ចិនប្រកាសប្រឆាំងនឹងការគំរាមកំហែងរបស់លោក ដូណាល់ ត្រាំ ក្នុងការដាក់ពន្ធបន្ថែម១០ភាគរយ លើការនាំចូលរបស់ចិន
ប៉េកាំង៖ នៅថ្ងៃសុក្រទី២៨កុម្ភៈនេះ ចិនបានប្រកាសប្រឆាំងនឹងការគំរាមកំហែងចុងក្រោយរបស់ប្រធានាធិបតីសហរដ្ឋអាម៉េរិក ដូណាល់ ត្រាំ ក្នុងការដាក់ពន្ធបន្ថែម១០ភាគរយលើការនាំចូលរបស់ចិន។
លោក ត្រាំ បានបញ្ជាក់កាលពីថ្ងៃព្រហស្បតិ៍ទី២៧កុម្ភៈថា ការដំឡើងពន្ធ២៥ភាគរយ លើទំនិញម៉ិកស៊ិក និងកាណាដា នឹងចូលជាធរមាននៅថ្ងៃទី៤ ខែមីនា រួមជាមួយពន្ធបន្ថែម១០ភាគរយលើការនាំចូលពីប្រទេសចិន។
ជុំវិញការដំឡើងពន្ធនេះ អ្នកនាំពាក្យក្រសួងពាណិជ្ជកម្ម បានលើកឡើងក្នុងសេចក្តីថ្លែងការណ៍ថា៖«យើងបាននិយាយម្ដងហើយម្ដងទៀតថា ពន្ធឯកតោភាគី បំពានលើច្បាប់ពហុភាគីរបស់អង្គការពា ណិជ្ជកម្មពិភពលោក។ ចិន មាន គោលនយោបាយ ប្រឆាំង គ្រឿងញៀន តឹងរ៉ឹង បំផុត និង អនុវត្ត យ៉ាង ហ្មត់ចត់ បំផុត មួយ ក្នុង ពិភពលោក។ ឥឡូវនេះ សហរដ្ឋអាម៉េរិកជាថ្មីម្ដងទៀត កំពុងគំរាមកំហែងពន្ធបន្ថែម។ ឥរិយាបថនេះ គឺគ្មានអ្វីក្រៅពីការបង្វែរការស្តីបន្ទោស និងបង្វែរការទទួលខុសត្រូវនោះទេ»។
សេចក្តីថ្លែងការណ៍បន្តថា៖«ចិនជំរុញឱ្យសហរដ្ឋអាម៉េរិក កុំប្រព្រឹត្តកំហុសម្ដងទៀត ហើយឱ្យត្រឡប់ទៅរកផ្លូវត្រឹមត្រូវ នៃការដោះស្រាយជម្លោះតាមរយៈការសន្ទនាដោយស្មើភាព ឱ្យបានឆាប់តាមដែលអាចធ្វើទៅបាន។ ប្រសិនបើសហរដ្ឋអាម៉េរិកបន្តធ្វើខុស ចិននឹងចាត់វិធានការឆ្លើយតបជាចាំបាច់ទាំងអស់ ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន»៕
