ផ្លូវជាតិលេខ៥១ បាននិងកំពុងដើរតួនាទីយ៉ាងសំខាន់ក្នុងការលើកកម្ពស់វិស័យដឹកជញ្ជូន និងឧស្សាហកម្ម

ភ្នំពេញ៖ ក្រសួងសាធារណការ និងដឹកជញ្ជូន បានឱ្យដឹងថា ផ្លូវជាតិលេខ៥១ បាននិងកំពុងដើរតួនាទីយ៉ាងសំខាន់ក្នុងការលើកកម្ពស់វិស័យដឹកជញ្ជូន និងឧស្សាហកម្ម ព្រមទាំងជាតំបន់ទីប្រជុំជន អំណោយផលសម្រាប់គម្រោងអភិវឌ្ឍន៍វិស័យអចលនទ្រព្យ ដែលបានចូលរួមបង្កើតមុខរបរ និងបង្កើនប្រាក់ចំណូលសម្រាប់ប្រជាពលរដ្ឋ។

ក្រសួងបន្ថែមថា ផ្លូវជាតិនេះ គឺជាផ្លូវខ្សែក្រវាត់ក្រុងមួយ ដែលបានជួយសម្រួលការធ្វើដំណើរ ជាពិសេសអ្នកដែលរស់នៅដូចជា ខេត្តបាត់ដំបង ពោធិ៍សាត់ កំពង់ឆ្នាំង ជាដើម ដែលមានបំណងចង់ទៅខេត្តតំបន់មាត់សមុទ្រ មិនចាំបាច់ឆ្លងកាត់រាជធានីភ្នំពេញទេ គឺអាចធ្វើដំណើរកាត់តាមផ្លូវជាតិលេខ៥១នេះ។

សូមជម្រាបជូនថា ផ្លូវជាតិលេខ៥១ក្រាលបេតុងកៅស៊ូ AC មានប្រវែងសរុប ៣៧,៩៥ គីឡូម៉ែត្រ ដោយភ្ជាប់ពីស្រុកឧដុង្គ នៃចំណុចប្រសព្វផ្លូវជាតិលេខ៥ ឆ្ពោះទៅថ្នល់ទទឹង នៃចំណុចប្រសព្វផ្លូវជាតិលេខ៤ ក្នុងទទឹងផ្លូវ១២ម៉ែត្រ បានបើកការដ្ឋានសាងសង់ កាលពីថ្ងៃទី១៤ ខែមីនា ឆ្នាំ២០១៧ និងបានសម្ពោធឱ្យប្រើប្រាស់ជាផ្លូវការ កាលពីថ្ងៃទី២៥ ខែមីនា ឆ្នាំ២០២០។ ផ្លូវនេះមានភូមិសាស្រ្តនៅខេត្តកណ្ដាល និងខេត្តកំពង់ស្ពឺ ដោយមានភាពប្រទាក់ក្រឡាជាមួយផ្លូវជាតិលេខ៤ ផ្លូវជាតិលេខ៥ ផ្លូវលេខ៤១ ដែលភ្ជាប់ទៅផ្លូវជាតិលេខ៣ ផ្លូវជាតិលេខ៤២ តភ្ជាប់ទៅភ្នំពេញ និងផ្លូវជាតិលេខ១៤៤០ ឆ្ពោះទៅក្រុងច្បារមនខេត្តកំពង់ស្ពឺ៕