អភិបាលខេត្តពោធិ៍សាត់ និងអភិបាលខេត្តត្រាត ពិភាក្សាជម្រុញបើកច្រកទ្វាព្រំដែនស្ពានជ័យជម្នះ (ច១)-ឆាំរ៉ាក
ភ្នំពេញ៖ នាថ្ងៃទី១៨ ខែមីនា ឆ្នាំ២០២៥ នៅសាលប្រជុំក្រុមប្រឹក្សាខេត្តពោធិ៍សាត់ ឯកឧត្តម ខូយ រីដា អភិបាលខេត្តពោធិ៍សាត់ និងឯកឧត្តម ណាក់តាផុង សាងួនជិទ អភិបាលខេត្តត្រាត បានប្រជុំពិភាក្សាទ្វេភាគី ស្តីពីការជម្រុញដំណើរការបើកច្រកទ្វាព្រំដែនស្ពានជ័យជម្នះ (ច១) ឃុំថ្មដា ស្រុកវាលវែង ខេត្តពោធិ៍សាត់ ទល់មុខច្រកឆាំរ៉ាក ស្រុកមឿង ខេត្តត្រាត ដោយមានការចូលរួមពីប្រតិភូខេត្តត្រាត និងខេត្តពោធិ៍សាត់យ៉ាងច្រើនកុះករ។
ឯកឧត្តម ខូយ រីដា បានបញ្ជាក់អំពីលទ្ធផលផ្លែផ្កា នៃកិច្ចសហប្រតិបត្តិការ ខេត្តយើងទាំង២ ក្នុងនាមប្រទេសជិតខាង មានទំនាក់ទំនងល្អ ទាំងផ្នែកកងកម្លាំងការពារព្រំដែន រក្សាបាននូវសន្តិសុខ សុវត្ថិភាព បង្កាទប់ស្កាត់បទល្មើស ឧក្រិដ្ឋកម្មឆ្លងដែន គ្រឿងញៀន ការរត់ពន្ធ និងការឆ្លងដែនខុសច្បាប់ ពុំមានកើតនៅក្នុងក្របខណ្ឌនៃខេត្តយើងទាំង២នោះឡើយ។ ចំពោះប្រធានបទដែលអង្គប្រជុំខេត្តទាំង២ ធ្វើការពិភាក្សាគ្នាថ្ងៃនេះ គឺការដំណើរការបើកច្រកទ្វាព្រំដែនស្ពានជ័យជម្នះ (ច១)-ឆាំរ៉ាក។
ឯកឧត្តមអភិបាលខេត្ត បានលើកឡើងថា បើយោងតាមស្មារតី នៃកិច្ចប្រជុំអភិបាលខេត្តជាប់ព្រំដែន កម្ពុជា-ថៃ លើកទី៨ នៅរាជធានីភ្នំពេញ កាលពីថ្ងៃទី២២ ដល់ថ្ងៃទី២៤ ខែសីហា ឆ្នាំ២០២៤ និងកិច្ចប្រជុំរវាងកងទ័ពបញ្ជាការការពារព្រំដែន ច័ន្ទបុរីនិងត្រាត នៃព្រះរាជាណាចក្រថៃ និងយោធភូមិភាគទី៥ កងទ័ពជើងគោក នៃព្រះរាជាណាចក្រកម្ពុជា នៅខេត្តច័ន្ទបុរី នៃព្រះរាជាណាចក្រថៃ កាលពីថ្ងៃទី២៩ ដល់ថ្ងៃទី៣០ ខែមេសា ឆ្នាំ២០២៤កន្លងទៅ គឺបានគាំទ្រ និងជម្រុញឱ្យខេត្តទាំង២ (ពោធិ៍សាត់-ត្រាត) បន្តធ្វើការពិភាក្សា ដើម្បីដំណើរការបើកច្រកទ្វាព្រំដែនស្ពានជ័យជម្នះ (ច១)-ទល់នឹងច្រកឆាំរ៉ាក ខេត្តត្រាត ក្នុងគោលដៅលើកកម្ពស់កម្រិតជីវភាពរស់នៅរបស់ប្រជាពលរដ្ឋ នៃខេត្តទាំង២ (ពោធិ៍សាត់-ត្រាត) ក៏ដូចសម្រាប់ក្របខណ្ឌប្រទេសទាំង២ (កម្ពុជា-ថៃ)។
ជាមួយគ្នានោះ ដើម្បីធានាឱ្យកិច្ចការងារដំណើរការបើកច្រកទ្វានេះ ទៅបានដោយរលូន រដ្ឋបាលខេត្តពោធិ៍សាត់ បានពិនិត្យ និងត្រៀមរៀបចំអនុវត្តជាជំហានៗដូចជា៖ ធ្វើការកែលម្អ និងជួសជុលដំឡើងកម្រិតផ្លូវ ពីច្រកទ្វាមកតភ្ជាប់ផ្លូវជាតិលេខ៥៥ ការរៀបចំទីតាំងសម្រាប់បម្រើឱ្យសមត្ថកិច្ចពាក់ព័ន្ធធ្វើ និងកិច្ចការចាំបាច់ផ្សេងៗមួយចំនួនទៀត។
ការឆ្លើយតបឯកឧត្តម ណាក់តាផុន សាងួនជិទ អភិបាលខេត្តត្រាត បានជម្រាបជូនថា ថ្ងៃនេះលោកបានដឹកនាំប្រតិភូមកប្រជុំ ដើម្បីពិភាក្សាលើបញ្ហាបើកច្រកទ្វារព្រំដែន (ច១) ឃុំថ្មដា ស្រុកវាលវែង ខេត្តពោធិ៍សាត់ នៃព្រះរាជាណាចក្រកម្ពុជា ទល់មុខនឹងច្រកឆាំរ៉ាក របស់ខេត្តត្រាត នៃព្រះរាជាណាចក្រថៃ ក្នុងគោលបំណងពិនិត្យមើលឱ្យឃើញថា ខេត្តពោធិ៍សាត់មានសក្តានុពលលើវិស័យអ្វីខ្លះ ដើម្បីបម្រើផលប្រយោជន៍ ជូនដល់ខេត្តទាំង២ ទទួលបានចំណូល។
ជាទូទៅប្រជាជនថៃ ក៏ទទួលបានចំណូលផងដែរ លើវិស័យទេសចរណ៍ ដែលមានប្រជាជនកម្ពុជា ចូលទៅទស្សនាកំសាន្តនៅខេត្តត្រាត ក៏ដូចជាការផ្លាស់ប្តូរទំនិញគ្នា ទៅវិញទៅមក។ ហើយចំពោះបញ្ហាបើកច្រកទ្វាព្រំដែននេះប្រមុខរាជរដ្ឋាភិបាល បានជជែករួចហើយ និងប្រគល់ជូនថ្នាក់ក្រោមជាតិ ពិភាក្សាគ្នាបន្តដោះស្រាយ។
សូមជម្រាបជូនថា បន្ទាប់ពីជួបពិភាក្សាគ្នា រយៈពេលជិត២ម៉ោងរួចមក ភាគីទាំង២ (កម្ពុជា-ថៃ) បានបង្ហាញឆន្ទ:ស្របគ្នា គឺតាំងចិត្តរួមគ្នា ដើម្បីបើកច្រកទ្វាព្រំដែនស្ពានជ័យជំនះ (ច១)-ឆាំរ៉ាក ឱ្យទទួលបានជោគជ័យ តាមការគ្រោងទុក។ ក៏ប៉ុន្តែមុននឹងឈានដល់ដំណើរការ ជាផ្លូវការនោះ ភាគីទាំង២ បានឯកភាពបង្កើតក្រុមការងារ ចំនួន២ក្រុម គឺភាគីកម្ពុជា ១ក្រុម និងភាគីថៃ ១ក្រុម ដើម្បីរៀបចំរចនាសម្ព័ន្ធ និងពិនិត្យមើលបញ្ហាប្រឈមមួយចំនួន រួមគ្នាដោះស្រាយជាមុន ទើបសម្រេចជាចុងក្រោយ ៕
