ឧត្ដមសេនីយ៍ឯក ទូច ពលៈ អញ្ជើញបើកវគ្គបំប៉នជំនាញផ្ទៃក្នុង ស្តីពីនីតិវិធីព្រហ្មទណ្ឌ និងការប្រើប្រាស់ឧបករណ៍កំណត់ទីតាំងផែនទី (GPS) ជូនដល់សិក្ខាកាមជាមន្ត្រីនគរបាលជាតិ នៃនាយកដ្ឋាននគរបាលការពារព្រំដែនទឹក

ភ្នំពេញ៖ នាព្រឹកថ្ងៃចន្ទ ១២កើត ខែផល្គុន ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១០ ខែមីនា ឆ្នាំ២០២៥ ឯកឧត្តម ឧត្ដមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក និងជាអគ្គលេខាធិការរង នៃគ.ជ.ស.ស តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ ទទួលដឹកនាំនាយកដ្ឋានកណ្តាលនគបាលព្រំដែន បានអញ្ជើញជាអធិបតីភាពក្នុង “ពិធីបើកវគ្គបំប៉នជំនាញផ្ទៃក្នុង ស្តីពីនីតិវិធីព្រហ្មទណ្ឌ និងការប្រើប្រាស់ឧបករណ៍កំណត់ទីតាំងផែនទី (GPS)” រយៈពេល០១ខែ ជូនដល់សិក្ខាកាមជាមន្ត្រីនគរបាលជាតិ ដែលមកពីតាមបណ្តាការិយាល័យ អង្គភាពបង្ក្រាបបទល្មើសលើផ្ទៃសមុទ្រ វរសេនាតូចនគរបាលការពារព្រំដែនទឹក និងប៉ុស្តិ៍នគរបាលការពារព្រំដែនទឹក ចំណុះនាយកដ្ឋាននគរបាលការពារព្រំដែនទឹក សរុបចំនួន១០០រូប។

ពិធីនេះ ក៏មានការអញ្ជើញចូលរួមពី លោកឧត្តមសេនីយ៍-វរសេនីយ៍តំណាងនាយកដ្ឋានកណ្តលនគរបាលព្រំដែនតំណាងនាយកដ្ឋាននគរបាលបច្ចេកទេសព្រំដែន តំណាងនាយកដ្ឋាននគរបាលការពារព្រំដែនគោក តំណាងប្រធានអង្គភាពអន្តរាគមន៍ ព្រមទាំងលោក-លោកស្រីអនុប្រធាននាយកដ្ឋាននគរបាលការពារព្រំដែនទឹក នាយការិយាល័យ ប្រធានអង្កភាពបង្ក្រាបបទល្មើសលើផ្ទៃសមុទ្រ មេបញ្ជាការ វរសេនាតូចនគរបាលការពារព្រំដែនទឹកទាំងអស់ លោកគ្រូឧទ្ទេស និងសិក្ខាកាម សរុបចំនួន ១៣០រូប នៅសាលប្រជុំនាយកដ្ឋាននគរបាលការពារព្រំដែនទឹក។

គូសបញ្ជាក់ផងដែរថា ដោយទទួលបានគោលការណ៍អនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគបាលជាតិ នាយកដ្ឋាននគរបាលការពារព្រំដែនទឹក បានរៀបចំបើកវគ្គបំប៉នជំនាញផ្ទៃក្នុងឡើងនេះក្នុងគោលបំណងដើម្បីលើកកម្ពស់សមត្ថភាពធនធានមនុស្ស ការពង្រឹងសមត្ថភាព ចំណេះដឹងវិជ្ជាជីវៈក្នុងការអនុវត្តនីតិវិធីពេលចេញប្រតិបត្តិការ និងរបៀបនៃការប្រើប្រាស់ឧបករណ៍កំណត់ទីតាំងផែនទី(GPS) ឲ្យស្របទៅតាមផែនការយុទ្ធសាស្ត្ររបស់អគ្គស្នងការដ្ឋាននគរបាលជាតិ និងក្រសួងមហាផ្ទៃ។

ថ្លែងក្នុងឱកាសនេះ ឯកឧត្តម ឧត្ដមសេនីយ៍ឯក ប្រធាននាយកដ្ឋាននគរបាលការពារព្រំដែនទឹក បានសម្តែងនូវការអបអសាទរ និងថ្លែងអំណរគុណដល់លោកគ្រូ ភ្ញៀវកិត្តិយស និងសិក្ខាកាមទាំងអស់ដែលមានវត្តមានក្នុងពិធីនេះ។

ឆ្លៀតក្នុងឱកាសនៃពិធីបើកវគ្គបំប៉នជំនាញផ្ទៃក្នុងនេះផងដែរ ឯកឧត្តម ឧត្ដមសេនីយ៍ឯក ក៏បានធ្វើការណែនាំ និងផ្តាំផ្ញើដល់សិក្ខាកាមទាំងអស់៖
ទី១-ត្រូវយកចិត្តទុកដាក់ ត្រងត្រាប់ស្តាប់ និងក្រេបយកនូវចំណេះដឹងទាំងទ្រឹស្តី និងការអនុវត្តជាក់ស្តែង ដើម្បីបង្កើននូវចំណេះដឹង និងសមត្ថភាពជំនាញ
ទី២-ត្រូវមានអាកប្បកិរិយាល្អ ក្រមសីលធម៌ល្អ និងគោរពវិន័យកងកម្លាំងនគរបាលជាតិ
ទី៣-ត្រូវរក្សាសាមគ្គីភាពផ្ទៃក្នុងវគ្គសិក្សាទាំងមូល ដើម្បីទទួលបានភាពសុខដុមរមនា ៕