សេតវិមានប្រកាសថា បុគ្គលគ្មានផ្ទះសម្បែង នៅក្នុងរដ្ឋធានីវ៉ាស៉ីនតោន អាចប្រឈមមុខនឹងការជាប់ពន្ធនាគារ

វ៉ាស៉ីនតោន៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៣ ខែសីហា ឆ្នាំ២០២៥ សេតវិមាន បានប្រកាសថា បុគ្គលគ្មានផ្ទះសម្បែង នៅក្នុងរដ្ឋធានីវ៉ាស៉ីនតោន អាចប្រឈមមុខនឹងការជាប់ពន្ធនាគារ ប្រសិនបើពួកគេមិនអនុវត្តតាមកិច្ចខិតខំប្រឹងប្រែងរបស់ លោកប្រធានាធីបតី ដូណាល់ ត្រាំ ក្នុងការបង្ក្រាបឧក្រិដ្ឋកម្ម និងលុបបំបាត់ជំរំតង់តាមដងផ្លូវ នៅក្នុងរដ្ឋធានីរបស់សហរដ្ឋអាមេរិក។

អ្នកនាំពាក្យសេតវិមាន លោកស្រី Karoline Leavitt ប្រាប់អ្នកយកព័ត៌មានដូច្នេះថា «បុគ្គលគ្មានផ្ទះសម្បែង នឹងត្រូវផ្តល់ជម្រើសឱ្យចាកចេញពីជំរំតង់របស់ពួកគេ ទៅកាន់មណ្ឌលស្នាក់នៅសម្រាប់អ្នកគ្មានផ្ទះសម្បែង ទទួលសេវាបន្សាបគ្រឿងញៀន ឬសេវាសុខភាពផ្លូវចិត្ត ហើយប្រសិនបើពួកគេបដិសេធ ពួកគេនឹងងាយទទួលការផាកពិន័យ ឬជាប់ពន្ធនាគារ»។

លោកស្រី Leavitt បានឱ្យដឹងទៀតថា រដ្ឋបាលកំពុងស្វែងរកយុទ្ធសាស្រ្ត ដើម្បីផ្លាស់ប្តូរទីលំនៅបុគ្គលគ្មានផ្ទះសម្បែង ឱ្យនៅឆ្ងាយពីរដ្ឋធានី ខណៈប៉ូលិសបានរុះរើតង់ចំនួន ៧០ ចេញពីឧទ្យានសហព័ន្ធ ចាប់តាំងពីខែមីនា ហើយគ្រោងបោសសម្អាតជំរំពីរដែលនៅសល់ នៅចុងសប្តាហ៍នេះ។

គួរបញ្ជាក់ថា ចំនួនប្រជាជនដែលគ្មានផ្ទះសម្បែងនៅទីក្រុងវ៉ាស៉ីនតោន មានចំនួន ៥ ៦១៦នាក់ កើនឡើង ១៤.១ភាគរយ បើប្រៀបធៀបនឹងឆ្នាំមុន។ការណ៍នេះបានធ្វើឱ្យវ៉ាស៉ីនតោន ក្លាយជាទីក្រុងមួយដែលមានប្រជាជនគ្មានផ្ទះសម្បែងច្រើនជាងគេ ក្នុងចំណោមទីក្រុងផ្សេងទៀតរបស់សហរដ្ឋអាមេរិក។ នេះបើយោងរបាយការណ៍ពីក្រសួងអភិវឌ្ឍលំនៅដ្ឋាន និងទីក្រុងអាមេរិក៕