អង្គសន្និបាតយុវជនគណបក្សប្រជាជនកម្ពុជា សម្តែងនូវការដឹងគុណយ៉ាងជ្រាលជ្រៅចំពោះសមាជិក សមាជិកាយុវជនគណបក្សគ្រប់រូប និងយុវជនកម្ពុជាគ្រប់ទិសទី ដែលមានការជឿជាក់ និងគាំទ្រយ៉ាងមុតមាំដល់ការដឹកនាំរបស់គណបក្សប្រជាជនកម្ពុជា

ភ្នំពេញ៖ សន្និបាតបូកសរុបលទ្ធផលការងារឆ្នាំ២០២៤ និងទិសដៅការងារបន្តរបស់យុវជនគណបក្ស ប្រជាជនកម្ពុជា បានប្រព្រឹត្តទៅនាថ្ងៃទី២៦ ខែមេសា ឆ្នាំ២០២៥ (ពេញមួយថ្ងៃ) នៅទីស្នាក់ការកណ្តាល គណបក្សប្រជាជនកម្ពុជា(វិមាន ៧មករា) ក្រោមអធិបតីភាពដ៏ខ្ពង់ខ្ពស់បំផុត សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល។

សមាសភាពចូលរួមក្នុងសន្និបាត រួមមាន តំណាងគណៈកម្មាធិការគណបក្សក្រសួង ស្ថាប័ន រាជធានី ខេត្ត ថ្នាក់ដឹកនាំ សមាជិក សមាជិកា អង្គការចាត់តាំងយុវជនគណបក្សចាប់ពីថ្នាក់កណ្តាល រហូតដល់ ថ្នាក់ក្រុង ស្រុក ខណ្ឌ ក្រុមការងាររៀបចំអង្គការចាត់តាំងយុវជនគណបក្សតាមបណ្តាប្រទេស និងទ្វីប ក្រុមជំនួយការយុវជនគណបក្សថ្នាក់កណ្តាល និងអង្គការយុវជនគាំទ្រគណបក្ស សរុបចំនួន ៣៦១១រូប។

អង្គសន្និបាតបានប្រព្រឹត្តទៅតាមរបៀបវារៈ ដែលបានកំណត់ ក្នុងស្មារតីសាមគ្គីភាព ប្រជាធិបតេយ្យ ឯកភាពផ្ទៃក្នុង និងការទទួលខុសត្រូវខ្ពស់។

នៅក្នុងរយៈពេលពេញមួយថ្ងៃនេះ អង្គសន្និបាតបានពិភាក្សា និងអនុម័តរបាយការណ៍ បូកសរុប លទ្ធផលការងារឆ្នាំ២០២៤ និងទិសដៅការងារបន្ត របស់យុវជនគណបក្សប្រជាជនកម្ពុជា ព្រមទាំងបានជ្រួតជ្រាបយ៉ាងស៊ីជម្រៅនូវមតិដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល ដែលបានផ្តល់នូវ អនុសាសន៍សំខាន់ៗដល់យុវជនគណបក្សគ្រប់ថ្នាក់ គ្រប់ផ្នែក ទាំងក្នុង និងក្រៅប្រទេស ឱ្យបន្តយកចិត្ត ទុកដាក់ខ្ពស់លើការងារមួយចំនួន ដើម្បីជំរុញការយល់ដឹងឱ្យកាន់តែច្បាស់ស៊ីជម្រៅ និងអនុវត្តប្រកប ដោយប្រសិទ្ធភាព។

អង្គសន្និបាតបានសម្តែងនូវការដឹងគុណយ៉ាងជ្រាលជ្រៅបំផុតចំពោះសមាជិក សមាជិកាយុវជន គណបក្សគ្រប់រូប និងយុវជនកម្ពុជាគ្រប់ទិសទី ដែលមានការជឿជាក់ និងគាំទ្រយ៉ាងមុតមាំដល់ការ ដឹកនាំរបស់គណបក្សប្រជាជនកម្ពុជារយៈពេល ៤៦ឆ្នាំ កន្លងមកនេះ ធ្វើឱ្យគណបក្សមានលទ្ធភាព ពេញលេញក្នុងការបម្រើជាតិ និងប្រជាជនសម្រេចបានលទ្ធផលល្អប្រសើរគ្រប់ផ្នែក។

អង្គសន្និបាតក៏បានសម្តែងការកោតសរសើរ និងវាយតម្លៃខ្ពស់ចំពោះអង្គការចាត់តាំងយុវជន គណបក្សគ្រប់ថ្នាក់ គ្រប់ផ្នែកទាំងក្នុង និងក្រៅប្រទេស និងសមាជិក សមាជិកាយុវជនគណបក្សគ្រប់រូប ដែលបានរួមសាមគ្គីគ្នាយ៉ាងរឹងមាំយកអស់កម្លាំងកាយ កម្លាំងចិត្ត ខិតខំចូលរួមជាមួយគណៈកម្មាធិការ គណបក្សថ្នាក់ខ្លួនក្នុងការអនុវត្ត កម្មវិធីនយោបាយ គោលនយោបាយ និងសេចក្តីសម្រេចចិត្តនានា របស់គណបក្ស និងយុវជនគណបក្សឱ្យសម្រេចបានលទ្ធផលល្អលើគ្រប់ផ្នែក៕