លោក ឡុង ឌីម៉ង់ រំពឹងថាចំនួនគម្រោងវិនិយោគនឹងកាន់តែមានកំណើនបន្ថែមទៀត តាមរយៈការបន្តអនុវត្តន៍ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤»
ភ្នំពេញ៖ លោក ឡុង ឌីម៉ង់ អភិបាលរងខេត្តព្រះសីហនុ បានរំពឹងថាចំនួនគម្រោងវិនិយោគនឹងកាន់តែមានកំណើនបន្ថែមទៀត តាមរយៈការបន្តអនុវត្តន៍ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» រហូតដល់ដំណាច់ឆ្នាំ២០២៥នេះ ព្រោះចាប់តាំងពីការដាក់ឱ្យអនុវត្តរហូតដល់ដើមឆ្នាំ២០២៥នេះ គម្រោងដែលទទួលបានគោលការណ៍លើកទឹកចិត្តមានសរុបចំនួន២៥៥គម្រោងហើយ ដោយមានទុនវិនិយោគប៉ានស្មានសរុប ៦.៥៩០ លានដុល្លារអាម៉េរិក លើសគោលដៅសូចនាករសមិទ្ធកម្មដែលបានកំណត់។
លោក ឡុង ឌីម៉ង់ បានគូសបញ្ជាក់ កម្ពុជាថា “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤” ដែលបានប្រកាសដាក់ឱ្យអនុវត្តជាផ្លូវការដោយ សម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា កាលថ្ងៃទី៣១ ខែមករា ឆ្នាំ ២០២៤ បានបង្កើតគំរូមួយសម្រាប់ជំរុញការវិនិយោគ ព្រោះកម្មវិធីពិសេសបានបង្កើតជំនឿទុកចិត្ត និងសម្រាលការលំបាកនានាក្នុងការអនុវត្តគម្រោង, លើកកម្ពស់បរិយាកាសវិនិយោគ ខណៈដែលអគារជាប់គាំងត្រូវបានចាប់ផ្តើមសាងសង់ និងសកម្មភាពធុរកិច្ចមានការកើនឡើង ព្រមទាំងទាក់ទាញគម្រោងវិនិយោគសក្តានុពល ដូចជារោងចក្រផលិត បន្ទះសូឡា, រោងចក្រ ផលិតស៊ុមអាលុយមីញូម, សួនកសិឧស្សាហកម្ម និងតំបន់សេដ្ឋកិច្ចពិសេស ជាដើម។
លោកអភិបាលរងខេត្ត បានបន្តថា កម្មវិធីនេះក៏បានជំរុញឱ្យមន្ត្រីរាជការពាក់ព័ន្ធ និងថ្នាក់ដឹកនាំ ទាំងនៅថ្នាក់ជាតិនិងថ្នាក់ក្រោមជាតិយល់ និងប្រកាន់របៀបរបបធ្វើការដោយសកម្ម និង បុរេសកម្ម ក្នុងការផ្តល់សេវាឱ្យរហ័ស មានប្រសិទ្ធភាព និងសម្រួលនីតិវិធីដល់វិស័យឯកជន។
លោកបានបន្តទៀតថា គិតត្រឹមចុងខែធ្នូ ឆ្នាំ២០២៤ ក្នុងរយៈពេល១១ខែ ក្រុមការងារ បានសម្រេចជាគោលការណ៍ផ្តល់ការលើកទឹកចិត្ត ការអនុគ្រោះ ការសម្រួលនីតិវិធី និង ការសម្របសម្រួលដោះស្រាយ វិវាទ ចំនួន ២១៣ គម្រោង ស្មើនឹង២១៣ភាគរយ លើសគោលដៅសូចនាករសមិទ្ធកម្មដែលបានកំណត់ ត្រឹម ១០០គម្រោង ដែលមានទុនវិនិយោគ ៦.០២៦លានដុល្លារអាមេរិក លើសសូចនាករសមិទ្ធកម្មដែលបានកំណត់ត្រឹម ១.០០០លានដុល្លារ និងដែលប៉ាន់ស្មានអាចបង្កើតការងារ ឬត្រូវការកម្មករ និយោជិត ចំនួន ៣៩.៥៧៨កន្លែង លើសសូចនាករសមិទ្ធកម្ម ដែលកំណត់ត្រឹម ៥.០០០ កន្លែង។
លោកបានរំលេចថា សម្រាប់ឆ្នាំ២០២៥នេះ ក្រុមការងារក៏បានផ្តល់គោលការណ៍លើកទឹកចិត្តដល់គម្រោងចំនួន ៤២គម្រោងបន្ថែមទៀត ដូច្នេះគម្រោងដែលទទួលបានគោលការណ៍លើកទឹកចិត្តមានសរុប២៥៥គម្រោង ដែលមានទុនវិនិយោគប៉ានស្មានសរុប ៦.៥៩០លានដុល្លារអាម៉េរិក។ ក្នុងនោះ គម្រោងពាក់ព័ន្ធនឹងអគារជាប់គាំងមាន១១៩គម្រោង, គម្រោងមិនពាក់ព័ន្ធនឹងអគារជាប់គាំង (គម្រោងថ្មី)មាន ១០៧គម្រោង, គម្រោងពង្រីកមាន១៩គម្រោង និង គម្រោងវិនិយោគដែលមានស្រាប់ ១០គម្រោង។ «យើងឃើញថា គម្រោងវិនិយោគនឹងកាន់តែមានកំណើនបន្ថែមទៀត ជាពិសេសនៅពេលដែលយើងឃើញបរិបទសព្វថ្ងៃនេះនៃរបាំងពន្ធរបស់សហរដ្ឋអាម៉េរិកដែលបានដាក់រួចទៅហើយ នៅក្នុងរដ្ឋបាលរបស់លោកដូណាល់ត្រាំ គឺឃើញថារបាំងពន្ធចាប់ផ្ដើមដាក់ទៅតាមបណ្ដាប្រទេសមួយចំនួន ហើយក៏បានដាក់នៅក្នុងបណ្ដាប្រទេសដែលជាសម្ព័ន្ធមិត្តរបស់អាម៉េរិកផងដែរ ដូច្នេះខ្ញុំយល់ឃើញថាប្រទេសកម្ពុជាគឺជាគោលដៅមួយដែលយើងទាំងអស់គ្នា ត្រូវតែខិតខំប្រឹងប្រែងទាញយកចំណាប់អារម្មណ៍នេះ ទាញយកការចង់បានរបស់អ្នកវិនិយោគបរទេសជាច្រើន និងលើកគម្រោងរបស់ខ្លួនមកដាក់ប្រទេសកម្ពុជាដើម្បីឱ្យកម្ពុជាក្លាយទៅជាគោលដៅនៃការនាំចេញទៅកាន់ទីផ្សាររបស់សហរដ្ឋអាម៉េរិក របស់អឺរ៉ុប រួមទាំងបណ្ដាប្រទេសដែលកម្ពុជាជាសម្ពន្ធ័មិត្ត ដែលមានការធ្វើកិច្ចព្រមព្រៀងពាណិជ្ជកម្មសេរី ដូចជាកម្ពុជាចិន កម្ពុជាកូរ៉េ រួមទាំងកិច្ចព្រមព្រៀងពាណិជ្ជកម្មសេរីដទៃទៀត ដែលកម្ពុជាជាសមាជិករបស់អាស៊ាន RCEP ជាដើម»។
លោកអភិបាលរងខេត្ត បានបន្តទៀតថា ក្រុមការងារនឹងបន្តខិតខំព្យាយាមពន្យល់ទៅដល់អ្នកវិនិយោគនិងវិស័យឯកជន ឱ្យបានដឹងថា នៅពេលដែលខ្លួនសម្រេចចិត្តបង្កើតគម្រោង បង្កើតរោងចក្រ សហគ្រាស និងអនុវត្តន៍គម្រោងផ្សេងៗនៅក្នុងប្រទេសកម្ពុជា វិនិយោគិនមិនមែនសំដៅតែលើប្រជាពលរដ្ឋប្រមាណ១៧លាននាក់ប៉ុណ្ណោះទេ គឺត្រូវសម្លឹងមើលទៅដល់ប្រជាជននៃសមាជិកមហាតំបន់មេគង្គ ប្រជាជននៃសមាជិកអាស៊ាន ជាដើម ដែលទាំងនេះគឺជាគោលដៅរបស់ប្រទេសកម្ពុជា ដែលអាចទាក់ទាញវិនិយោគិន ឱ្យមកបណ្ដាក់ទុនវិនិយោគនៅកម្ពុជា ៕
