ភ្នំពេញ៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានឱ្យដឹងថា គណៈកម្មាធិការជាតិអូឡាំពិកកម្ពុជា (NOCC) បានរៀបចំព្រឹត្តិការណ៍កីឡាសំខាន់ៗជាច្រើន ទាំងជាតិ និងអន្ដរជាតិជារៀងរាល់ឆ្នាំ ហើយសមិទ្ធផលធំៗ ចំនួន ៣ ដែល NOCC សម្រេចបានក្នុងឆ្នាំ២០២៤នេះ មានដូចជា ការចូលរួមព្រឹត្តិការណ៍កីឡាអូឡាំពិក នៅទីក្រុងប៉ារីស និងការមានវត្តមាន លោក ម៉ាន់ វណ្ណដា ច្រៀងក្នុងពិធីបិទ, កិច្ចសហការជាមួយក្រសួងអប់រំ យុវជន និងកីឡា ក្នុងពិធីបើក-បិទកីឡាជាតិលើកទី៤ និងកីឡាជាតិជនពិការលើកទី២ និងការបំបែកកំណត់ត្រាចំនួនអ្នកចូលរួមរត់ប្រណាំងពាក់កណ្ដាលម៉ារ៉ាតុង នៅសៀមរាប។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍បន្ថែមថា វត្តមានតារាចម្រៀង លោក ម៉ាន់ វណ្ណដា ក្នុងពិធីបិទកីឡាអូឡាំពិកនៅទីក្រុងប៉ារីស ប្រទេសបារាំង បានធ្វើឱ្យបរទេសស្គាល់កម្ពុជា កាន់តែច្បាស់ ហើយក៏ជាមោទកភាពសម្រាប់ NOCC ដែលជាកំណត់ត្រាដំបូងគេ ចំពោះវត្តមានតារាចម្រៀងកម្ពុជា ច្រៀងក្នុងពិធីបិទ។
ឯកឧត្តម បានបន្តថា កម្ពុជាបានចូលរួមព្រឹត្តិការណ៍កីឡាអូឡាំពិក នៅទីក្រុងប៉ារីស ដែលជាព្រឹត្តិការណ៍អន្ដរជាតិ ផ្នែកកីឡាអូឡាំពិក ហើយជាចលនាអូឡាំពិកធំ ហើយជាមោទកភាព និងជោគជ័យក្នុងនាមជាសមាជិករបស់ចលនាអូឡាំពិក។ ក្រៅពីការចូលរួមប្រកួតបំពេញសិទ្ធិ កាតព្វកិច្ច និងការបង្ហាញនូវកេរ្ដិ៍ឈ្មោះ ក៏ដូចជាការបង្ហាញមុខកម្ពុជា លើឆាកអន្ដរជាតិ ក្នុងកម្រិតអូឡាំពិក។ ក្នុងនោះ គណៈកម្មាធិការជាតិអូឡាំពិកកម្ពុជា មានកិច្ចការមួយទៀត គឺ លោក វណ្ណដា ដែលគាត់ត្រូវបានជ្រើស រើសឱ្យធ្វើជាអ្នកចម្រៀងក្នុងពិធីបិទ ដែលក្នុងប្រវត្តិសាស្ដ្រសិល្បករ គ្មានអ្នកចម្រៀងកម្ពុជាណា បានទៅសម្ដែងក្នុងពិធីបិទរបស់អូឡាំពិក ឬក៏បើកអូឡាំពិកទេ។ នេះ គឺជាលើកទី១ ក្នុងកំណត់ត្រាប្រវត្តិសាស្ដ្រដែរ»។
ឯកឧត្តម អគ្គលេខាធិការ បានបន្តថា ចំពោះសមិទ្ធផលមួយទៀត គឺសំដៅលើការរៀបចំពិធីបើក បិទព្រឹត្តិការណ៍កីឡាជាតិលើកទី៤ និងកីឡាជាតិជនពិការលើកទី២ ដែលបានសហការជាមួយក្រសួងអប់រំ យុវជន និងកីឡា ធ្វើឱ្យព្រឹត្តិការណ៍នេះប្រព្រឹត្តទៅដោយរលូន ទទួលបានជោគជ័យ និងជាការបង្ហាញនូវនិរន្ដរភាពកីឡានៅកម្ពុជា។
ឯកឧត្តម បានបន្តទៀតថា អ្នកចូលរួមរត់ទិវារត់ប្រណាំងអន្ដរជាតិពាក់កណ្ដាលម៉ារ៉ាតុង លើកទី២៩ កើនទៅដល់១៤០០០នាក់ ដែលជាកំណត់ត្រាខ្ពស់ជាងគេ ក្នុងរយៈពេលជិត ៣ ទសវត្សរ៍ ។ ព្រឹត្តិការណ៍នេះ មានការគាំទ្រខ្លាំងពីរាជរដ្ឋាភិបាល ហើយក៏មានវត្តមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមរត់ចម្ងាយ ៥គីឡូម៉ែត្រ ផងដែរ។ ព្រឹត្តិការណ៍នេះ មានអត្តពលិកច្រើនជាងព្រឹត្តិការណ៍លើកទី២៨ ឆ្នាំ២០២៣ ដែលមានអ្នកចូលរួម១២០០០នាក់។ ឯកឧត្តម ចាត់ទុកថា ព្រឹត្តិការណ៍ម៉ារ៉ាតុង លើកទី២៩នេះ គឺជាសមិទ្ធផលលេចធ្លោ ក្នុងឆ្នាំ២០២៤។
ឯកឧត្តម វ៉ាត់ ចំរើន បានពន្យល់ថា សមិទ្ធផលនេះ គឺទិវារត់ប្រណាំងពាក់ម៉ារ៉ាតុងអន្ដរជាតិអង្គរ នៅសៀមរាប ដែលត្រូវបានរាជរដ្ឋាភិបាល ជាពិសេសសម្ដេចធិបតី បានយកចិត្តទុកដាក់ និងចូលរួមជំរុញទឹកចិត្ត ឱ្យគណៈកម្មាធិការជាតិអូឡាំពិកកម្ពុជា ធ្វើការដោយរលូន ហើយបំបែកកំណត់ត្រាប្រវត្តិសាស្ដ្រនៃការទាក់ទាញអ្នកចូលរួមជាង ១ម៉ឺននាក់។ ១៤០០០នាក់ គឺជាកំណត់ត្រាខ្ពស់ជាងគេបំផុត ប្រចាំទិវានេះ និងជាព្រឹត្តិការណ៍ធំជាងគេនៅក្នុងការទាក់ទាញភ្ញៀវទេសចរជាតិ និងអន្ដរជាតិ នៅក្នុងព្រឹត្តិការណ៍នេះ។
ឯកឧត្តម វ៉ាត់ ចំរើន បានបន្ថែមថា ក្រៅពីសមិទ្ធលេចធ្លោទាំង៣ ខាងលើ NOCC ក៏មានសកម្មភាពជោគជ័យជាច្រើន ដោយបានសហការជាមួយសហព័ន្ធកីឡាជាតិ ក្រសួង និងស្ថាប័នពាក់ព័ន្ធ។ ក្នុងនោះព្រឹត្តិការណ៍រៀបចំធ្វើជាម្ចាស់ផ្ទះយុទ្ធគុនចម្រុះជើងឯកអាស៊ី លើកទី២, ការប្រកួតជើងឯកគុនខ្មែរជ្រើសរើសពិភពលោក លើកទី៥ និងការប្រកួតយុទ្ធគុនចម្រុះខ្មែរបុរាណ ពានរង្វាន់សម្ដេចបវរធិបតី លើកទី១ និងព្រឹត្តិការណ៍រត់ប្រណាំងពាក់កណ្ដាលម៉ារ៉ាតុង នៅទីក្រុងភ្នំពេញ ព្រះសីហនុ និងសៀមរាបជាដើម។
ក្រៅពីការរៀបចំព្រឹត្តិការណ៍កីឡាជាលក្ខណៈជាតិ និងអន្ដរជាតិ គណៈកម្មាធិការជាតិអូឡាំពិកកម្ពុជា ក៏បានជួយកិច្ចការបណ្ដុះបណ្ដាលធនធានកីឡាករ កីឡាការិនី និងមន្ដ្រីបច្ចេកទេសសហព័ន្ធ។ ក្នុងនោះ NOCC បានបញ្ជូនអត្ដពលិក ៦រូប ទៅហ្វឹកហាត់នៅប្រទេសចិន ក្រោមជំនួយឧបត្ថម្ភពីប្រធានគណៈកម្មាធិការជាតិអូឡាំពិក, រៀបចំវគ្គបណ្ដុះបណ្ដាល មន្ដ្រីបច្ចេកទេសកីឡា និងបង្កើតទំនាក់ទំនងការទូតកីឡាអូឡាំពិកផ្សេងៗ ជាមួយប្រទេសជាសមាជិកចលនាអូឡាំពិក៕
