សមាជិកសភាកូរ៉េខាងត្បូង៖ អាជ្ញាធរកូរ៉េខាងជើងហាក់ដូចជាបានអំពាវនាវឱ្យកងទ័ពរបស់ខ្លួនធ្វើអត្តឃាត ដើម្បីគេចចេញពីសំណាញ់ចាប់ខ្លួនរបស់អ៊ុយក្រែន
សេអ៊ូល៖ ទីភ្នាក់ងារចារកម្មរបស់ប្រទេសកូរ៉េខាងត្បូងបានអះអាងនៅថ្ងៃចន្ទទី១៣ខែមករាថា ទាហានកូរ៉េខាងជើងទំនជាស្លាប់ និងរបួសលើសពី ៣០០០នាក់ក្នុងនោះមានប្រហែល ៣០០នាក់បានស្លាប់ និង ២៧០០នាក់ទៀតរងរបួស។
បើតាមការបញ្ជាក់ដោយសមាជិកសភាកូរ៉េខាងត្បូងម្នាក់បានលើកឡើងថា អាជ្ញាធរកូរ៉េខាងជើងហាក់ដូចជាបានអំពាវនាវឱ្យកងទ័ពរបស់ខ្លួនធ្វើអត្តឃាត ដើម្បីគេចចេញពីសំណាញ់ចាប់ខ្លួនរបស់អ៊ុយក្រែន។ កន្លងមក រដ្ឋធានីសេអ៊ូលធ្លាប់បានអះអាងថា មេដឹកនាំកូរ៉េខាងជើងលោក គីម ជុងអ៊ុន បានបញ្ជូនទាហានជាង១ ម៉ឺននាក់ដើម្បីជួយរដ្ឋធានីមូស្គូប្រយុទ្ធប្រឆាំងនឹងរដ្ឋធានីកៀវ ជាថ្នូរនឹងជំនួយបច្ចេកទេសរបស់រុស្ស៊ី សម្រាប់កម្មវិធីអាវុធនុយក្លេអ៊ែរ និងផ្កាយរណប។
សមាជិកសភាកូរ៉េខាងត្បូងលោក លី សឹងវុន(Lee Seong-kweun) បានប្រាប់អ្នកយកព័ត៌មានបន្ទាប់ពីសន្និសីទខ្លីមួយពីទីភ្នាក់ងារចារកម្មថា ៖«ការដាក់ពង្រាយកងទ័ពកូរ៉េខាងជើងទៅកាន់ប្រទេសរុស្ស៊ីត្រូវបានគេរាយការណ៍ថាបានកើនឡើង ជាមួយនឹងការប៉ាន់ប្រមាណថា អ្នកស្លាប់ និងរបួសក្នុងចំណោមកងកម្លាំងកូរ៉េខាងជើងមានលើសពី ៣០០០នាក់»។
លោកបានបន្ថែមថា ៖«គួរកត់សម្គាល់ កំណត់ហេតុដែលបានរកឃើញលើទាហានដែលបានស្លាប់បង្ហាញថា អាជ្ញាធរកូរ៉េខាងជើងបានដាក់សម្ពាធពួកគេឱ្យធ្វើអត្តឃាត ឬបំផ្ទុះសម្លាប់ខ្លួនឯងមុនពេលចាប់ខ្លួន»។
សមាជិកសភាកូរ៉េខាងត្បូងរូបនេះបានអះអាងថា ៖«ទាហានកូរ៉េខាងជើងខ្វះការយល់ដឹងអំពីសង្គ្រាមទំនើប ហើយត្រូវបានប្រើប្រាស់ជាឈ្នាន់សម្រាប់រុស្ស៊ីក្នុងលក្ខណៈប្រយុទ្ធ ទើបធ្វើឱ្យចំនួនអ្នកស្លាប់មានក្រមិតខ្ពស់»។
គួររំឭកថា កាលពីចុងសប្តាហ៍កន្លងទៅនេះ ប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី បានអះអាងថា រដ្ឋធានីកៀវបានចាប់ទាហានកូរ៉េខាងជើងចំនួន២នាក់ ដែលបានរងរបួស ហើយឥឡូវនេះកំពុងត្រូវបានសួរចម្លើយ។
លោកបើកចំហរចំពោះលទ្ធភាពនៃការដោះដូរឈ្លើយសឹងកូរ៉េខាងជើងជាមួយទាហានអ៊ុយក្រែនដែលត្រូវបានចាប់ខ្លួនដោយរុស្ស៊ីផងដែរ៕
