ម៉ិកស៊ិកព្រមានថា ការដាក់ពន្ធដោយប្រធានាធិបតីជាប់ឆ្នោត ដូណាល់ ត្រាំ នឹងប៉ះពាល់ដល់ការងារអាម៉េរិក៤សែនកន្លែង

ម៉ិចស៊ីកូ៖ ប្រធានាធិបតី និងរដ្ឋមន្ត្រីសេដ្ឋកិច្ចរបស់ប្រទេសម៉ិកស៊ិក លោកស្រី ក្លូឌា ស៊ីនបាម បានផ្តល់រូបភាពច្បាស់បំផុតអំពីរបៀបដែលរដ្ឋាភិបាលរបស់ពួកគេ នឹងឆ្លើយតបចំពោះពន្ធដែលបានស្នើឡើងដោយលោកប្រធានាធិបតីជាប់ឆ្នោត ដូណាល់ ត្រាំ លើប្រទេសនេះ ដោយព្រមានថា នឹងធ្វើឱ្យបាត់បង់ការងារអាម៉េរិកចំនួន៤សែនកន្លែង។

ថ្លែងនៅក្នុងសន្និសីទសារព័ត៌មាន ប្រធានាធិបតីម៉ិកស៊ិក បាននិយាយថា ការឆ្លើយតបរបស់ម៉ិកស៊ិកនឹងមានភាពរហ័សរហួន ប្រសិនបើលោក ត្រាំ ធ្វើតាមផែនការនោះ។

លោកស្រីអះអាងថា៖«ប្រសិនបើអាម៉េរិកដំឡើងពន្ធ ម៉ិកស៊ិកក៏នឹងដំឡើងពន្ធដែរ»។ ការអត្ថាធិប្បាយនេះ គឺជាការឆ្លើយតបចុងក្រោយបំផុត ចំពោះសេចក្ដីថ្លែងការណ៍របស់លោក ត្រាំ ដែលគ្រោងនឹងដាក់ពន្ធបន្ថែមមិនត្រឹមតែលើប្រទេសចិនប៉ុណ្ណោះទេ ប៉ុន្តែនៅលើប្រទេសកាណាដា និងម៉ិកស៊ិកផងដែរ ក្នុងអត្រា២៥ភាគរយ។ ទន្ទឹមនោះ រដ្ឋមន្ត្រីក្រសួងសេដ្ឋកិច្ច លោក ម៉ាសេឡូ អេប្រាដ ក៏បានព្រមានប្រឆាំងនឹងលោក ត្រាំ ក្នុងការចាប់ផ្តើមសង្រ្គាមពាណិជ្ជកម្មក្នុងតំបន់ ដោយថា វានឹងប៉ះពាល់យ៉ាងធ្ងន់ធ្ងរដល់កម្មករអាម៉េរិក។

លោកបាននិយាយថា ការងារប្រហែល៤សែនកន្លែងនឹងបាត់បង់នៅក្នុងសហរដ្ឋអាម៉េរិក ដោយបានចង្អុលបង្ហាញពីការសិក្សាមួយដោយផ្អែកលើតួលេខពីក្រុមហ៊ុនផលិតរថយន្តអាម៉េរិក ដែលផលិតនៅម៉ិកស៊ិក។

លោក បាន បន្ថែម ថា ផល ប៉ះ ពាល់ នឹ ង ពង្រីក លើស ពី កម្មករ រហូតដល់ អ្នក ប្រើ ប្រាស់ អាម៉េរិក ជាឧទាហរណ៍ រថយន្ត Pick-up ភាគច្រើនដែលលក់នៅសហរដ្ឋអាម៉េរិក ត្រូវបានផលិតនៅក្នុងប្រទេសម៉ិកស៊ិក។

លោក អះអាង ថា ពន្ធ របស់ លោក ត្រាំ នឹង បន្ថែមថ្លៃដើមចំនួន៣០០០ដុល្លារដល់ តម្លៃ រថយន្ត ថ្មី មួយគ្រឿង។ លោក ត្រាំ បានសន្យាថា នឹងប្រើប្រាស់ពន្ធគយដើម្បីជំរុញឧស្សាហកម្មផលិតកម្មរបស់សហរដ្ឋអាម៉េរិក។

នៅក្នុងសេចក្ដីថ្លែងការណ៍របស់លោកកាលពីថ្ងៃចន្ទ លោក ត្រាំ បាននិយាយថា លោកនឹងដាក់ពន្ធបន្ថែម ប្រសិនបើប្រទេសទាំងបីមិនចាត់វិធានការបន្ថែមទៀតដើម្បីដោះស្រាយការធ្វើចំណាកស្រុកខុសច្បាប់ និងការរត់ពន្ធគ្រឿងញៀនចូលទៅក្នុងសហរដ្ឋអាម៉េរិក។

នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau) បានពិភាក្សាជាមួយលោក ត្រាំ រួចហើយអំពីការគំរាមកំហែងពន្ធ ដោយសង្កត់ធ្ងន់លើទំនាក់ទំនងដ៏យូរអង្វែងរវាងប្រទេសទាំងពីរ៕