ឧបនាយករដ្ឋមន្ត្រី ហង់ ជួនណារ៉ុន៖ ការអភិវឌ្ឍវិស័យអប់រំ គឺជាការងាររួមទាំងនៅថ្នាក់ជាតិ និងនៅថ្នាក់ក្រោមជាតិ

ភ្នំពេញ៖ ឯកឧត្ដមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ការអភិវឌ្ឍវិស័យអប់រំ គឺជាការងាររួមរបស់រាជរដ្ឋាភិបាលទាំងមូល ទាំងនៅថ្នាក់ជាតិ និងទាំងនៅថ្នាក់ក្រោមជាតិ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរ ធិបតីនាយករដ្ឋមន្ត្រី ហ៊ុន ម៉ាណែត និងដោយមានការចូលរួមពីគ្រប់ភាគីពាក់ព័ន្ធទាំងអស់ ជាពិសេសបុគ្គលិកអប់រំគ្រប់លំដាប់ថ្នាក់ អាជ្ញាធរមូលដ្ឋាន ក្រុមការងារថ្នាក់ជាតិចុះជួយមូលដ្ឋាន មាតាបិតា អ្នកអាណាព្យាបាល សិស្សានុសិស្ស និងដៃគូអភិវឌ្ឍ។

ថ្លែងក្នុងឱកាសបិទសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយរដ្ឋមន្ត្រីនៃកម្ពុជា នៅរសៀលថ្ងៃទី២៦ ខែកុម្ភៈ ឆ្នាំ២០២៥ ឯកឧត្ដមបណ្ឌិតសភាចារ្យ ហង់ ជួនណារ៉ុន បានថ្លែងថា គិតមកដល់ខែមករា ឆ្នាំ២០២៥ សម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែ ន បានរួមចំណែកយ៉ាងធំធេង ក្នុងការសាងសង់អគារសិក្សាចំនួន ៤ ៥៨២ខ្នង ស្មើនឹង ៣០ ១៣៥បន្ទប់ ជូនដល់កូនចៅជាសិស្សានុសិស្ស និស្សិត លោកគ្រូ អ្នកគ្រូ។

ឯកឧត្ដមឧបនាយករដ្ឋមន្ត្រីបានថ្លែងថា ក្នុងនាមក្រសួងអប់រំ យុវជន និងកីឡា និងក្នុងនាមឯកឧត្ដមផ្ទាល់សូមសម្តែងនូវកត្តញ្ញុតាធម៌យ៉ាងជ្រាលជ្រៅបំផុតចំពោះ សម្តេចតេជោ និងសម្តេចកិតិ្តព្រឹទ្ធបណ្ឌិត ដែលបានរួមចំណែកយ៉ាងធំធេងក្នុងការសាងសង់អគារសិក្សា យ៉ាងច្រើន ដែលគិតមកដល់ខែមករា ឆ្នាំ២០២៥ មានចំនួន ៤.៥៨២ ខ្នង ស្មើនឹង ៣០.១៣៥ បន្ទប់ ជូនដល់កូនចៅជាសិស្សានុសិស្ស និស្សិត លោកគ្រូ អ្នកគ្រូ។ អគារសិក្សា ថ្នាក់រៀន ការិយាល័យទីចាត់ការ និងផ្ទះគ្រូរបស់សម្តេចមានលក្ខណៈស្តង់ដា មានផាសុកភាព មានបំពាក់គ្រឿង សង្ហារិម បរិក្ខារ សម្ភារៈរៀន និងបង្រៀនគ្រប់គ្រាន់

ឯកឧត្ដមបន្តថា ស្ថិតក្នុងបរិយាកាសដ៏រីករាយនេះ យើងទាំងអស់គ្នាជាមន្រ្តីអប់រំនៅទូទាំងព្រះរាជាណាចក្រកម្ពុជា សូមសម្តែងនូវការគោរពដឹងគុណ និងចងចាំជានិច្ចចំពោះវីរភាពដ៏ឧត្តុង្គឧត្តមរបស់ សម្តេចតេជោអតីតនាយករដ្ឋមន្រ្តី និងបច្ចុប្បន្នជា ប្រធានព្រឹទ្ធសភានៃព្រះរាជាណាចក្រកម្ពុជា ដែលបានដឹកនាំប្រទេសកម្ពុជាឱ្យមានការបង្រួបបង្រួមជាតិ ផ្សះផ្សាជាតិ មានសុខសន្តិភាពពេញលេញ និងមានការអភិវឌ្ឍនៅលើគ្រប់វិស័យ៕