ឯកឧត្តម ឈា ប៊ុនរិទ្ធ ចុះពិនិត្យស្ថានភាពទឹក និងការងារថែទាំប្រចាំប្រព័ន្ធធារាសាស្រ្ត ក្នុងភូមិសាស្រ្តខេត្តឧត្តរមានជ័យ
ភ្នំពេញ÷នៅថ្ងៃចន្ទ ១៣រោច ខែជេស្ឋ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៣ ខែមិថុនា ឆ្នាំ២០២៥ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម អមដំណើរដោយឯកឧត្តមអនុរដ្ឋលេខាធិការ លោកអគ្គនាយករងនៃអគ្គនាយកដ្ឋានកិច្ចការបច្ចេកទេស លោកប្រធាននាយកដ្ឋានធារាសាស្រ្តកសិកម្ម សហការជាមួយលោកប្រធានមន្ទីរធនធានទឹក និងឧតុនិយមខេត្តឧត្តរមានជ័យ ព្រមទាំងមន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តឧត្តរមានជ័យ បានអញ្ជើញចុះពិនិត្យស្ថានភាពទឹកនៅតាមអាងទឹកមួយចំនួន និងការងារថែទាំប្រចាំប្រព័ន្ធធារាសាស្រ្ត ក្នុងភូមិសាស្រ្តខេត្តឧត្តរមានជ័យ។
ក្នុងឱកាសនោះ ឯកឧត្តមរដ្ឋលេខាធិការប្រចាំការ និងក្រុមការងារ បានអញ្ជើញចុះពិនិត្យជាក់ស្តែងការងារថែទាំប្រព័ន្ធធារាសាស្ត្រចំនួន៥ ក្នុងស្រុកចុងកាល់ និងស្រុកបន្ទាយអំពិលគឺ៖ ទី១)ប្រព័ន្ធធារាសាស្ត្រស្ទឹងស្រែងជំហាន១ស្ថិតក្នុងស្រុកចុងកាល់ ទី២)ប្រព័ន្ធធារាសាស្ត្រចុងកាល់ ស្ថិតនៅឃុំចុងកាល់ ស្រុកចុងកាល់ ទី៣)ប្រព័ន្ធធារាសាស្ត្រស្ទឹងស្រែង២ ស្ថិតនៅឃុំពង្រ ស្រុកចុងកាល់ ទី៤)ប្រព័ន្ធធារាសាស្ត្រអូរអង្រ្គង ស្ថិតនៅឃុំគោកមន ស្រុកបន្ទាយអំពិល និង៥)ប្រព័ន្ធធារាសាស្ត្ររហាលសឹង្ហ ស្ថិតនៅឃុំគោកមន ស្រុកបន្ទាយអំពិល។
ឯកឧត្តមរដ្ឋលេខាធិការប្រចាំការ បានគូសបញ្ជាក់ថាការចុះពិនិត្យពេលនេះគឺតបតាមការណែនាំដ៏ខ្ពង់ខ្ពស់របស់ឯកឧត្តមរដ្ឋមន្ត្រី ដើម្បីជ្រើសរើសប្រព័ន្ធធារាសាស្ត្រដែលមានសក្តានុពលឱ្យទៅជាប្រព័ន្ធធារាសាស្រ្តមានលក្ខណៈពេញលេញ(Complete System)។ ឯកឧត្តមរដ្ឋលេខាធិការប្រចាំការ ក៏បានណែនាំដល់មន្រ្តីអនុវត្តគម្រោងនៃមន្ទីរធនធានទឹក និងឧតុនិយមខេត្តឧត្តរមានជ័យ ត្រូវបន្តយកចិត្តទុកដាក់លើការងារថែទាំប្រចាំប្រព័ន្ធធារាសាស្រ្តឱ្យបានត្រឹមត្រូវទៅតាមបទដ្ឋានបច្ចេកទេស ដើម្បីធានាបាននូវនិរន្តរភាព និងការប្រើប្រាស់យូរអង្វែង៕ 
