ទេសរដ្ឋមន្រ្តី គន់ គីម លើកទឹកចិត្តឱ្យកសិករចូលរួមសហគមន៍កសិកម្មទំនើប ដើម្បីធានាបានទិន្នផលល្អ និងទីផ្សារល្អ

ភ្នំពេញ៖ ក្នុងឱកាសបន្តអញ្ជើញពិនិត្យការសម្របសម្រួល និងអន្តរាគមន៍ទឹកស្រោចស្រពស្រែប្រាំងលើផ្ទៃដីស្រែប្រមាណ១១៣១ ហិចតា ស្ថិតក្នុងឃុំកញ្ជរ ស្រុកកណ្តៀង ខេត្តពោធិ៍សាត់ នៅថ្ងៃទី១ ខែកុម្ភ: ២០២៥ ឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានលើកទឹកចិត្តឲ្យកសិករចងក្រងជាសហគមន៍ទំនើប ប្រើប្រាស់តែពូជស្រូវប្រាំងក្នុងស្រុក ដើម្បីធានាទិន្នផលខ្ពស់ និងមានទីផ្សារ។

នាឱកាសនោះ ឯកឧត្តមទេសរដ្ឋមន្រ្តី បានពាំនាំនូវការសួរសុខទុក្ខពីសម្តេចធិបតី ហ៊ុន ម៉ាណែត នាយករដ្ឋមន្រ្តី ជូនបងប្អូនប្រជាកសិករ ពិសេសប្រជាកសិករកំពុងជួបប្រទះបញ្ហាការខ្វះទឹកស្រោចស្រពស្រែប្រាំងរបស់កសិករ។

ក្នុងពេលចុះពិនិត្យ ឯកឧត្តមទេសរដ្ឋមន្រ្តី បានវាយតម្លៃខ្ពស់ចំពោះការយកចិត្តទុកដាក់របស់អាជ្ញាធរខេត្ត និងមន្ទីរជំនាញ ដែលបានចុះជួបជាមួយប្រជាកសិករ ក្នុងការពិនិត្យ និងឆ្លើយតបពីបញ្ហាដែលកំពុងប្រឈមដោយសារការកង្វះទឹកស្រោចស្រពដែលអាចខូចខាតដំណាំទាំងស្រុងរបស់កសិករ។

ទន្ទឹមគ្នានេះ ឯកឧត្តមទេសរដ្ឋមន្រ្តី គន់ គីម បានណែនាំ និងលើកទឹកចិត្តដល់កសិករ ឱ្យចូលរួមចងក្រងជាសហគមន៍ទំនើបដែលប្រើប្រាស់ពូជផលិតក្នុងស្រុក ដែលមានក្រសួងពាក់ព័ន្ធជាមួយនឹងរាជរដ្ឋាភិបាល ដើម្បីធានាដល់ការរក្សាបាននូវទិន្នផលខ្ពស់ទីផ្សារល្អ ដែលផ្តល់ភាពជឿជាក់និងទុកចិត្តបំផុតសំរាប់កសិករ។

ក្នុងពិធីសំណេះសំណាលនោះ តបតាមសំណូមពរប្រជាកសិករចំនួន ២១៥គ្រួសារ ថ្លែងអំណរគុណដល់ឯកឧត្តមទេសរដ្ឋមន្រ្តី និងឯកឧត្តមអភិបាលខេត្ត ដែលបានជួយឧបត្ថម្ភប្រេងចំនួន ១០០០លីត្រ សម្រាប់បូមទឹកដាក់ស្រែរបស់ពួកគាត់។

ឆ្លៀតក្នុងឱកាសនោះ ឯកឧត្តមទេសរដ្ឋមន្រ្តី ក៏បានណែនាំដល់អាជ្ញាធរ និងមន្ទីរជំនាញបន្តការយកចិត្តទុកដាក់លើសកម្មភាពតាមដានពីទិន្នផលស្រែប្រាំង និងត្រៀមអន្តរាគមន៍ផ្តល់ទឹកស្រែប្រាំងរបស់កសិករឱ្យបានគ្រប់ៗគ្នា ដើម្បីបង្ការការខូចខាតដំណាំរបស់ពួកគាត់ ៕