣០នៃអង្គការសហប្រជាជាតិនៅសល់តែ៥ឆ្នាំ ក្នុងការអភិវឌ្ឍបុព្វហេតុស្ត្រី ឱកាសស្ថិតនៅជាមួយបញ្ហាប្រឈម ។ មួយផ្នែក បដិវត្តន៍វិទ្យាសាស្ត្រនិងបច្ចេកវិទ្យានិងកំណែទម្រង់ឧស្សាហកម្មជុំថ្មីបានពន្លឿនជំហានទៅមុខ ដែលនាំមកនូវឱកាសកាន់តែច្រើនដល់ស្ត្រីទូទាំងពិភពលោក ។ មួយផ្នែកទៀត អំពើហិង្សានិងការរើសអើងលើស្ត្រីនិងអសមភាពខាងសេដ្ឋកិច្ចនៅតែស្ថិតមានដដែល បញ្ហាប្រឈមថ្មីដូចជាគ្រោះមហន្តរាយអាកាសធាតុអាក្រក់ជ្រុលនិងគម្លាតឌីជីថលយេនឌ័រជាដើមមានភាពកាន់តែលេចធ្លោ ។ ក្រោមបរិបទបែបនេះ គ្មានអ្វីគួរឱ្យសង្ស័យឡើយ ការលើកឡើងផែនការចិនបានផ្តល់កម្លាំងជំរុញសម្រាប់ការសម្រេចបាននូវគោលដៅអភិវឌ្ឍន៍ជានិរន្តរភាពនៃអង្គការសហប្រជាជាតិ ។
ក្នុងវិស័យជំរុញការអភិវឌ្ឍដោយគ្រប់ជ្រុងជ្រោយរបស់ស្ត្រី ចិនគឺជាអ្នកផ្តួចផ្តើមគំនិត ហើយក៏ជាអ្នកអនុវត្តជាក់ស្តែងផងដែរ ។ ស្ត្រីចំនួន៦៩០លាននាក់បោះជំហានចូលសង្គមដែលប្រជាជនមានជីវភាពធូរធារបង្គួរក្នុងពេលដំណាលគ្នា អាយុកាលរំពឹងទុកជាមធ្យមរបស់ស្ត្រីបានកើនឡើងដល់៨០,៩ឆ្នាំ សមាមាត្រនៃនិស្សិតស្រ្តីតាមសាលាឧត្តមសិក្សាបានឡើងដល់៥០,៧៦ភាគរយ សមាមាត្រស្រ្តីក្នុងចំណោមបុគ្គលិកប្រកបការងារក្នុងសង្គមទាំងមូលលើសពី៤០ភាគរយ ។ល។ ទិន្នន័យមួយចំនួនគឺជាសក្សីនៃការទទួលបានសមិទ្ធផលជាប្រវត្តិសាស្ត្រនៃបុព្វហេតុស្ត្រីរបស់ចិនក្នុងយុគសម័យថ្មី ។
នៅឆ្នាំ១៩៨០ ចិនបានក្លាយជាប្រទេសក្រុមទីមួយដែលចុះហត្ថលេខាលើ《អនុសញ្ញាស្តីពីការលុបបំបាត់ចោលភាពរើសអើងគ្រប់រូបភាពទាំងអស់ចំពោះស្ត្រី》 ។ ពីការបណ្តុះបណ្តាលសមាជិកភេទនារីជូនប្រទេសនានាតាមរយៈរោងជាង Luban ដល់ការជួយស្ត្រីរបស់ប្រទេសជាង១រយមានការងារធ្វើតាមរយៈបច្ចេកវិទ្យាដាំដុះស្មៅ Juncao ចិនបានជំរុញការអភិវឌ្ឍកិច្ចការស្រ្តីទូទាំងពិភពលោកតាមរយៈគំនិតផ្តួចផ្តើមស្តីពីការរួមគ្នាកសាងខ្សែក្រវាត់និងផ្លូវ ។
ក្នុងកិច្ចប្រជុំថ្នាក់ដឹកនាំសកលស្តីពីស្រ្តីលើកនេះ ភាគីចិនបានប្រកាសពីវិធានការថ្មីបំផុតសម្រាប់គាំទ្រការអភិវឌ្ឍបុព្វហេតុស្ត្រីសកល ក្នុងនោះបូករួមទាំងបរិច្ចាគប្រាក់១០លានដុល្លារអាមេរិកបន្ថែមទៀតចំពោះកម្មវិធីអង្គការសហប្រជាជាតិស្តីពីស្រ្តីក្នុង៥ឆ្នាំខាងមុខនេះផ្តល់ប្រាក់១រយលានដុល្លារអាមេរិកដល់មូលនិធិស្តីពីការអភិវឌ្ឍសកលនិងកិច្ចសហប្រតិបត្តិការរវាងប្រទេសកំពុងអភិវឌ្ឍន៍ ផ្តល់ជំនួយដល់គម្រោង “តូចនិងល្អ”ចំនួន១ពាន់ក្នុងវិស័យអភិវឌ្ឍន៍ជីវភាពរស់នៅរបស់ប្រជាជន អញ្ជើញស្ត្រីចំនួន៥ម៉ឺននាក់ឱ្យមកធ្វើការផ្លាស់ប្តូរនិងរៀនសូត្រនៅប្រទេសចិននិងបង្កើតមជ្ឈមណ្ឌលកសាងសមត្ថភាពស្ត្រីទូទាំងពិភពលោកជាដើម ។
បច្ចុប្បន្ននេះ នៅទូទាំងពិភពលោកនៅតែមានស្ត្រីនិងកុមារីលើសពី៦រយលាននាក់ស្ថិតក្នុងការប៉ះទង្គិចនិងចលាចល ហើយស្ត្រីនិងកុមារីចំនួន២ពាន់លាននាក់ខ្វះការធានាសង្គម ។ ភាគីចិនរីករាយធ្វើកិច្ចខិតខំប្រឹងប្រែងជាមួយភាគីនានា ដើម្បីបំពេញបន្ថែមកម្លាំងចលករថ្មីក្នុងការពន្លឿនការអភិវឌ្ឍដោយគ្រប់ជ្រុងជ្រោយរបស់ស្ត្រី ក៏ដូចជារួមចំណែកកម្លាំងស្ត្រីកាន់តែច្រើនសម្រាប់ជំរុញអរិយធម៌និងបឌ្ឍនភាពរបស់មនុស្សជាតិ ៕
