រដ្ឋមន្ត្រីអប់រំ ដឹកនាំប្រជុំ ពិនិត្យសូចនាករ និងការធ្វើចំណោលក្នុងផែនការយុទ្ធសាស្រ្តវិស័យអប់រំឆ្នាំ២០២៤-២០២៨ ស្ថិតិ និងសូចនាករអប់រំឆ្នាំសិក្សា ២០២៤-២០២៥

ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៨ ខែមករា ឆ្នាំ២០២៥ បានដឹកនាំកិច្ចប្រជុំស្ដីពី “ការពិនិត្យសូចនាករ និងការធ្វើចំណោលក្នុងផែនការយុទ្ធសាស្រ្តវិស័យអប់រំឆ្នាំ២០២៤-២០២៨ ស្ថិតិនិងសូចនាករអប់រំឆ្នាំសិក្សា ២០២៤-២០២៥” ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្ត្រីមកពីអង្គភាពពាក់ព័ន្ធក្រោមឱវាទ។

កិច្ចប្រជុំនេះរៀបចំឡើងក្នុងគោលបំណង៖ ទី១). វិភាគ និងពិភាក្សាអំពី វឌ្ឍនភាព ការដោះស្រាយ បញ្ហាប្រឈម និងទិសដៅកែទម្រង់ការងារស្ថិតិ ទី២). ការពិភាក្សា និងអនុម័តលើស្ថិតិ និងសូចនាករអប់រំ ឆ្នាំ សិក្សា ២០២៤-២០២៥ សម្រាប់បម្រើដល់ការរៀបចំសន្និបាតអប់រំ ឆ្នាំ២០២៥ ខាងមុខ និងសម្រាប់ប្រើប្រាស់ ក្នុងការងារវិភាគ និងការផ្សព្វផ្សាយជាសាធារណៈ។

កិច្ចប្រជុំនេះផ្តោតសំខាន់ និងពិភាក្សាលើទិដ្ឋភាពចំនួន ៤ រួមមាន៖ ទី១). សាវតារបស់ការងារស្ថិតិនិងសូចនាករអប់រំ ទី២). ស្ថានភាពនិងបញ្ហាប្រឈមការងារស្ថិតិនិងសូចនាករអប់រំ ទី៣). ការអភិវឌ្ឍជាជំហានៗការងារស្ថិតិ និងសូចនាករអប់រំក្នុងរយៈពេល១ឆ្នាំមកនេះ និងឆ្នាំបន្តបន្ទាប់ទៀត និងទី៤). សេចក្តីសង្ខេបស្ថិតិអប់រំឆ្នាំសិក្សា ២០២៤-២០២៥។

ដើម្បីលើកកម្ពស់ប្រសិទ្ធភាព និងប្រសិទ្ធផលការងារឱ្យល្អប្រសើរឡើង ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ដល់ក្រុមការងារជំនាញ ដូចជា៖ សូមឱ្យរៀបចំប្រព័ន្ធផ្ទៀងផ្ទាត់ទិន្នន័យ ដោយយកតួលេខក្នុងប្រព័ន្ធមកវិភាគ សិក្សាស្រាវជ្រាវ និងធ្វើការវាយតម្លៃដើម្បីធានាបាននូវសុក្រឹតភាពទិន្នន័យ, រៀបចំនិងពិនិត្យបន្ថែមលើសូចនាករនៃប្រព័ន្ធគ្រប់គ្រងដូចជា HRMIS និង EMIS និងត្រូវចុះពិនិត្យស្ថានភាពសាលារៀនដោយផ្ទាល់ ដើម្បីយល់ដឹងច្បាស់ពីស្ថានភាពជាក់ស្តែង, ប្រើប្រាស់ទិន្នន័យក្នុងការរៀបចំគោលនយោបាយអប់រំ និងកំណែទម្រង់អប់រំ, អភិវឌ្ឍសមត្ថភាពប្រព័ន្ធ និងក្រុមការងារពាក់ព័ន្ធឆ្លើយតបនឹងតម្រូវការចាំបាច់ចំពោះមុខ សម្រាប់គ្រប់គ្រងប្រព័ន្ធគ្រប់គ្រងព័ត៌មានអប់រំ ដោយផ្សារភ្ជាប់ អន្តរជំនាន់ និងនិរន្តរភាព និងការអភិវឌ្ឍ, សុខដុមនីយកម្មប្រព័ន្ធគ្រប់គ្រងព័ត៌មានក្នុងវិស័យអប់រំ តាមរយៈការបង្កើតថ្នាលសម្របសម្រួល និងកាត់បន្ថយយន្តការជាន់គ្នា ជាពិសេសត្រូវសហការ និងធ្វើការពិភាក្សាជាមួយនាយកដ្ឋានពាក់ព័ន្ធដើម្បីឯកភាពគ្នាលើសូចនាករ និងតួលេខ/ទិន្នន័យផ្សេងៗ ដើម្បីកំណត់ឱ្យបាននូវបញ្ហាច្បាស់លាស់ ឈានទៅដល់ការស្វែងរកដំណោះស្រាយ ក្នុងគោលដៅរៀបចំជារបាយការណ៍សង្ខេប ត្រៀមរួចរាល់សម្រាប់សន្និបាតខែកុម្ភៈ ឆ្នាំ២០២៥ ខាងមុខនេះ៕