ឯកឧត្ដម អ៊ុំ រាត្រី នាំយកអំណោយមនុស្សធម៌ សាខាកាកបាទក្រហមកម្ពុជាខេត្ត ប្រគល់ជូនពលរដ្ឋមានជីវភាពខ្វះខាតជាង ២០០គ្រួសារ ក្នុងស្រុកថ្មពួក
បន្ទាយមានជ័យ៖ នៅល្ងាចថ្ងៃទី១០ ខែកញ្ញា ឆ្នាំ ២០២៥ ពលរដ្ឋមានជីវភាពខ្វះខាតជាង២០០គ្រួសារ ក្នុងឃុំគោករមៀត ស្រុកថ្មពួក ទទួលបានអំណោយមនុស្សធម៌ ពីសាខាកាកបាទក្រហមកម្ពុជាខេត្តបន្ទាយមានជ័យ។
ពិធីនេះប្រារព្ធធ្វើឡើងក្រោមអធិបតីភាព ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដោយមានការអញ្ជើញចូលរួមពីសណាក់ ឯកឧត្តម ប្លែក វ៉ារី ប្រធានក្រមប្រឹក្សាខេត្ត ក្រមការងារសាខាកាកបាទក្រហមកម្ពុជាខេត្ត សមាជិក -សមាជិការ អនុសាខាកាកបាទក្រហមកម្ពុជាស្រុកថ្មពួក យុវជន អ្នកស្ម័គ្រចិត្តបានចូលរួម។
ក្នុងឱកាសនោះ ឯកឧត្តម អ៊ុំ រាត្រី ក៏បានពាំនាំប្រសាសន៍ផ្តាំផ្ញើសារសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោកជំទាវ បណ្ឌិត ពេជ្រ ច័ន្ទមុនី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា ជូនចំពោះបងប្អូនដោយក្តីនឹករលឹក។
ឯកឧត្តម អ៊ុំ រាត្រី អភិបាលនៃគណៈអភិបាលខេត្ត ក៏បានបញ្ជាក់ថា ទោះស្ថិតនៅក្នុងកាលៈទេសៈណាក៏ដោយ កាកបាទក្រហមកម្ពុជា តែងតែនៅក្បែរបងប្អូនជានិច្ច រួមសុខ រួមទុក្ខ ដោយមិនបោះបង់បងប្អូនប្រជាពលរដ្ឋណាម្នាក់ចោលឡើយ៕
