សម្តេចធិបតី ផ្តល់ជាគោលការណ៍នៅតំបន់ដាច់ស្រយាល គ្រូមធ្យមសិក្សាដែលចូលនិវត្តន៍ ត្រូវពិនិត្យលទ្ធភាពឱ្យបន្តកិច្ចសន្យាធ្វើជាគ្រូបណ្តោះអាសន្ន រហូតរើសគ្រូថ្មីបាន
ភ្នំពេញ៖ ក្នុងឱកាសអញ្ជើញជាអធិបតីក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១ (២០២៤-២០២៥) ស្តីពី “កំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០” នៅសណ្ឋាគារសុខាភ្នំពេញ នាថ្ងៃទី១៨ ខែមីនា ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានផ្តល់ជាគោលការណ៍ នៅតំបន់ដាច់ស្រយាល ជាពិសេសកន្លែងខ្វះខាតខ្លាំង គ្រូមធ្យមសិក្សាដែលចូលនិវត្តន៍ ត្រូវបើកច្រកសម្រាប់រយៈពេលខ្លី ពិនិត្យលទ្ធភាពឲ្យបន្តកិច្ចសន្យា ធ្វើជាគ្រូបណ្តោះអាសន្ន រហូតរើសគ្រូថ្មីបាន។
ជាមួយគ្នានេះសម្តេចធិបតីបានស្នើក្រសួងអប់រំ និងក្រសួងមុខងារសាធារណៈរៀបចំការងារនេះ ចំពោះការរើសមន្ត្រីចូលនិវត្តន៍ឲ្យបន្តធ្វើការ ក៏ត្រូវអនុវត្តដូចគ្នា សម្រាប់គ្រូពេទ្យ ផងដែរ។
ដោយឡែកចំពោះការស្នើសុំប្រាក់សោធននិវត្តន៍ ចំពោះក្រុមប្រឹក្សារដ្ឋបាលថ្នាក់ក្រោមជាតិ ប្រាក់លម្ហែមាតុភាពសម្រាប់សមាជិក្រុមប្រឹក្សាជាស្ត្រី និងការបង្កើនប្រាក់ឧបត្ថម្ភសម្រាប់ថ្នាក់ដឹកនាំភូមិ សម្តេចធិបតីបានថ្លែងថា ក្រុមប្រឹក្សារដ្ឋបាលថ្នាក់ក្រោមជាតិ ដែលជាប់ឆ្នោត ៣អាណត្តិឡើង នឹងទទួលបានប្រាក់សោធននិវត្តន៍។ ការបង្កើនប្រាក់ឧបត្ថម្ភសម្រាប់ថ្នាក់ដឹកនាំភូមិ ក្រៅតែពីបានធ្វើការងារបន្តបន្ទាប់ហើយ សម្តេច ប្រកាសនឹងដំឡើងប្រាក់ឧបត្ថម្ភនេះបន្ត៕
