ឯកឧត្តម ប្រាក់ សុខយូរ អញ្ជើញប្រកាសការកែសម្រួលសមាសភាព និងជួបសំណេះសំណាលជាមួយ ថ្នាក់ដឹកនាំ សមាជិក សមាជិកា យុវជនគណបក្សក្រសួងសង្គមកិច្ច អតីតយុទ្ធជន និងយុវនីតិសម្បទា

ភ្នំពេញ៖នាថ្ងៃទី២៤ ឧសភា ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ជា សុមេធី សមាជិកគណៈកម្មាធិការកណ្ដាល និងជាប្រធានគណៈកម្មារធិការគណបក្សក្រសួង ស.អ.យ ឯកឧត្តម ប្រាក់ សុខយូរ សមាជិកគណៈកម្មាធិការកណ្ដាល និងជាប្រធានយុវជនគណបក្សប្រជាជនកម្ពុជាក្រសួង ស.អ.យ បានអញ្ជើញជាអធិបតីក្នុងពិធីប្រកាសការកែសម្រួលសមាសភាព យុវជនគណបក្សក្រសួង ស.អ.យ និងជួបសំណេះសំណាលជាមួុយ ថ្នាក់ដឹកនាំ សមាជិក សមាជិកា យុវជនគណបក្សក្រសួងសង្គមកិច្ច អតីតយុទ្ធជន និងយុវនីតិសម្បទា ចំនួន ១៥៦ រូប ។

ឯកឧត្តម ប្រាក់ សុខយូរ សមាជិកគណៈកម្មាធិការកណ្ដាល និងជាប្រធានយុវជនគណបក្សក្រសួង ស.អ.យ បានផ្ដល់អនុសាសន៍សំខាន់ៗដូចខាងក្រោម៖ ១) បន្តចូលរួមថែរក្សាសុខសន្តិភាព ស្ថិរភាពនយោបាយ ២) ពង្រឹង និងថែរក្សាឲ្យបានរឹងមាំនូវសាមគ្គីភាព ឯកភាពផ្ទៃក្នុង គោលជំហរ នយោបាយ សតិអារម្មណ៍ ៣) តស៊ូប្តូរផ្តាច់ ដើម្បីធ្វើឱ្យបរាជ័យនូវរាល់ឧបាយកល និងសកម្មភាពបំបែកបំបាក់សាមគ្គីជាតិ របស់ក្រុមប្រឆាំង មជ្ឈដ្ឋានអមិត្តទាំងក្នុង និងក្រៅប្រទេស និង៤) បន្តខិតខំធ្វើអំពើល្អ ក្នុងនាមជាមន្រ្តីរាជការ ក៏ដូចជា មន្រ្តីគណបក្ស ដែលមានគុណភាព សីលធម៌ សុជីវធម៌ និងប្រកបដោយវិជ្ជាជីវៈខ្ពស់ ក្នុងការបម្រើការងារ ។

ជាចុងក្រោយ មុននឹងបញ្ចប់ ឯកឧត្តមប្រធាន បានធ្វើការថ្លែងអំណរគុណដល់ ថ្នាក់ដឹកនាំ សមាជិក សមាជិកា យុវជនគណបក្សទាំងអស់ ដែលបានចំណាយពេលដ៏មានតម្លៃអញ្ជើញចូលរួម និងសូមជូនពរមានសុខភាពល្អ កម្លាំងពលំមាំមួន ប្រាជ្ញារវាងវៃ និងសូមប្រកបដោយពុទ្ធពរទាំង បួនប្រការ កុំបីឃ្លៀងឃ្លាតឡើយ ។