ភ្នំពេញ៖ នៅពេលតាមបណ្ដាមូលដ្ឋានមួយចំនួនជាពិសេសទីប្រជុំជន ក្នុងនោះក៏មាននៅរាជធានីភ្នំពេញ យុវជនជាបន្តបន្ទាប់បានចាប់ផ្ដើមលេងគប់ទឹក ប៉ាតម្សៅដែលជាសកម្មភាពពុំគួរគប្បី ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខិតជិតចូលមកនោះ លោក ទូច សុឃៈ អ្នកនាំពាក្យរងក្រសួងមហាផ្ទៃ បានក្រើនរម្លឹកដល់ក្រុមយុវវ័យទាំងនោះ ឱ្យប្រយ័ត្ន៣ គឺ ក្នុងពេល និងក្រោយពេលចូលឆ្នាំ កុំធ្វើសកម្មភាពជ្រុលហេតុនាំឱ្យប៉ះពាល់ដល់សិទ្ធិអ្នកដទៃ និងសណ្ដាប់ធ្នាប់សាធារណៈ ជាពិសេសសូមប្រយ័ត្នសកម្មភាពមួយចំនួនដែលអាចក្លាយខ្លួនជាក្មេងទំនើង ក្មេងទំនើងដែលនឹងត្រូវបានចាប់បញ្ជូនខ្លួនទៅតុលាការផ្តន្ទាទោស និងប្រឈមនឹងការជាប់ពន្ធនាគារ។
លោក ទូច សុឃៈ បានផ្ញើសារក្រើនរម្លឹកទៅដល់ក្រុមយុវវ័យទាំងនោះឱ្យប្រយ័ត្ន៣យ៉ាង រួមមាន ប្រយ័ត្នទី១ ប្រយ័ត្នមិនបានចូលឆ្នាំ ប្រយ័ត្នទី២ ប្រយ័ត្នចូលឆ្នាំមិនចប់ និងប្រយ័ត្នទី៣ ប្រយ័ត្នចូលឆ្នាំហើយចូលការិយាល័យនគរបាលព្រហ្មទណ្ឌ (CID)។
លោកបន្តថា ប្រយ័ត្នទី១ ប្រយ័ត្នមិនបានចូលឆ្នាំ យុវជន ឬយុវវ័យសូមកុំប្រព្រឹត្តអំពើល្មើស ឬបទល្មើស ឬបង្ករឿងដែលចូលទៅក្នុងរឿងព្រហ្មទណ្ឌ ដូចជាករណី បង្កហិង្សា កាប់បំផ្លាញទ្រព្យសម្បត្តិ ការលួច ឆក់ ប្លន់ សេពគ្រឿងញៀន ជួញដូរគ្រឿងញៀន ការដាក់អាវុធ ឬឧបករណ៍ដែលនាំឱ្យគ្រោះថ្នាក់ សកម្មភាពទាំងនេះហើយដែលនគរបាលព្រហ្មទណ្ឌនឹងចាត់វិធានការតាមផ្លូវច្បាប់។
លោកបន្ថែមថា ជាទូទៅពិធីបុណ្យចូលឆ្នាំមានរយៈពេល៣ថ្ងៃ ក៏ប៉ុន្តែនៅតាមតំបន់និគម ដទៃទៀតអាចអូសបន្លាយរហូតទៅដល់៥ថ្ងៃ។ ដូចនេះប្រយ័ត្នទី២នេះគឺ ប្រយ័ត្នចូលឆ្នាំមិនចប់ មានន័យថាពេលចូលឆ្នាំបងប្អូន យុវវ័យ យុវជនទាំងអស់កុំប្រព្រឹត្តបទល្មើស កុំបើកបរប្រណាំងប្រជែង បង្កើតជាបក្ខជាពួក កុំបង្ហោះម៉ូតូពេលចូលឆ្នាំ និងប្រយ័ត្នគ្រោះថ្នាក់ចរាចរណ៍កើតមានឡើងពេលចូលឆ្នាំផងដែរ។ ប្រយ័ត្នចុងក្រោយ គឺប្រយ័ត្នចូលឆ្នាំហើយចូលការិយាល័យនគរបាលព្រហ្មទណ្ឌ មានន័យថា ចូលឆ្នាំចប់រាល់ការល្បែងផ្សេងៗគឺត្រូវបញ្ចប់ ជាពិសេសការប៉ាតម្សៅ ជះទឹកតែម្ដង។ ប្រសិនបើហួសរយៈពេលនៃពិធីបុណ្យចូលឆ្នាំហើយយើងនៅតែប្រព្រឹត្តទៀត នោះនគរបាលព្រហ្មទណ្ឌនឹងចាត់នីតិវិធីតាមផ្លូវច្បាប់ ។
លោកក៏បានទទូចឱ្យក្រុមយុវជនដែលចង់ជួបជុំលេងកម្សាន្តក្នុងឱកាសពិធីបុណ្យចូលឆ្នាំថ្មីជិតចូលមកដល់នោះ គប្បីលេងល្បែងប្រជាប្រិយខ្មែរ និងលេងអ្វីដែលមិនធ្វើឱ្យប៉ះពាល់សេចក្ដីថ្លៃថ្នូរអ្នកដទៃ ឬឆ្លៀតឱកាសបៀតបៀនអ្នកដទៃ ដែលធ្វើឱ្យបាត់បង់សណ្ដាប់ធ្នាប់សាធារណៈ។
លោកបញ្ជាក់ថា ប្រសិនបើមានក្រុមយុវជនទាំងអស់នោះ ធ្វើសកម្មភាពជ្រុលហួសដែនកំណត់ច្បាប់ ពួកគេអាចនឹងឋិតក្នុងពន្ធនាគារស្របពេលដែលយុវជនផ្សេងទៀតកំពុងលេងកម្សាន្តសប្បាយតាមប្រពៃណី ទំនៀមទម្លាប់ និងប្រកដបដោយភាពថ្លៃថ្នូរនោះ គឺលេងសប្បាយរហូតដល់ពេលចូលឆ្នាំថ្មី។
លោកបន្ថែមទៀតថា អាជ្ញាធរមានសមត្ថកិច្ចនឹងចាត់វិធានការចំពោះប្អូនៗ យុវវ័យ ឬបុគ្គលណាដែលប្រព្រឹត្តខុសនឹងច្បាប់ ក្នុងនោះ សមត្ថកិច្ចក្នុងក្របខណ្ឌក្រសួងមហាផ្ទៃបានរៀបចំនូវផែនការរួចជាស្រេច តាំងពីថ្នាក់អគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានី ខេត្ត អធិការដ្ឋានក្រុង ស្រុក ខណ្ឌ ប៉ុស្ដិ៍នគរបាលរដ្ឋបាលឃុំ សង្កាត់ និងបូករួមនឹងកម្លាំងថ្នាក់ជាតិបន្ថែមទៀត ដើម្បីរក្សាសន្តិសុខ សណ្ដាប់ធ្នាប់សាធារណៈ រៀបចំលំហូរចរាចរណ៍ផ្សេងៗ និងដើម្បីអន្តរាគមន៍ បង្ការជាបន្ទាន់ក្នុងករណីបុគ្គលណាល្មើសនឹងច្បាប់ដែលធ្វើឱ្យប៉ះពាល់វិធីបុណ្យជាតិ និងសន្តិសុខជាតិ។
លោកក៏បានអំពាវនាវជាថ្មីម្ដងទៀត ឱ្យយុវជនទាំងអស់បើកបរឱ្យបានត្រឹមត្រូវ កុំវ៉ាជែង កុំបង្ហោះ មានកញ្ចក់ ពាក់មួកសុវត្ថិភាព គោរពច្បាប់ចរាចរណ៍ សិក្សាស្វែងយល់ពីច្បាប់ចរាចរណ៍ និងបើមានជួបជុំលេងកម្សាន្តនៅតាមបណ្ដាគ្រឹះស្ថានរដ្ឋ និងឯកជនសូមឱ្យលេងឋិតក្នុងស្ថានភាពដែលអាចទទួលយកបាន និងប្រកាន់ខ្ជាប់ដោយក្រមសីលធម៌ សុជីវធម៌ និងការយោគយល់ អធ្យាស្រ័យឱ្យគ្នាទោវិញទៅមក នាឱកាសពិធីបុណ្យចូលឆ្នាំថ្មីខិតជិតមកដល់៕
