គណៈប្រតិភូអ៊ុយក្រែន និងសហរដ្ឋអាម៉េរិកបានជួបពិភាក្សា នូវសំណើដើម្បីការពាររោងចក្រថាមពល និងហេដ្ឋារចនាសម្ព័ន្ធសំខាន់ៗពីការវាយប្រហារ
កៀវ៖ លោក រ៉ូសស្តិម អ៊ូមើរូវ រដ្ឋមន្ត្រីការពារជាតិអ៊ុយក្រែនបានឱ្យដឹងថា គណៈប្រតិភូអ៊ុយក្រែន និងសហរដ្ឋអាម៉េរិកបានជួបពិភាក្សាកាលពីថ្ងៃអាទិត្យទី២៣ ខែមីនា នូវសំណើដើម្បីការពាររោងចក្រថាមពល និងហេដ្ឋារចនាសម្ព័ន្ធសំខាន់ៗពីការវាយប្រហារ ដែលជាផ្នែកមួយនៃការជំរុញការទូតដោយប្រធានាធិបតីអាម៉េរិក លោក ដូណាល់ ត្រាំ បញ្ចប់សង្គ្រាមរ៉ាំរ៉ៃនៅអឺរ៉ុបខាងកើត។
កិច្ចប្រជុំនៅប្រទេសអារ៉ាប៊ីសាអូឌីត ដែលធ្វើឡើងមុនកិច្ចចរចានៅថ្ងៃចន្ទទី២៤ ខែមីនា រវាងគណៈប្រតិភូអាម៉េរិក និងរុស្ស៊ី បានធ្វើឡើង ខណៈដែលបេសកជនពិសេសរបស់សហរដ្ឋអាម៉េរិក លោក ស្ទីវ វិតខហ្វ បានសម្ដែងសុទិដ្ឋិនិយមអំពីឱកាសនៃការបញ្ចប់ជម្លោះដ៏សាហាវបំផុតរបស់អឺរ៉ុប ចាប់តាំងពីសង្គ្រាមលោកលើកទីពីរ។
លោក វិតខហ្វ បានប្រាប់ប៉ុស្តិ៍ទូរទស្សន៍ Fox News កាលពីថ្ងៃអាទិត្យថា៖«ខ្ញុំមានអារម្មណ៍ថា (ប្រធានាធិបតីរុស្ស៊ី វ្ល៉ាឌីមៀ ពូទីន) ចង់បានសន្តិភាព។ ខ្ញុំគិតថាអ្នកនឹងឃើញនៅប្រទេសអារ៉ាប៊ីសាអូឌីតនៅថ្ងៃចន្ទនូវវឌ្ឍនភាពពិតប្រាកដមួយចំនួន ជាពិសេសពាក់ព័ន្ធនឹងបទឈប់បាញ់នៅសមុទ្រខ្មៅ។ ហើយ ចាប់ពី នោះ វា នឹង ក្លាយ ទៅ ជាបទ ឈប់ បាញ់ពេញ លេញ»។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បាននិយាយនៅក្នុងសេចក្ដីថ្លែងការណ៍តាមទូរទស្សន៍ថា៖«កិច្ចពិភាក្សាកាលពីថ្ងៃអាទិត្យមានលក្ខណៈស្ថាបនា ដោយបន្ថែមថា ការសន្ទនាពិតជាមានប្រយោជន៍ ការងាររបស់គណៈប្រតិភូរបស់អ៊ុយក្រែនកំពុងបន្ត»។
លោកបន្តថា ប៉ុន្តែមិនថាយើងនិយាយអ្វីទៅកាន់ដៃគូរបស់យើងនៅថ្ងៃនេះទេ យើងត្រូវឱ្យលោក ពូទីន ចេញបញ្ជាពិតប្រាកដដើម្បីបញ្ឈប់ការវាយប្រហារ។ គណៈប្រតិភូអ៊ុយក្រែនត្រូវបានដឹកនាំដោយរដ្ឋមន្ត្រីការពារជាតិ ដែលបាននិយាយថាគោលបំណងនៃទំនាក់ទំនងបែបនេះគឺជួយនាំមកនូវសន្តិភាពកាន់តែកៀក និងពង្រឹងសន្តិសុខ។
លោក ពូទីន បានយល់ព្រមកាលពីសប្តាហ៍មុនចំពោះសំណើរបស់លោក ត្រាំ សម្រាប់ប្រទេសរុស្ស៊ី និងអ៊ុយក្រែន ដើម្បីបញ្ឈប់ការវាយប្រហារលើហេដ្ឋារចនាសម្ព័ន្ធថាមពលរបស់គ្នាទៅវិញទៅមករយៈពេល៣០ ថ្ងៃ។ យ៉ាងណាមិញ ភាគីទាំងពីរនៅតែបន្តវាយប្រហារគ្នាជាបន្តបន្ទាប់។
មន្ត្រីអ៊ុយក្រែនបានឱ្យដឹងកាលពីថ្ងៃអាទិត្យថា ការវាយប្រហារដោយយន្តហោះគ្មានមនុស្សបើករបស់រុស្ស៊ីទ្រង់ទ្រាយធំលើរដ្ឋធានីកៀវពេញមួយយប់បានសម្លាប់មនុស្សយ៉ាងហោចណាស់៣ នាក់ រួមទាំងកុមារអាយុ៥ ឆ្នាំ បណ្តាលឱ្យមានអគ្គីភ័យនៅក្នុងអគារផ្ទះល្វែងខ្ពស់ៗ និងការខូចខាតទូទាំងរដ្ឋធានី។
ទន្ទឹមនឹងនេះ អាជ្ញាធររុស្ស៊ីបានឱ្យដឹងកាលពីថ្ងៃអាទិត្យថា ប្រព័ន្ធការពារដែនអាកាសរបស់ពួកគេបានបំផ្លាញយន្តហោះគ្មានមនុស្សបើករបស់អ៊ុយក្រែនចំនួន៥៩ គ្រឿង ដែលតម្រង់ទៅលើតំបន់ភាគនិរតីរបស់ប្រទេសនេះ ដោយបន្ថែមថា ការវាយប្រហារនេះបានសម្លាប់មនុស្សម្នាក់នៅក្នុងទីក្រុងរ៉ូស្តូវ។
ទីភ្នាក់ងារព័ត៌មាន Bloomberg បានរាយការណ៍កាលពីថ្ងៃអាទិត្យថា សហរដ្ឋអាម៉េរិកសង្ឃឹមថានឹងឈានដល់បទឈប់បាញ់ដ៏ទូលំទូលាយមួយក្នុងរយៈពេលប៉ុន្មានសប្តាហ៍ខាងមុខ ដោយកំណត់គោលដៅលើការចុះកិច្ចព្រមព្រៀងបទឈប់បាញ់នៅថ្ងៃទី២០ ខែមេសា។
ទីប្រឹក្សាសន្តិសុខជាតិរបស់សេតវិមាន លោក មៃ វ៉ាល់ស៍ (Mike Waltz) បាននិយាយកាលពីថ្ងៃអាទិត្យថា សហរដ្ឋអាម៉េរិកកំពុងជជែកពិភាក្សាតាមរយៈវិធានការកសាងទំនុកចិត្តជាច្រើនក្នុងគោលបំណងបញ្ចប់សង្រ្គាម រួមទាំងអនាគតរបស់កុមារអ៊ុយក្រែនដែលត្រូវបានយកទៅក្នុងប្រទេសរុស្ស៊ី៕
