ឯកឧត្តម ប៊ុន ច័ន្ទវណ្ណៈ ដឹកនាំគណៈកម្មការដើម្បីចុះត្រួតពិនិត្យនិងវាយតម្លៃ លើការងារស្ថាបនាផ្លូវក្រាលកៅស៊ូពីរជាន់ (DBST)

សៀមរាប៖នាព្រឹកថ្ងៃសុក្រ ១៤កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៨ ខែសីហា ឆ្នាំ២០២៥ ឯកឧត្តម ប៊ុន ច័ន្ទវណ្ណៈ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ប្ញទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដើម្បីចុះត្រួតពិនិត្យនិងវាយតម្លៃ លើការងារស្ថាបនាផ្លូវក្រាលកៅស៊ូពីរជាន់ (DBST) ចំនួន១ខ្សែ ប្រវែង ១៣ ២០០ម ទទឹង៧ម ចិញ្ចើមផ្លូវសងខាងក្រាលដីល្បាយក្រួស ទទឹងម្ខាងៗ១ម កម្រាស់០,២ម សាងសង់លូប្រអប់មុខមួយចំនួន ៣កន្លែង លូប្រអប់មុខមួយមានទ្វារទឹកចំនួន ២កន្លែង លូមូលមុខពីរចំនួន ៣កន្លែង លូមូលមុខមួយចំនួន ១២កន្លែង ជួសជុល និងពង្រីកបន្ថែមលូប្រអប់មានទ្វារទឹកចំនួន ១កន្លែង និងផ្លាកឈ្មោះផ្លូវចំនួន ២កន្លែង ស្ថិតនៅភូមិសង្កែ ឃុំស្នួល ទៅភូមិច្រនៀង ឃុំសែនសុខ ស្រុកក្រឡាញ់ ខេត្តសៀមរាប ដែលអនុវត្តដោយកងវិស្វកម្មតេជោ ហ៊ុន សែន សៀមរាប ប្រើប្រាស់ថវិកាជំពូក២១ ដោយមានការចូលរួមពីសំណាក់ប្រធាននាយកដ្ឋានផ្លូវលំជនបទ ក្រុមការងារ គ.ត.វ ក្រុមការងារមន្ទីរអភិវឌ្ឍន៍ជនបទខេត្តសៀមរាប តំណាងកងវិស្វកម្ម និងអាជ្ញាធរមូលដ្ឋានផងដែរ។

បន្ទាប់ពីបានចុះត្រួតពិនិត្យ និងប្រជុំពិភាក្សាជាមួយអ្នកទទួលការនិងអ្នកបច្ចេកទេសរួចមក គណៈកម្មការអន្តរក្រសួងបានឯកភាពទទួលយកវឌ្ឍនភាពការងារ១០០%លើគម្រោងខាងលើនេះ។

ទន្ទឹមនឹងនេះ គណៈកម្មការអន្តរក្រសួងបានណែនាំដល់អ្នកទទួលការឱ្យជួយថែផ្លូវនេះឱ្យបានដិតដល់ដើម្បីធានាថាផ្លូវនេះអាចប្រើប្រាស់បានយូរអង្វែងនិងបម្រើផលប្រយោជន៍ជូនប្រជាពលរដ្ឋ។