ឯកឧត្ដម ឈៀង យ៉ាណារ៉ា អញ្ជើញចូលរួមក្នុងកិច្ចប្រជុំរដ្ឋមន្ត្រីនៃវេទិកានយោបាយជាន់ខ្ពស់ ឆ្នាំ២០២៥ ជាវេទិកាដ៏សំខាន់មួយរបស់អង្គការសហប្រជាជាតិ នៅទីក្រុងញូវយ៉ក
ភ្នំពេញ៖ កាលពីថ្ងៃទី២១កក្កដា ឆ្នាំ២០២៥ តំណាងប្រទេសកម្ពុជា ឯកឧត្ដម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី២នៃក្រុមប្រឹក្សាអភិវឌ្ឍន៍កម្ពុជា បានអញ្ជើញចូលរួមក្នុងកិច្ចប្រជុំរដ្ឋមន្ត្រីនៃវេទិកានយោបាយជាន់ខ្ពស់ ឆ្នាំ២០២៥ ជាវេទិកាដ៏សំខាន់មួយរបស់អង្គការសហប្រជាជាតិ (UN) នៅទីក្រុងញូវយ៉ក សហរដ្ឋអាម៉េរិក។
ក្នុងកិច្ចប្រជុំឯកឧត្ដម ឈៀង យ៉ាណារ៉ា បានបញ្ជាក់ប្រាប់អន្តរជាតិជាតំណាងជាន់ខ្ពស់នៃប្រទេសជាសមាជិកអង្គការសហប្រជាជាតិ តំណាងរបស់ប្រព័ន្ធអង្គការសហប្រជាជាតិ និងតួអង្គពាក់ព័ន្ធទាំងអស់ ពីកិច្ចខិតខំប្រឹងប្រែងរបស់រាជរដ្ឋាភិបាល និងប្រជាពលរដ្ឋកម្ពុជាក្នុងការអភិវឌ្ឍ ដោយបានផ្លាស់ប្ដូរមុខមាត់ប្រទេសដែលធ្លាប់ឆ្លងកាត់នូវសង្គ្រាមរ៉ាំរៃ ទៅជាប្រទេសមានសុខសន្តិភាពពេញលេញ និងសេចក្តីថ្លៃថ្នូរ។ លោកថា ទាំងអស់នេះ បានឆ្លុះបញ្ចាំងពីការប្តេជ្ញាចិត្តជាពិសេសរបស់កម្ពុជា ក្នុងការថែរក្សាសុខសន្តិភាព ការគោរពច្បាប់អន្តរជាតិ និងឈានទៅសម្រេចគោលដៅអភិវឌ្ឍប្រកបដោយចីរភាព។
ឯកឧត្ដម ឈៀង យ៉ាណារ៉ា បានគូសរំលេចបន្ថែមនៅចំពោះមុខ UN និងតំណាងមកពីប្រទេសជាសមាជិកទាំងអស់ ពីអភិក្រម និងការប្តេជ្ញាចិត្តមួយចំនួនរបស់កម្ពុជា ដែលឆ្លើយតបនឹងការចូលរួមសម្រេចរបៀបវារៈសកល រួមមាន៖ ការប្តេជ្ញាចិត្តលុបបំបាត់មេរោគ និងជំងឺអេដស៍, ការដាក់ចេញនូវគំនិតផ្តួចផ្តើមសម្រាប់ពង្រឹងភាពអង់អាចស្ត្រី, ការធ្វើពិពិធកម្មសេដ្ឋកិច្ច និងឌីជីថលនវានុវត្តន៍, ការពង្រឹងអភិបាលកិច្ចជលផល និងការលើកកម្ពស់ការសម្រេចចិត្តប្រកបដោយបរិយាប័ន្ន។
គួរជម្រាបថា កិច្ចប្រជុំរដ្ឋមន្ត្រីនៃវេទិកានយោបាយជាន់ខ្ពស់ឆ្នាំ២០២៥ ជាវេទិកាដ៏សំខាន់មួយរបស់អង្គការសហប្រជាជាតិ សម្រាប់តាមដាន និងត្រួតពិនិត្យវឌ្ឍនភាពនៃការអនុវត្តរបៀបវារៈ ឆ្នាំ២០៣០។ ប្រព្រឹត្តិទៅក្រោមមូលបទ «ស្តីពីការជំរុញដំណោះស្រាយផ្អែកលើសក្ខីកម្ម និងវិទ្យាសាស្ត្រប្រកបដោយចីរភាព និងបរិយាប័ន្ន ចំពោះរបៀបវារៈឆ្នាំ២០៣០» តំណាងជាន់ខ្ពស់នៃប្រទេសជាសមាជិក តំណាងរបស់ប្រព័ន្ធអង្គការសហប្រជាជាតិ ក៏ដូចជាតួអង្គពាក់ព័ន្ធ បានពិភាក្សាលើគោលនយោបាយសម្រាប់ពន្លឿនការអនុវត្តរបៀបវារៈឆ្នាំ២០៣០ និងបានឯកភាពគ្នាត្រួតពិនិត្យលម្អិតលើគោលដៅអភិវឌ្ឍប្រកបដោយចីរភាពសំខាន់ៗមួយចំនួនដូចជា៖ សុខភាពល្អ និងសុខុមាលភាព, សមភាពយេនឌ័រ, ការងារសមរម្យ និងកំណើនសេដ្ឋកិច្ច, ជីវិតក្រោមទឹក និងភាពជាដៃគូ៕
