សហគមន៍មូលដ្ឋាន និងសមាគមនិកាយសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ប្រគល់ទទួលអគារសិក្សា និងសមិទ្ធផលនានា ចំនួន៥ខ្នង ក្រោយជួសជុលរួចជាស្ថាពរ
ភ្នំពេញ៖ សហគមន៍មូលដ្ឋាន និងសមាគមនិកាយសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ បានជួយលើកស្ទួយលើវិស័យអប់រំនៅកម្ពុជា តាមរយៈ ការជួយជួសជុលអគារសិក្សា ជាក់ស្តែងអគារសិក្សា និងសមិទ្ធផលនានា ដែលបានជួសជុលរួចជាស្ថាពរ នៅវិទ្យាល័យស្វាយចេក បឋមសិក្សាសុខសាន្ត បឋមសិក្សាគីឡូម៉ែត្រ៤ បឋមសិក្សាចង្ហា និងបឋមសិក្សាម្កាក់ ត្រូវបានប្រគល់ឱ្យប្រើប្រាស់ជាផ្លូវការ ប្រារព្ធធ្វើឡើងនៅវិទ្យាល័យ ស្វាយចេក រសៀលថ្ងទី២៦ ខែវិច្ឆិកា ឆ្នាំ២០២៤។
លោក ប៊ែរី ចូណាថុន អួត អ្នកឯកទេសកិច្ចការមនុស្សធម៌ របស់សហគមន៍មូលដ្ឋាន និងសមាគមនិកាយសាសនាចក្រ នៃព្រះយេស៊ូវគ្រីស្ទ នៃពួកបរិសុទ្ធ ថ្ងៃចុងក្រោយ បានបង្ហាញពីអារម្មណ៍រីករាយ ដែលបានចូលរួមចំណែកជាមួយវិស័យអប់រំនៅកម្ពុជា តាមរយៈ ការជួយជួសជុលអគារសិក្សាឡើងវិញ ដើម្បីឱ្យសិស្សានុសិស្សបានសិក្សារៀនសូត្រ ដើម្បីក្លាយជាធនធានដ៏សំខាន់សម្រាប់កម្ពុជា។
លោកបន្តថា តាមរយៈ ការជួយជួសជុលអគារសិក្សានេះ គឺចង់ឃើញយុវជន សិស្សានុសិស្ស មានចំណេះដឹងសម្រាប់អនាគត់របស់ខ្លួន ដើម្បីក្រុមគ្រួសារ និងសង្គមជាតិ។ ហើយនិងក្រុមការងារ និងបន្តជួយដល់វិស័យអប់រំ និងវិស័យដ៏ទៃទៀតទៅតាមលទ្ធភាពដែលអាចជួយទៅបាន។
នាឱកាសនោះលោក លី សុវណ្ណារិទ្ធ អភិបាលខេត្តស្តីទី បានថ្លែងអំណរគុណដល់សហគមន៍មូលដ្ឋាន និងសមាគមនិកាយសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ដែលបានចូលរួមចំណែកជាមួយនឹងរាជរដ្ឋាភិបាលកម្ពុជាជាពិសេសក្នុងវិស័យអប់រំ តាមរយៈការជួយជួសជុលសាលានិងសមិទ្ធផលនានា ដើម្បីសិស្សានុសិស្សបានសិក្សារៀនសូត្រប្រកបដោយចំណេះដឹង។
ក្នុងនោះដែរលោក បានលើកឡើងថា រាជរដ្ឋាភិបាលកម្ពុជា នីតិកាលទី៧នៃរដ្ឋសភា បានដាក់ចេញនូវវិធានការគន្លឹះចំនួន៥ ក្នុងនោះក៏មានវិធានការគន្លឹះក្នុងវិស័យអប់រំដែលមានគោលដៅលើកកម្ពស់គុណភាពអប់រំ។ ដោយឆ្នាំទី១ នៃនីតិកាល ទី៧នៃរដ្ឋសភា រាជរដ្ឋាភិបាល តាមរយៈក្រសួងអប់រំ យុវជន និងកីឡា បានយកចិត្តទុកដាក់និងដាក់ចេញនូវកម្មវិធីផ្សេងៗ សំដៅលើកកម្ពស់គុណភាពអប់រំ ដោយផ្តោតលើការពង្រឹងគុណភាពសាលារដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា តាមរយៈវិធានការ ចំនួន៤ រួមមាន ៖ ទី១-ការពង្រឹងអភិបាលកិច្ច, ទី២-ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា ឱ្យស្របទៅតាមតម្រូវការក្នុងការពង្រឹង ចំណេះដឹង វិន័យ សីលធម៌ និងឥរិយាបថរបស់សិស្ស, ទី៣-ការយកចិត្តទុកលើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី៤-ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យ ស្លោក«ភាពជាដៃគូរដ្ឋ និងសហគមន៍ ដើម្បីការអប់រំ»។
ជាមួយគ្នានោះដែរ លោកអភិបាលស្តីទី ក៏បានផ្តាំផ្ញើដល់ប្អូនសិស្សានុសិស្សទាំងអស់ ត្រូវធ្វើជាកូនល្អ មិត្តល្អ សិស្សល្អនិងខិតខំសិក្សារៀនសូត្រ ក្រៅពីការងារជួយឪពុកម្តាយ ត្រូវលេងកីឡាដើម្បីសុខភាព មិនត្រូវបង្កជាក្រុមក្មេងទំនើងនិងនៅឲ្យឆ្ងាយពីគ្រឿងញៀន ។
សូមបញ្ជាក់ថា ពិធីប្រគល់ទទួលអគារសិក្សា និងសមិទ្ធនានា ដែលបានជួសជុលរួចជាស្ថាពរ នូវអគារសិក្សា ដែលជាជំនួយរបស់សមាគមនិកាយសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធនៃថ្ងៃចុងក្រោយ ចំនួន៥ខ្នង ២៤បន្ទប់, បង្គន់អនាម័យ ចំនួន ៣ខ្នង ១២បន្ទប់, កន្លែងលាងដៃ ចំនួន ៣ និងឡដុតសំរាម ចំនួន ៥ មានទីតាំង ១.សាលាបឋមសិក្សាម្នាក់ អគារ ១ខ្នង ៥បន្ទប់ និងឡដុតសំរាម ១ (ក្រុងសិរីសោភ័ណ), ២.វិទ្យាល័យស្វាយចេក អគារ ១ខ្នង ៥បន្ទប់ និងឡដុតសំរាម ១(ស្រុកស្វាយចេក) ៣.បឋមសិក្សាសុខ សាន្ត(ក្រុងប៉ោយប៉ែត) អគារ ១ខ្នង ៣បន្ទប់,បង្គន់ ១ខ្នង៤បន្ទប់ និងកន្លែងលាងដៃ១ និងឡដុតសំរាម១ ។ ៤.បឋមសិក្សា គីឡូម៉ែត្រលេខ៤ (ក្រុងប៉ោយប៉ែត) អគារសិក្សា ១ខ្នង ៦បន្ទប់, បង្គន់ ១ខ្នង ៤បន្ទប់, កន្លែង លាដៃ១ និងឡដុតសំរាម១ ។ ៥.បឋមសិក្សាចង្ហា(ស្រុកអូរជ្រៅ) អគារសិក្សា ១ខ្នង ៥បន្ទប់, បង្គន់ ១ខ្នង ៤បន្ទប់,កន្លែងលាដៃ១ និងឡដុតសំរាម១ រួមនឹងបានបន្តជួសជុលអគារសិក្សាជាបន្តបន្ទាប់ទៀត នីក្នុងខេត្តបន្ទាយុំានជ័យផងដែរ៕
