លោក ដូណាល់ ត្រាំ ហៅការសម្រេចរបស់លោក បៃដិន លើកលែងទោសឱ្យកូនប្រុសខ្លួនឯង ថាជាការរំលោភអំណាច និងជាបរាជ័យនៃប្រព័ន្ធយុត្តិធម៌

វ៉ាស៊ីនតោន៖ ប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានហៅការសម្រេចចិត្តរបស់លោកប្រធានាធិបតីចាំផ្ទះ ចូ បៃដិន លើកលែងទោសឱ្យកូនប្រុសរបស់ខ្លួនឯង គឺលោក Hunter Biden ថាជាការរំលោភអំណាច និងជាបរាជ័យនៃប្រព័ន្ធយុត្តិធម៌។ នេះបើតាមការចេញផ្សាយដោយសារព័ត៌មាន​ ABC News។

លោក ចូ បៃដិន កាលពីថ្ងៃអាទិត្យ ទី១ ខែធ្នូ បានប្រកាសថាលោកបានលើកលែងទោសឱ្យកូនប្រុសរបស់លោក គឺលោក Hunter Biden ដែលជាប់ពិរុទ្ធពីបទធ្វើសេចក្ដីថ្លែងការណ៍ក្លែងក្លាយ ពាក់ព័ន្ធនឹងសាវតាត្រួតពិនិត្យការទិញកាំភ្លើង និងការកាន់កាប់កាំភ្លើងខុសច្បាប់ ព្រមទាំងគេចវេសបង់ពន្ធ។ បើតាមលោក ចូ បៃដិន លោក Hunter Biden បានរងភាពអយុត្តិធម៌ ដោយសារតែ ជាកូនប្រុសរបស់លោក។ ក៏ប៉ុន្តែ លោក ដូណាល់ ត្រាំ បានហៅការសម្រេចចិត្តរបស់លោក ក្នុងការលើកលែងទោសឱ្យកូនប្រុសរបស់ខ្លួនឯងថាជាការរំលោភអំណាច និងបរាជ័យនៃប្រព័ន្ធ យុត្តិធម៌។

«តើការលើកលែងទោសរបស់លោក ចូ ទៅកាន់ Hunter មានរួមបញ្ចូលចំណាប់ខ្មាំងថ្ងៃទី៦ ខែមករា (J-6 Hostages) ដែលបច្ចុប្បន្នកំពុងជាប់ក្នុងពន្ធនាគារដែរឬទេ? នេះជាការបំពានមួយ និងជាបរាជ័យនៃប្រព័ន្ធយុត្តិធម៌»។ នេះជាការគូសបញ្ជាក់របស់លោក លោក ដូណាល់ ត្រាំ ក្នុងការបង្ហោះមួយលើបណ្ដាញទំនាក់ទំនងសង្គម Truth Social កាលពីថ្ងៃអាទិត្យ ហើយចំណាប់ខ្មាំង ថ្ងៃទី៦ ខែមករា ឬ J-6 Hostages គឺលោក ត្រាំ ចង់សំដៅលើអ្នកគាំទ្ររបស់លោកដែលត្រូវបានកាត់ទោសពីបទឧក្រិដ្ឋពាក់ព័ន្ធនឹងកុបកម្មចូលអុកឡុក វិមាន Capitol កាលពីថ្ងៃទី៦ ខែមករា ឆ្នាំ២០២១។

គួរបញ្ជាក់ថា កន្លងមក សេតវិមានបានអះអាងម្ដងហើយម្ដងទៀតថាលោក បៃដិន នឹងមិនលើកលែងទោស ឬក៏បន្ធូរបន្ថយទោសឱ្យកូនប្រុសរបស់លោកនោះទេ។ លោក Hunter Biden កំពុង ប្រឈមុខនឹងទោសជាប់ពន្ធនាគារអតិបរមា ២៥ឆ្នាំ ពាក់ព័ន្ធនឹងសំណុំរឿងគេចពន្ធ ព្រមទាំងទោសជាប់ពន្ធនាគារ១៧ឆ្នាំ ពីបទធ្វើសេចក្ដីថ្លែងការណ៍ក្លែងក្លាយពាក់ព័ន្ធនឹងសាវតាត្រួតពិនិត្យ ការទិញកាំភ្លើង និងការកាន់កាប់កាំភ្លើងខុសច្បាប់៕