កូរ៉េខាងត្បូង កំពុងទប់ស្កាត់ភ្លើងឆេះព្រៃដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍
សេអ៊ូល៖ កូរ៉េខាងត្បូងកំពុងប្រយុទ្ធនឹងភ្លើងឆេះព្រៃដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍។ ចំនួនអ្នកស្លាប់នៅក្នុងភ្លើងឆេះព្រៃដែលកំពុងឆាបឆេះយ៉ាងសន្ធោសន្ធៅនៅទូទាំងតំបន់ភាគអាគ្នេយ៍របស់ប្រទេស បានកើនឡើងដល់ ២៤នាក់។
ភ្លើងឆេះព្រៃដ៏សាហាវបានរីករាលដាលយ៉ាងឆាប់រហ័ស ហើយបានបង្ខំមនុស្សជាង ២៧.០០០នាក់ជម្លៀសចេញពីផ្ទះរបស់ពួកគេ។ ភ្លើងឆេះដែលបណ្តាលមកពីខ្យល់បក់ខ្លាំង និងអាកាសធាតុស្ងួតបានឆាបឆេះសង្កាត់ទាំងមូល សាលារៀនបិទទ្វារ និងបង្ខំឱ្យអាជ្ញាធរផ្ទេរអ្នកទោសរាប់រយនាក់ចេញពីពន្ធនាគារ។
ប្រធានាធិបតីស្តីទី លោក ហាន ដុកសូ និយាយថា ភ្លើងឆេះគឺអាក្រក់បំផុតដែលប្រទេសបានជួបប្រទះក្នុងប៉ុន្មានឆ្នាំថ្មីៗនេះ និងបណ្តាលឱ្យមានការខូចខាតដែលមិនធ្លាប់មានពីមុនមក។ លោកបន្តថា៖«យើងកំពុងដាក់ពង្រាយបុគ្គលិក និងឧបករណ៍ដែលមានទាំងអស់ ដើម្បីឆ្លើយតបទៅនឹងភ្លើងឆេះព្រៃដ៏អាក្រក់បំផុតមិនធ្លាប់មាន ប៉ុន្តែស្ថានការណ៍មិនល្អទេ! ខណៈយោធាសហរដ្ឋអាម៉េរិកនៅក្នុងប្រទេសកូរ៉េ ក៏កំពុងជួយផងដែរ»។
សេវាព្រៃឈើកូរ៉េ បង្ហាញថា មនុស្ស២៤នាក់ត្រូវបានគេបញ្ជាក់ថាបានស្លាប់ ក្នុងគ្រោះថ្នាក់នេះ។ លោក ស៊ុន ឆាងហូ មន្ត្រីប៉ូលិសក្នុងតំបន់បាននិយាយថា អ្នកស្លាប់ភាគច្រើនជាមនុស្សចាស់ក្នុងវ័យ៦០ និង៧០ឆ្នាំ។ សេវាព្រៃឈើ ក៏បានបញ្ជាក់ផងដែរថា ឧទ្ធម្ភាគចក្រពន្លត់អគ្គិភ័យមួយគ្រឿងរបស់ខ្លួនបានធ្លាក់ ខណៈព្យាយាមពន្លត់ភ្លើង ហើយអ្នកបើកបរបានបាត់បង់ជីវិត។ កូរ៉េខាងត្បូង ពឹងផ្អែកលើឧទ្ធម្ភាគចក្រ ដើម្បីដោះស្រាយភ្លើងឆេះព្រៃស្ថិតនៅតំបន់ភ្នំ ដោយឧបទ្ទវហេតុនេះនាំទៅដល់ការចុះចតជាបន្ទាន់នៃឧទ្ធម្ភាគចក្រពន្លត់អគ្គិភ័យ។
លោក លី យ៉ុងឌូ អ្នកជំនាញខាងគ្រោះមហន្តរាយព្រៃឈើនៅវិទ្យាស្ថានជាតិវិទ្យាសាស្ត្រព្រៃឈើនិយាយថា អណ្តាតភ្លើងនៅទីក្រុងអ៊ូអ៊ិសឹង ត្រូវបានពន្លត់តែ៦៨ភាគរយប៉ុណ្ណោះ តែវារីករាលដាលកាន់តែធ្ងន់ធ្ងរដោយខ្យល់បក់ខ្លាំង ធ្វើឱ្យអណ្តាតភ្លើងនេះមានទំហំ និងល្បឿនមិននឹកស្មានដល់។ លោកបានប្រាប់ទីភ្នាក់ងារសារព័ត៌មានរ៉យទ័រថា៖«យើងត្រូវតែទទួលស្គាល់ថា ភ្លើងឆេះព្រៃទ្រង់ទ្រាយធំនឹងកើនឡើង ហើយយើងត្រូវការធនធាន និងកម្លាំងមនុស្សដែលត្រូវបានបណ្តុះបណ្តាលបន្ថែមទៀត»។
ទីភ្នាក់ងារអាកាសធាតុបានព្យាករថា នឹងមានភ្លៀងធ្លាក់ពាសពេញប្រទេសនៅថ្ងៃព្រហស្បតិ៍នេះ ទោះបីជាមានការរំពឹងទុកត្រឹមតែពី៥ទៅ១០មីលីម៉ែត្រនៅក្នុងតំបន់ដែលរងគ្រោះដោយភ្លើងក៏ដោយ។ អ្នកពន្លត់អគ្គិភ័យជាង១ម៉ឺននាក់កំពុងត្រូវបានដាក់ពង្រាយនៅក្នុងតំបន់ចំនួនបួនដាច់ដោយឡែកពីគ្នាកាលពីថ្ងៃពុធ រួមទាំងមន្រ្តីប៉ូលិស និងអង្គភាពយោធារាប់រយនាក់ ខណៈឧទ្ធម្ភាគចក្រចំនួន៨៧គ្រឿងកំពុងត្រូវបានប្រើប្រាស់។
គួររំឭកថា ភ្លើងបានចាប់ផ្តើមឆាបឆេះកាលពីចុងសប្តាហ៍មុន ហើយកំពុងគំរាមកំហែងដល់តំបន់បេតិកភណ្ឌពិភពលោកជាច្រើនរបស់អង្គការយូណេស្កូ ខណៈអាជ្ញាធរបានបាញ់ថ្នាំការពារភ្លើង ដើម្បីព្យាយាមការពារទ្រព្យសម្បត្តិទាំងនោះ។ អណ្ដាតភ្លើងបានឆាបឆេះប្រាសាទហ្គូនសា ដែលត្រូវបានសាងសង់ក្នុងឆ្នាំ៦៨១។ រដ្ឋាភិបាលបានកំណត់តំបន់រងផលប៉ះពាល់ជាតំបន់គ្រោះមហន្តរាយពិសេស ហើយថា ភ្លើងបានបំផ្លាញផ្ទៃដីជាង ១៥០០០ហិកតា។
