នាយឧត្តមសេនីយ៍ផុតលេខផ្កាយមាស៥ ហ៊ុន សែន ប្រាប់ដល់បងប្អូនប្រជាពលរដ្ឋ ដែលជម្លៀសខ្លួននៅមណ្ឌលសុវត្ថិភាពខេត្តព្រះវិហារថា ព្រះមហាក្សត្រតែងតែនឹករលឹក និងគិតគួរដល់បងប្អូនជានិច្ច
ភ្នំពេញ៖ សម្តេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន អគ្គភស្តុភារជាន់ខ្ពស់នៃកងកម្លាំងប្រដាប់អាវុធ និងប្រធានព្រឹទ្ធសភា នៃព្រះរាជាណាចក្រកម្ពុជា បានប្រាប់ដល់បងប្អូនប្រជាពលរដ្ឋ ដែលបាន ជម្លៀសខ្លួននៅមណ្ឌលសុវត្ថិភាពខេត្តព្រះវិហារថា ព្រះករុណា ព្រះមហាក្សត្រនៃព្រះរាជាណាចក្រនៃយើង តែងតែនឹករលឹក និងគិតគួរដល់បងប្អូនជានិច្ច រួមទាំងបានផ្តល់នូវព្រះរាជអំណោយផ្ទាល់របស់ព្រះអង្គផងដែរជូនដល់បងប្អូនក៏ដូចជាវីរកងទ័ពជួរមុខផងដែរ។
ក្នុងឱកាសអញ្ជើញជួបសំណេះសំណាលសួរសុខទុក្ខប្រជាពលរដ្ឋដែលបានជម្លៀសដោយស្ម័គ្រចិត្តមកកាន់មណ្ឌលសុវត្ថិភាព នៅវត្តពោធិ៥០០០ដើម នៅខេត្តព្រះវិហារ នារសៀលថ្ងៃទី២៦ ខែមិថុនា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា នាយឧត្តមសេនីយ៍ផុតលេខ ផ្កាយមាស៥ បានលើកឡើងថា ថ្ងៃមុននាយករដ្ឋមន្រ្ដីមកដល់ទីនេះ, ឥឡូវនេះឪពុកនាយករដ្ឋមន្រ្ដីក៏បានមកដល់ទេនេះដែរ (មណ្ឌលសុវត្ថិភាព វត្តពោធិ៥០០០ដើមខេត្តព្រះវិហារ)»។
នាយឧត្តមសេនីយ៍ផុតលេខផ្កាយមាស៥ ហ៊ុន សែន បញ្ជាក់ថា បន្ទាប់ពីសម្ដេចអញ្ជើញមកដល់ខេត្តឧត្តរមានជ័យ និងខេត្តព្រះវិហារ និងបានជួបជាមួយបងប្អូនកងទ័ព និងប្រជាពលដ្ឋ ដែលជាជនភៀសសឹក សម្ដេចបានរលឹកដល់ទុក្ខវេទនាដែលកម្ពុជាធ្លាប់បានរងគ្រោះដោយសារសង្គ្រាម។
សម្ដេចអគ្គមហាសេនាបតីតេជោ នាយឧត្ដមសេនីយ៍ផុតលេខផ្កាយមាស ៥ ហ៊ុន សែន បន្តថាថ្ងៃមុន នាយករដ្ឋមន្ត្រី បានអញ្ជើញមកពិនិត្យ និងសួរសុខទុក្ខកងកម្លាំងប្រដាប់អាវុធ រួមទាំងប្រជាពលរដ្ឋនៅ ទីនេះ(ខេត្តព្រះវិហារ) ថ្ងៃនេះខ្ញុំឪពុកនាយករដ្ឋមន្ត្រី ក៏បានមកទីនេះ ដើម្បីពិនិត្យ និងសួរសុខទុក្ខកងកងកម្លាំងប្រដាប់អាវុធ រួមទាំងប្រជាពលរដ្ឋនៅទីនេះបន្ថែមទៀត៕
