រដ្ឋមន្ត្រីការបរទេសចិន និងកូរ៉េខាងត្បូង នឹងជួបប្រជុំគ្នានៅរាជធានីតូក្យូ នៅថ្ងៃសៅរ៍សប្តាហ៍នេះ
តូក្យូ៖លោក តាគីស៊ី អ៊ីវ៉ាយ៉ា រដ្ឋមន្ត្រីការបរទេសជប៉ុន បាននិយាយថា រដ្ឋមន្ត្រីការបរទេសចិន និងកូរ៉េខាងត្បូង នឹងមកជួបប្រជុំគ្នានៅរាជធានីតូក្យូនៅថ្ងៃសៅរ៍សប្តាហ៍នេះ។
រដ្ឋមន្ត្រីទាំងបីត្រូវបានគេរំពឹងថា នឹងពិភាក្សាអំពីវិធីជំរុញកិច្ចសហប្រតិបត្តិការសេដ្ឋកិច្ច និងការផ្លាស់ប្ដូរបុគ្គលិក នៅពេលពន្ធគយរបស់ប្រធានាធិបតីអាម៉េរិក លោក ដូណាល់ ត្រាំ កំពុងធ្វើឱ្យទស្សនវិស័យសេដ្ឋកិច្ចពិភពលោក មិនច្បាស់លាស់។ ពួកគេក៏ទំនងជានឹងដាក់មូលដ្ឋានគ្រឹះសម្រាប់កិច្ចប្រជុំកំពូលបីផ្លូវ ដែលជប៉ុនមានបំណងធ្វើជាម្ចាស់ផ្ទះនៅឆ្នាំនេះ។ កិច្ចប្រជុំថ្ងៃសៅរ៍ នឹងដឹកនាំដោយលោក អ៊ីវ៉ាយ៉ា និងមានការចូលរួមដោយសមភាគីចិន និងកូរ៉េខាងត្បូង ពោលគឺលោក វ៉ាង យី និងលោក ឆូ តេយុល។ ប្រមុខការបរទេសនៃប្រទេសជិតខាងអាស៊ីបូព៌ាទាំងបី បានជួបគ្នាចុងក្រោយក្នុងខែវិច្ឆិកា ឆ្នាំ២០២៣ នៅទីក្រុងប៊ូសាន ប្រទេសកូរ៉េខាងត្បូង។
លោក អ៊ីវ៉ាយ៉ា បានប្រាប់សន្និសីទសារព័ត៌មានថា លោកចង់ផ្លាស់ប្ដូរយោបល់ដោយស្មោះត្រង់ជាមួយសមភាគីចិន និងកូរ៉េខាងត្បូង ដើម្បីលើកកម្ពស់កិច្ចសហប្រតិបត្តិការ តម្រង់ទិសនាពេលអនាគត។ រដ្ឋមន្ត្រីជប៉ុន ចិន និងកូរ៉េខាងត្បូង ក៏នឹងជួបពិភាក្សាទ្វេភាគីនៅក្នុងកិច្ចប្រជុំដាច់ដោយឡែកមួយផងដែរនៅថ្ងៃសៅរ៍ខាងមុខ។ លោក អ៊ីវ៉ាយ៉ា និងលោក វ៉ាង នឹងធ្វើជាប្រធានកិច្ចសន្ទនាសេដ្ឋកិច្ចកម្រិតខ្ពស់រវាងជប៉ុន និងចិន ដែលជាជំនួបលើកដំបូងក្នុងរយៈពេលប្រហែល៦ឆ្នាំ។
លោក អ៊ីវ៉ាយ៉ា និងលោក វ៉ាង ត្រូវបានគេរំពឹងថា នឹងពិភាក្សាអំពីការរឹតបន្តឹងការនាំចូលរបស់ចិនលើផលិតផលនេសាទ និងសាច់គោរបស់ជប៉ុន អាកប្បកិរិយាឈ្លានពានរបស់ចិននៅក្នុងសមុទ្ទចិនខាងកើត និងសមុទ្ទចិនខាងត្បូង និងការឃុំខ្លួនជនជាតិជប៉ុននៅក្នុងប្រទេសចិន។
លោក អ៊ីវ៉ាយ៉ា និងលោក ឆូ ទំនងជានឹងបញ្ជាក់ឡើងវិញនូវការប្តេជ្ញាចិត្តរបស់ប្រទេសពួកគេក្នុងការធ្វើឱ្យប្រសើរឡើងនូវទំនាក់ទំនងរវាងគ្នាបន្ថែមទៀត ទោះបីជាមានភាពចលាចលនយោបាយនៅក្នុងប្រទេសកូរ៉េខាងត្បូងក៏ដោយ។ ប្រទេសជប៉ុន និងកូរ៉េខាងត្បូង ប្រារព្ធខួបលើកទី៦០ នៃការធ្វើឱ្យប្រក្រតីភាពនៃទំនាក់ទំនងការទូតរបស់ប្រទេសទាំងពីរនៅឆ្នាំនេះ៕
