ភ្លើងឆេះព្រៃសន្ធោសន្ធៅនៅទីក្រុងឡូសអេនជឺឡេស សម្លាប់មនុស្សយ៉ាងហោចណាស់ ៥នាក់ បំផ្លាញអគាររាប់រយខ្នង
កាលីហ្វ័រញ៉ា៖ ភ្លើងឆេះព្រៃដ៏សន្ធោសន្ធៅនៅទីក្រុងឡូសអេនជឺឡេសបានសម្លាប់មនុស្សយ៉ាងហោចណាស់៥នាក់ បំផ្លាញអគាររាប់រយខ្នង និងត្រូវចំណាយធនធានពន្លត់អគ្គិភ័យយ៉ាងច្រើនសន្ធឹក ខណៈដែលមនុស្សជាង១ សែននាក់ត្រូវបានបញ្ជាឱ្យជម្លៀសទៅកាន់កន្លែងសុវត្ថិភាព។
ខ្យល់បក់បោកខ្លាំងបានរារាំងកិច្ចខិតខំប្រឹងប្រែងពន្លត់អគ្គិភ័យ និងបង្កើនរងើកភ្លើងបន្ថែមទៀត។ កង្វះទឹកក៏បានរារាំងដល់កិច្ចខិតខំប្រឹងប្រែងផងដែរ ជាពិសេសនៅតំបន់ប៉ាលីសាដេស (Palisades) ដែលជាតំបន់ឆ្នេរដ៏ធំដែលអណ្តាតភ្លើងបានលេបត្របាក់ផ្ទៃដីជិត ៤៨៥៦ហិកតា។ លោកស្រី ជេនីស ឃ្វីនណូនេស (Janisse Quinones) នាយកប្រតិបត្តិនៃនាយកដ្ឋានទឹក និងថាមពលរបស់ទីក្រុង បាននិយាយនៅក្នុងសន្និសីទសារព័ត៌មានមួយថា ប្រព័ន្ធទឹកក្រុងពឹងផ្អែកលើធុងស្តុកទឹកធំៗចំនួនបី ដែលធុងនីមួយៗផ្ទុកទឹកប្រហែល៣,៧៨ លានលីត្រ។ ធុងទីបី និងចុងក្រោយបានទទេស្អាតនៅប្រហែលម៉ោង ៣ ទៀបភ្លឺ (ម៉ោងនៅទីក្រុងឡូសអេនជឺឡេស)។ ជាមួយនឹងខ្យល់ និងផ្សែងដែលប៉ះពាល់ដល់សមត្ថភាពផ្តល់ជំនួយតាមអាកាស អ្នកពន្លត់អគ្គិភ័យគ្មានទឹកគ្រប់គ្រាន់ដើម្បីទប់ទល់នឹងអណ្តាតភ្លើង។ មន្ត្រីបានជំរុញឲ្យប្រជាពលរដ្ឋកម្រិតការប្រើប្រាស់ទឹក។ អណ្តាតភ្លើងនៅតំបន់ប៉ាលីសាដេស បានឆាបឆេះសំណង់ជាង ១ពាន់ខ្នង ដែលធ្វើឱ្យវាក្លាយជាគ្រោះអគ្គិភ័យដ៏សាហាវបំផុតនៅក្នុងប្រវត្តិសាស្ត្ររបស់ទីក្រុងឡូសអេនជឺឡេស។
ទំហំនៃអណ្តាតភ្លើងបានកើនឡើងធំជាងមុន៤ ដង ចន្លោះពីព្រឹកថ្ងៃពុធដល់ពេលថ្ងៃត្រង់។ ភ្លើងឆេះនៅតំបន់ Eaton ភាគខាងកើតនៃទីក្រុងឡូសអេនជឺឡេស ក្បែរតំបន់ Pasadena ក៏បានរាលដាលយ៉ាងសន្ធោសន្ធៅផងដែរ ចាប់តាំងពីវាឆាបឆេះឡើងកាលពីល្ងាចថ្ងៃអង្គារ ដោយគ្របដណ្ដប់លើផ្ទៃដីជាង៤០៤៧ ហិកតា គិតត្រឹមព្រឹកថ្ងៃពុធ។ ចំណែកនៅតំបន់ភាគពាយព្យនៃទីក្រុងឡូសអេនជឺឡេស ផ្ទៃដីទំហំលើសពី៥០០ ហិកតាត្រូវបានលេបត្របាក់ដោយអគ្គិភ័យ។ មន្ត្រីបាននិយាយថា អគ្គិភ័យទាំង៣ ទីតាំងនេះ មិនទាន់អាចពន្លត់បាននោះទេ។ មន្ត្រីបានព្រមានថា ខ្យល់បក់ខ្លាំងត្រូវបានគេព្យាករថានឹងបន្តមានពេញមួយថ្ងៃ។ ផ្ទៃមេឃនៅពីលើទីក្រុងឡូសអេនជឺឡេស បានបញ្ចេញពន្លឺពណ៌ក្រហមនៅតំបន់ខ្លះ ហើយត្រូវបានគ្របដណ្ដប់ដោយផ្សែងក្រាស់។
នៅពេលដែលអណ្តាតភ្លើងបានរីករាលដាល អ្នកស្រុកចាប់ផ្តើមជម្លៀសចេញ ដែលបង្កឱ្យមានការកកស្ទះយ៉ាងខ្លាំងនៅតាមផ្លូវ ដោយបង្ខំឱ្យពួកគេបោះបង់ចោលរថយន្តរបស់ខ្លួន ដើម្បីគេចពីអណ្តាតភ្លើង។ ទិន្នន័យពី PowerOutage បានបង្ហាញថា ផ្ទះ និងអាជីវកម្មប្រហែល៤០០ ០០០ នៅភាគខាងត្បូងរដ្ឋកាលីហ្វ័រញ៉ាគ្មានអគ្គិសនីប្រើប្រាស់កាលពីថ្ងៃពុធ។ អភិបាលរដ្ឋកាលីហ្វ័រញ៉ា លោក ហ្គាវីន ញូវសោម (Gavin Newsom) បានប្រកាសដាក់ទីក្រុងនេះក្នុងភាពអាសន្នកាលពីថ្ងៃអង្គារ។ សេតវិមានបានប្រកាសថា លោកប្រធានាធិបតី ចូ បៃឌិន គ្រោងនឹងធ្វើទស្សនកិច្ចនៅស្ថានីយពន្លត់អគ្គិភ័យនៅទីក្រុង សាន់តា ម៉ូនីកា ដើម្បីទទួលបានព័ត៌មានសង្ខេបពីមន្ត្រីពន្លត់អគ្គិភ័យ។ ដោយឡែក ប្រធានាធិបតីជាប់ឆ្នោត ដូណាល់ ត្រាំ ដែលនឹងចូលកាន់តំណែងក្នុងរយៈពេលពីរសប្តាហ៍ បានស្តីបន្ទោសគោលនយោបាយបរិស្ថានរបស់លោក ញូវសោម ចំពោះគ្រោះមហន្តរាយ នៅក្នុងការសារបង្ហោះលើកម្មវិធី Truth Social របស់ខ្លួន៕
