ឯកឧត្តម ប៉ុញ សច្ចៈ ដឹកនាំក្រុមការងារចុះពិនិត្យជាក់ស្តែងវឌ្ឍនភាពគម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ខេត្តបន្ទាយមានជ័យ

ភ្នំពេញ÷នៅថ្ងៃសុក្រ ៩កើត ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៤ ខែកក្កដា ឆ្នាំ ២០២៥ នេះ ឯកឧត្តម ប៉ុញ សច្ចៈ រដ្ឋលេខាធិការ ក្នុងនាមតំណាងដ៏ខ្ពងខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម បានបន្តដឹកនាំក្រុមការងារដែលរួមមាន មន្ត្រីពាក់ព័ន្ធគម្រោងកូរ៉េ ក្រុមការងារទីប្រឹក្សាបច្ចេកទេស ក្រុមហ៊ុនសាងសង់កូរ៉េ មន្ទីរធនធានទឹក និងឧតុនិយមខេត្តបន្ទាយមានជ័យ និងតំណាងសហគមន៍កសិករប្រើប្រាស់ទឹក ចុះពិនិត្យជាក់ស្តែងវឌ្ឍនភាពគម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ខេត្តបន្ទាយមានជ័យ ព្រមទាំងពិនិត្យស្ថានភាព និងពិភាក្សានៅលើទីតាំងផ្ទាល់ ដើម្បីដោះស្រាយបញ្ហារាំងស្ទះមួយចំនួន។

ក្នុងឱកាសនោះ ឯកឧត្តមរដ្ឋលេខាធិការ បានស្នើឱ្យក្រុមហ៊ុនសាងសង់ អាជ្ញាធរដែនដី និងមន្ទីរធនធានទឹក និងឧតុនិយមខេត្តបន្ទាយមានជ័យ បន្តសហការគ្នា ដើម្បីជំរុញ និងបង្កើនសកម្មភាពដោះស្រាយបញ្ហាប្រឈមមួយចំនួនឱ្យបានឆាប់រហ័ស ជាពិសេស ការកំណត់ទីតាំងបំពាក់ផ្ទាំងសូឡាតាមបណ្តាសំណង់ និងទីតាំងដើម្បីសាងសង់អគារសហគមន៍តាមបែបទំនើប ស្របតាមអនុសាសន៍ដ៏ខ្ពង់ខ្ពស់របស់ឯកឧត្តមរដ្ឋមន្រ្តីក្រសួងធនធានទឹក និងឧតុនិយម៕