ក្រសួងសាធារណការ បដិសេធទាំងស្រុងនូវការចុះផ្សាយរបស់កាសែតក្រៅស្រុកថា «នាយកគម្រោង និងតំណាងធនាគារពិភពលោកទទួលលុយសំណូកពីក្រុមហ៊ុន Poly Changda Engineering ជាង១លានដុល្លារជាថ្នូរនឹងការទទួលបានគម្រោង»
ភ្នំពេញ៖ ក្រសួងសាធារណការ និងដឹកជញ្ជូន កាលពីយប់ថ្ងៃទី៣ ខែមករា ឆ្នាំ២០២៥ បានប្រកាសបដិសេធទាំងស្រុងនូវការចុះផ្សាយរបស់កាសែតក្រៅស្រុកថា៖«នាយកគម្រោង និងតំណាងធនាគារពិភពលោកទទួលលុយសំណូកពីក្រុមហ៊ុន Poly Changda Engineering ជាង១លានដុល្លារអាម៉េរិក ជាថ្នូរនឹងការទទួលបានគម្រោង»។ ក្រៅពីការបដិសេធ ក្រសួង ចាត់ការចុះផ្សាយនេះ ជាការចោទប្រកាន់។
ក្រសួងគូសបញ្ជាក់ថា៖«គណៈកម្មការត្រួតពិនិត្យកិច្ចលទ្ធកម្មអន្តរក្រសួង រវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ មិនដែលបានធ្វើការចរចាណាមួយ ជាមួយក្រុមហ៊ុន Poly Changda Engineering Co., Ltd ស្តីពីការប្រគល់កំណាត់ផ្លូវ៤៣គីឡូម៉ែត្រ ទៅឱ្យក្រុមហ៊ុននេះ ជាថ្នូរនឹងទឹកប្រាក់នោះទេ»។ ក្រសួងជំនាញមួយនេះបំភ្លឺថា កំណាត់ផ្លូវជាតិលេខ៤ ប្រវែង៤៣គីឡូម៉ែត្រ ត្រូវបានប្រគល់ជា«កិច្ចសន្យាជួសជុលថែទាំ»ទៅឱ្យក្រុមហ៊ុនសំណង់បរទេសមួយកាលពីថ្ងៃទី៣០ ខែឧសភា ឆ្នាំ២០២២។ ដោយហេតុថាក្រុមហ៊ុន មិនបានអនុវត្តការងារទៅតាមកាលវិភាគគ្រោងទុក មានការយឺតយ៉ាវហួសហេតុ ក្រសួងបានលុបកិច្ចសន្យាចោលហើយរឹបអូសយកប្រាក់កក់ជាង៩៦ម៉ឺនដុល្លារអាម៉េរិក(៩៦៩,៨៥៧.១៩) ជាថវិកាផាកពិន័យចូលថវិការដ្ឋ។
ក្រសួងបន្តថា គណៈកម្មការត្រួតពិនិត្យកិច្ចលទ្ធកម្មអន្តរក្រសួង បានធ្វើលទ្ធកម្មកំណាត់ផ្លូវនេះ ប្រកបដោយតម្លាភាព អនុលោមយ៉ាងហ្មត់ចត់ទៅតាមនីតិវិធីលទ្ធកម្មរបស់ធនាគារពិភពលោក និងនីតិវិធីលទ្ធកម្មរបស់រាជរដ្ឋាភិបាលកម្ពុជា ដោយមានទីប្រឹក្សាលទ្ធកម្មអន្តរជាតិ១រូបជាជំនាញការ និងមន្ត្រីលទ្ធកម្មធនាគារពិភពលោកគ្រប់គ្រង និងណែនាំជាប្រចាំទៅតាមដំណាក់កាលនីមួយៗ។ នីតិវិធីលទ្ធកម្មរបស់ធនាគារពិភពលោក តម្រូវឱ្យមានពីរដំណាក់កាល គឺដំណាក់កាលបច្ចេកទេស (Technical Part) និងដំណាក់កាលហិរញ្ញវត្ថុ។ មកទល់ត្រឹមថ្ងៃទី២ ខែមករា ឆ្នាំ២០២៥ ក្រសួង បំភ្លឺថា មិនទាន់ដឹងនៅឡើយទេថា ក្រុមហ៊ុនណាដែលជាជ័យលាភីនៃកំណាត់ផ្លូវ ៤៣គីឡូម៉ែត្រនេះ ដោយហេតុថា កញ្ចប់ថវិកាដេញថ្លៃ (Financial Envelop) នៅមិនទាន់បើកនៅឡើយ។
ការចេញបំភ្លឺរបស់ ក្រសួងសាធារណការ នាពេលនេះធ្វើឡើងឆ្លើយតបទៅនឹងកាសែត THE CAMBODIA DAILY ដែលផ្សាយកាលពីថ្ងៃទី២ ខែមករា ឆ្នាំ២០២៥ថា រដ្ឋលេខាធិការក្រសួងសាធារណការមួយរូប រួមជាមួយមន្ត្រីតំណាងធនាគារពិភពលោក (World Bank) ឈ្មោះ ប៊ុន វាសនា បានទទួលលុយសំណូកពីក្រុមហ៊ុន ប៉ូលី ចិន្តា ជាង១លានដុល្លារអាម៉េរិក ជាថ្នូរទទួលបានគម្រោងថែទាំ និងជួសជុលកំណាត់ផ្លូវជាតិលេខ៤។ THE CAMBODIA DAILY ចុះផ្សាយពីរឿងនេះ ដោយសំអាងលើប្រភពពីមន្ត្រីជាន់ខ្ពស់នៃក្រសួងសាធារណការ ដែលសរសេរលិខិតផ្ញើឱ្យខ្លួនផ្សព្វផ្សាយក្នុងលក្ខខណ្ឌមិនបញ្ចេញឈ្មោះ។
