បុរស៤នាក់ ត្រូវបានប៉ូលិសចាប់ខ្លួន លើបទចោទប្រកាន់ប្រើប្រាស់យន្តហោះគ្មានមនុស្សបើក(ដ្រូន) ដើម្បីស្វែងរកគោលដៅងាយស្រួល មុនពេលគាស់ផ្ទះជួលរបស់ភ្ញៀវទេសចរបរទេស នៅលើកោះផៈង៉ាន់
បាងកក៖ បុរស៤នាក់ ត្រូវបានប៉ូលិសចាប់ខ្លួន លើបទចោទប្រកាន់ប្រើប្រាស់យន្តហោះគ្មានមនុស្សបើក(ដ្រូន) ដើម្បីស្វែងរកគោលដៅងាយស្រួល មុនពេលគាស់ផ្ទះជួលរបស់ភ្ញៀវទេសចរបរទេស នៅលើកោះផៈង៉ាន់។
បើតាមកាសែតថៃបាងកកប៉ុស្តិ៍ បានឱ្យដឹងថា ប៉ូលិសទេសចរណ៍ថៃ បានចាប់ខ្លួនជនជាតិមីយ៉ាន់ម៉ា៤នាក់ ដែលមានអាយុចន្លោះពី២៥ដល់៣០ឆ្នាំនៅផ្ទះជួលមិនបានចុះបញ្ជីមួយកន្លែង ក្នុងភូមិមូ៣ លើកោះផៈង៉ាន់ កាលពីវេលាម៉ោង៥:៣០នាទីល្ងាចថ្ងៃអង្គារទី២២កក្កដា។
ការចាប់ខ្លួននេះ ធ្វើឡើងបន្ទាប់ពីមានពាក្យបណ្តឹងព្រោងព្រាត អំពីករណីលួចជាញឹកញាប់នៅកន្លែងស្នាក់នៅរបស់អ្នកទេសចរនៅលើកោះដ៏ពេញនិយមនៃអ្នកទេសចរបរទេសមួយនេះ។
ជនសង្ស័យបានសារភាពថា ពួកគេបានប្រើប្រាស់ដ្រូន ដើម្បីឈ្លបយកការណ៍តាមផ្ទះជួលរបស់ភ្ញៀវទេសចរ ដោយស្វែងរកផ្ទះចាក់សោ និងរបស់មានតម្លៃដែលមិនមានមនុស្សនៅ។ ពេលរកឃើញមុខសញ្ញា ពួកគេក៏ចូលគាស់ផ្ទះភ្លាមៗ។ នេះបើតាមប្រភពពីសមត្ថកិច្ច។ លើសពីនេះ ជនជាប់ចោទបានសារភាពថា ពួកគេបានចំណាយប្រាក់ ដែលពួកគេរកបាន ដើម្បីប្រើប្រាស់ថ្នាំញៀន។
គួរបញ្ជាក់ថា ប៉ូលិសបានរកឃើញថ្នាំញៀនមេតំហ្វេតាមីន៦៦គ្រាប់ នៅក្នុងដៃជនសង្ស័យ៕
