ម្ចាស់ពានរង្វាន់ណូបែលសន្តិភាព ១៩រូប ចុះហត្ថលេខាលើលិខិតចំហរមួយ ស្នើទៅកាន់លោក ដូណាល់ ត្រាំ ឱ្យរក្សាការដាក់សម្ពាធ ដើម្បីឱ្យមានការដោះលែងមនុស្សចំនួន ១ ៣០០នាក់ ដែលកំពុងជាប់ពន្ធនាគារនៅបេឡារុស ក្រោមហេតុផលនយោបាយ
Reuters៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២០ ខែសីហា ឆ្នាំ២០២៥ បានឱ្យដឹងថា ម្ចាស់ពានរង្វាន់ណូបែលសន្តិភាព ១៩រូប បានចុះហត្ថលេខាលើលិខិតចំហរមួយ ដោយស្នើទៅកាន់ប្រធានាធិបតីអាមេរិក លោក ដូណាល់ ត្រាំ ឱ្យរក្សាការដាក់សម្ពាធ ដើម្បីឱ្យមានការដោះលែងមនុស្សចំនួន ១ ៣០០នាក់ ដែលកំពុងជាប់ពន្ធនាគារនៅបេឡារុស ក្រោមហេតុផលនយោបាយ។
នៅក្នុងលិខិតចំហរនោះ ក៏បានអរគុណដល់លោក ត្រាំ ដែលលើកពីបញ្ហានេះក្នុងពេលជជែកតាមទូរស័ព្ទ ជាមួយប្រធានាធិបតីបេឡារុស Alexander Lukashenko កាលពីសប្តាហ៍មុន ហើយទទូចឱ្យលោក ត្រាំ ជួយបន្ថែមទៀត។
លិខិតចំហរនោះមានខ្លឹមសារថា «យើងសូមអំពាវនាវដោយគោរពឱ្យអ្នក (លោក ត្រាំ) បន្តកិច្ចខិតខំប្រឹងប្រែងដ៏សកម្ម ដើម្បីធានាឱ្យមានការដោះលែងអ្នកទោសនយោបាយទាំងអស់ នៅបេឡារុសជាបន្ទាន់។ សេរីភាពពួកគេ នឹងមិនត្រឹមតែស្តារយុត្តិធម៌បុគ្គលប៉ុណ្ណោះទេ ប៉ុន្តែថែមទាំងបើកផ្លូវឆ្ពោះទៅរកការផ្សះផ្សា និងការសន្ទនា»។
ម្ចាស់ហត្ថលេខីនៃលិខិតចំហរនោះ រួមមានជ័យលាភីពានរង្វាន់ណូបែលសន្តិភាព លោក Oscar Arias ដែលជាអតីតប្រធានាធិបតីកូស្តារីកា រួមទាំងជ័យលាភីពានរង្វាន់ណូបែលសន្តិភាពផ្សេងទៀត ខាងផ្នែកអក្សរសាស្រ្ត រូបវិទ្យា គីមីវិទ្យា ឱសថ និងសេដ្ឋកិច្ច។ តាំងពីពាក់កណ្តាលឆ្នាំ ២០២៤មក បេឡារុសបានដោះលែងអ្នកទោសរាប់រយនាក់ ហើយលោក Lukashenko បានបដិសេធថា នៅបេឡារុសមិនមានអ្នកទោសនយោបាយឡើយ៕
