ក្រសួងមហាផ្ទៃ និងក្រសួងសេដ្ឋកិច្ច បើកសិក្ខាសាលាស្ដីពី «តួនាទីភារកិច្ច សិទ្ធិអំណាច និងការទទួលខុសត្រូវ របស់អង្គភាពថវិកាអាណាប័កផ្ទេរសិទ្ធិមិនពេញលេញ និងពេញលេញ»

សៀមរាប៖ នៅព្រឹកថ្ងៃទី២ ខែតុលា ឆ្នាំ២០២៥នេះ ក្រសួងមហាផ្ទៃ ផ្នែកសន្ដិសុខសាធារណៈ និងក្រសួងសេដ្ឋកិច្ច និងហិរញ្ញវត្ថុ បានសហការរៀបចំពិធីបើកសិក្ខាសាលាស្ដីពី «តួនាទីភារកិច្ច សិទ្ធិអំណាច និងការទទួលខុសត្រូវ របស់អង្គភាពថវិកាអាណាប័កផ្ទេរសិទ្ធិមិនពេញលេញ និងពេញលេញ» ក្រោមអធិបតីភាព ឯកឧត្តម ឧត្តមសេនីយ៍ទោ ស្វាយ វិចិត្រ អគ្គនាយករង នៃអគ្គនាយកដ្ឋានភស្ដុភារ និងហិរញ្ញវត្ថុ និងជាតំណាង ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ។

ពិធីនេះក៏មានការអញ្ជើញចូលរួមពី អគ្គស្នងការរង អគ្គលេខាធិការរង អគ្គនាយករង ក្រោមចំណុះក្រសួងមហាផ្ទៃ តំណាងក្រសួងសេដ្ឋកិច្ច និងហិរញ្ញាវត្ថុ គ្រូបង្គោល គ្រូឧទ្ទេស និងសិក្ខាកាមជាច្រើនរូបទៀត។

លោកឧត្តមសេនីយ៍ទោ តិច សុខា ប្រធាននាយកដ្ឋានផែនការសេដ្ឋកិច្ច និងហិរញ្ញវត្ថុ ផ្នែកសន្ដិសុខសាធារណៈ បានឱ្យដឹងថា ក្នុងក្របខណ្ឌនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ផ្នែកសន្តិសុខសាធារណៈ បានរៀបចំវគ្គបណ្តុះបណ្តាល និងសិក្ខាសាលាចំនួន ០៩ វគ្គ និងមានសិក្ខាកាមចូលរួមសរុបចំនួន ១,៨១២រូប សម្រាប់ថ្ងៃនេះជាលើកទី១០ ដែលមានសិក្ខាកាមចូលរួមសរុប ១៩៥រូប ដែលជាសមាសភាពពីអង្គភាព ថ្នាក់កណ្តាល ក្រោមឱវាទក្រសួងមហាផ្ទៃ ផ្នែកសន្តិសុខសាធារណៈ ក្នុងសិក្ខាសាលាស្តីពី តួនាទីភារកិច្ច សិទ្ធិ អំណាច និងការទទួលខុសត្រូវរបស់អង្គភាពថវិកាអាណាប័កផ្ទេរសិទ្ធិមិនពេញលេញ និងពេញលេញ។

ឯកឧត្តម ឧត្តមសេនីយ៍ទោ ស្វាយ វិចិត្រ បានលើកឡើងថា សិក្ខាសាលានេះ មានរយៈពេល ២ថ្ងៃ ចាប់ពីថ្ងៃទី២-៣ ខែតុលា ឆ្នាំ២០២៥ គឺមានសារៈសំខាន់ខ្លាំងណាស់ ពោល គឺឆ្លើយតបនឹងតម្រូវការចាំបាច់ និងមានសារៈសំខាន់ សម្រាប់ពង្រឹងពង្រីកសមត្ថភាព ជំនាញវិជ្ជាជីវៈ លើកកម្ពស់ការយល់ដឹង និងបំពាក់ស្មារតីទទួលខុសត្រូវខ្ពស់លើមុខជំនាញពាក់ព័ន្ធ សម្រាប់ការគ្រប់គ្រងសេដ្ឋកិច្ចហិរញ្ញវត្ថុ ជូនដល់មន្ត្រីអនុវត្តការងារហិរញ្ញវត្ថុសាធារណៈ សម្រាប់ ចូលរួមចំណែកលើកកម្ពស់ផលិតភាពនៃការអនុវត្តការងារ តួនាទីភារកិច្ចប្រចាំថ្ងៃជូនអង្គភាព និងជាស្ពានសម្រាប់បន្តអភិវឌ្ឍសមត្ថភាពជំនាញ ឱ្យកាន់តែប្រសើរថែមទៀត នៅពេលអនាគត និង ជាពិសេស សម្រាប់ចូលរួមគាំទ្រ និង អនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ឱ្យសម្រេចជោគជ័យប្រកបដោយប្រសិទ្ធភាព និងចីរភាព។

ឯកឧត្តម អគ្គនាយករង ក៏បានលើកទឹកចិត្តសិក្ខាកាមទាំងអស់ សូមយកចិត្តទុកដាក់ត្រង់ត្រាប់ស្តាប់ការធ្វើបទបង្ហាញ របស់គ្រូឧទ្ទេស និងលើកជាសំណួរឱ្យបានផុលផុស។

ទន្ទឹមនឹងនេះ ឯកឧត្តម អគ្គនាយករង បានគូសបញ្ជាក់ផងដែរថា ក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួងមហាផ្ទៃផ្នែកសន្តិសុខសាធារណៈ នឹងបន្តសហការ ជាមួយអគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រង ហិរញ្ញវត្ថុសាធារណៈ ក្រសួងសេដ្ឋកិច្ច និងហិរញ្ញវត្ថុ ដើម្បីរៀបចំសិក្ខាសាលាបណ្តុះបណ្តាល ទាក់ទងការគ្រប់គ្រងហិរញ្ញវត្ថុសាធារណៈជូនអគ្គស្នងការដ្ឋាននគរបាលជាតិ, អគ្គលេខាធិការដ្ឋាន, អគ្គនាយកដ្ឋាន និងអង្គភាពពាក់ព័ន្ធ ដើម្បីបង្កើនសមត្ថភាពនៃការងារគ្រប់គ្រងហិរញ្ញវត្ថុសាធារណៈ ក្នុងក្របខណ្ឌក្រសួងមហាផ្ទៃ ផ្នែកសន្តិសុខសាធារណៈ៕