អំពើហិង្សានៅភាគខាងត្បូងរបស់ប្រទេសថៃ ត្រូវបានគេរំពឹងថានឹងកើនឡើង បន្ទាប់ពីការព្យួរតំណែងរបស់នាយករដ្ឋមន្ត្រី លោកស្រី ផែថងថាន ឈិនៈវ័ត
បាងកក៖ បើតាមការព្រមានរបស់សមាជិកជាន់ខ្ពស់នៃក្រុមផ្តាច់ខ្លួន Barisan Revolusi Nasional ឬហៅកាត់យ៉ាងខ្លីថា BRN បានបញ្ជាក់ថា អំពើហិង្សានៅភាគខាងត្បូងរបស់ប្រទេសថៃ ត្រូវបានគេរំពឹងថានឹងកើនឡើងបន្ទាប់ពីការព្យួរតំណែងរបស់នាយករដ្ឋមន្ត្រី លោកស្រី ផែថងថាន ឈិនៈវ័ត ខណៈកិច្ចចរចាសន្តិភាពឥឡូវ មានភាពលំបាកខ្លាំងក្នុងការកោះប្រជុំ។
តំបន់ភាគខាងត្បូង សំដៅទៅលើខេត្តថៃជាប់ព្រំប្រឡត់ដែនជាមួយប្រទេសម៉ាឡេស៊ី មានប្រជាជនម៉ូស្លីមភាគច្រើនគឺ ប៉ាតានី យ៉ាឡា ស៊ុងក្លា និងណារ៉ាធីវ៉ាត ហើយមានប្រជាជនមួយចំនួនជាពុទ្ធសាសនិក បានជួបប្រទះនូវការកើនឡើងគួរឱ្យកត់សម្គាល់នៃឧប្បត្តិហេតុអំពើហិង្សាចាប់តាំងពីដើមឆ្នាំ២០២៥ បន្ទាប់ពីមានការជាប់គាំងកិច្ចចរចាសន្តិភាពរវាងរាជរដ្ឋាភិបាល និងក្រុម BRN។
តំបន់នេះ បានកត់ត្រាយ៉ាងហោចណាស់ឧប្បត្តិហេតុហិង្សាចំនួន២៣១៩១លើក ចាប់ពីខែមេសា ឆ្នាំ២០០៤ ដល់ថ្ងៃទី៣១ ខែឧសភា ឆ្នាំ២០២៥ បណ្ដាលឱ្យមនុស្សស្លាប់ចំនួន៧៧៣៦នាក់ និងរបួស១៤៦៣០នាក់។ នេះបើយោងតាមក្រុមឃ្លាំមើលអំពើហិង្សាឯករាជ្យ Deep South Watch។
សមាជិក BRN បានប្រាប់កាសែត Nikkei Asia ក្នុងបទសម្ភាសក្នុងលក្ខខណ្ឌសុំមិនបញ្ចេញឈ្មោះថា៖«ជាមួយនឹងការព្យួរតំណែងនាយករដ្ឋមន្ត្រី ការចរចាសន្តិភាពឥឡូវនេះនឹងមានការលំបាកខ្លាំងណាស់។ អំពើហិង្សានឹងកើនឡើង»។
ដោយ គ្មាន ការ ចរចា មេដឹកនាំ BRN អះអាង ថា ក្រុម ប្រដាប់ អាវុធ នឹង បន្ត ប្រយុទ្ធ ដើម្បី ឯករាជ្យភាព។ សមាជិក BRN បាននិយាយថា៖«ខ្ញុំចង់បានឯករាជ្យដែរ ហើយខ្ញុំក៏ចង់បានសន្តិភាពដែរ។ ខ្ញុំចង់ឱ្យអំពើហិង្សាបញ្ឈប់ ខណៈជនស៊ីវិលស្លូតត្រង់ជាច្រើនត្រូវបានសម្លាប់។ សម្រាប់ខ្ញុំ ការបង្ហូរឈាម គឺមានតម្លៃខ្ពស់»។ BRN ជា ក្រុម ប្រដាប់ អាវុធ ធំ បំផុត និង មាន ឥទ្ធិពល បំផុត នៅ ភាគ ខាង ត្បូង ប្រទេស ថៃ។ ក្រុម បះបោរ តូច មួយ ទៀត គឺ អង្គការ រំដោះ ប៉ាតានី។
គួររំឭកថា កិច្ចចរចាសន្តិភាពចុងក្រោយរវាងរដ្ឋាភិបាលថៃ និងតំណាង BRN បានធ្វើឡើងនៅពាក់កណ្តាលឆ្នាំ២០២៤។ ប្រទេស ម៉ាឡេស៊ី ធ្វើ ជា ម្ចាស់ ផ្ទះនៃជំនួបនោះ ខណៈរាជធានីគូឡាឡាំពួ រ បាន ជួយ សម្រួល ដល់ ការ ចរចា តាំង ពី ឆ្នាំ២០១៣។ មន្ត្រីសន្តិសុខថៃ បានប្រាប់កាសែត Nikkei ថា នឹងមិនមានកិច្ចចរចាសន្តិភាពទេ រហូតដល់ការបោះឆ្នោតជាតិថ្មី ត្រូវបានប្រារព្ធឡើង។
មន្ត្រី រូប នេះ រំពឹង ថា ការ បោះ ឆ្នោត នឹង ធ្វើ ឡើង ក្នុង រយៈ ពេល មួយ ទៅ ពីរ ឆ្នាំ។ កាលពីខែមេសា ឧបនាយករដ្ឋមន្ត្រីថៃ លោក ភូមិធម្ម វិជ្យៈឆ័យ បច្ចុប្បន្នជានាយករដ្ឋមន្ត្រីស្តីទី បានប្រកាសថា ការចរចាសន្តិភាពនឹងចាប់ផ្តើមឡើងវិញ លុះត្រាតែក្រុមបះបោរបញ្ឈប់ការវាយប្រហារ ហើយថារាជរដ្ឋាភិបាលនឹងនិយាយតែជាមួយមេដឹកនាំស្របច្បាប់របស់ BRN ប៉ុណ្ណោះ។
គួរជម្រាបជូនថា ខេត្តភាគខាងត្បូងប៉ាតានី យ៉ាឡា ស៊ុងក្លា និងណារ៉ាធីវ៉ាត់ គឺជាផ្នែកមួយនៃប្រទេសម៉ាឡេស៊ី មុនពេលត្រូវបានដណ្តើមយកដោយថៃនៅឆ្នាំ១៩០៩។ នៅឆ្នាំ១៩៦៣ BRN ត្រូវបានបង្កើតឡើងដោយលោក អាប់ឌុល ការីម ហាសាន់ (Abdul Karim Hassan) ហើយចាប់តាំងពីពេលនោះមក ក្រុមនេះបានធ្វើការបះបោរប្រដាប់អាវុធ ដើម្បីឯករាជ្យភាពពីការគ្រប់គ្រងរបស់ប្រទេសថៃ។
សមាជិក BRN បានទម្លាយឱ្យដឹងថា៖«បច្ចុប្បន្នមានសមាជិកប្រដាប់អាវុធសកម្មប្រហែល១៥០០នាក់នៅក្នុង BRN ដែលមានអាយុចន្លោះពី១៨ ទៅ៤០ឆ្នាំ ដោយបន្ថែមថាអាវុធរបស់ពួកគេភាគច្រើនត្រូវបានដណ្តើមបានពីជនជាតិថៃ»៕
