ឯកឧត្តមបណ្ឌិត ចាន់ ដារ៉ុង ដឹកនាំគណៈកម្មការអន្តរក្រសួងវាយតម្លៃគុណភាពការងារសាងសង់ ស្តារឡើងវិញ ជួសជុលថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ)

ពោធិ៍សាត់៖ នាព្រឹកថ្ងៃចន្ទ ៤រោច ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៤ ខែកក្កដា ឆ្នាំ២០២៥ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អមដំណើរដោយថ្នាក់ដឹកនាំ ក្រុមការងារបច្ចេកទេស នាយកដ្ឋានផ្លូវលំជនបទ គណៈកម្មការត្រួតពិនិត្យ និងវាយតម្លៃគុណភាពការងារសាងសង់ ស្តារឡើងវិញ ជួសជុលថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ) ថា្នក់ដឹកនាំ និងមន្រ្តីជំនាញរបស់មន្ទីរអភិវឌ្ឍន៍ជនបទខេត្តពោធិ៍សាត់ ចុះពិនិត្យ និងវាយតម្លៃដំណាក់កាលទី១ លើការងារថែទាំផ្លូវជាលក្ខណៈប្រចាំផ្លូវចំនួន ៨ខ្សែ សរុបប្រវែង ៨០ ៦០០ម៉ែត្រ អនុវត្តដោយមន្ទីរអភិវឌ្ឍន៍ជនបទខេត្តពោធិ៍សាត់ ដែលមានដូចខាងក្រោម៖

១. ផ្លូវក្រាលកៅស៊ូ DBST ចំនួន ៤ខ្សែ ប្រវែងសរុប ៤១ ៤០០ម៉ែត្រ ទទឹង ៥ម៉ែត្រ ៥,៥ម៉ែត្រ និង ៦ម៉ែត្រ ស្ថិតនៅត្នោតជុំ ឃុំផ្ទះរុង ឃុំតាលោ ឃុំកណ្តៀង ឃុំស្រែស្តុក ឃុំស្នាមព្រះ និងឃុំត្រពាំងជង ស្រុកក្រគរ ស្រុកតាលោសែនជ័យ ស្រុកកណ្តៀង និងស្រុកបាកាន ខេត្តពោធិ៍សាត់។

២. ផ្លូវក្រាលល្បាយក្រួស ចំនួន ៤ខ្សែ ប្រវែងសរុបចំនួន ៣៩ ២០០ម៉ែត្រ ទទឹង ៥ម៉ែត្រ ៦ម៉ែត្រ និង ៧ម៉ែត្រ ស្ថិតនៅឃុំកណ្តៀង ឃុំកោះជុំ ឃុំអន្លង់វិល ឃុំព្រងិល ឃុំឈើតុំ សង្កាត់បន្ទាយដី និងសង្កាត់ចំរើនផល ស្រុកកណ្តៀង ស្រុកក្រគរ និងស្រុកភ្នំក្រវាញ ខេត្តពោធិ៍សាត់។

បន្ទាប់ពីបានធ្វើការពិនិត្យរួចមក គណៈកម្មការអន្តរក្រសួង បានសម្រេចឯកភាពទទួលយកនូវការថែទាំផ្លូវជាលក្ខណៈប្រចាំខាងលើ ដោយបញ្ចប់ការថែទាំដំណាក់កាលទី១ ជាស្ថាបពរ៕