ឧបនាយករដ្ឋមន្ត្រី ហង់ជួន ណារ៉ុន ថ្លែងអំណរគុណប្រជាជន និងរដ្ឋាភិបាលកូរ៉េ ដែលបានបរិច្ចាគថវិកាចូលរួមក្នុងកិច្ចអភិវឌ្ឍកម្ពុជា ពិសេសវិស័យអប់រំ

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និង ឯកឧត្តម Park Jung-wook ឯកអគ្គរដ្ឋទូតសាធារណរដ្ឋកូរ៉េប្រចាំព្រះរាជាណាចក្រកម្ពុជា នាថ្ងៃទី២៥ ខែវិច្ឆិកា ឆ្នាំ២០២៤ បានអញ្ជើញចូលរួមជាសហអធិបតី ក្នុងពិធីអបអរសាទរគម្រប់ខួប២០ឆ្នាំ របស់អង្គការហ្គូដណេប៊ឺសកម្ពុជា(Good Neighbor Cambodia) និងមានការចូលរួមពី លោកនាយកប្រចាំប្រទេសអង្គការរហ្គូដណេប៊ឺសកម្ពុជា ឯកឧត្តម លោកជំទាវ លោក លោកស្រី តំណាងអភិបាលខេត្ត តំណាងដៃគូអភិវឌ្ឍន៍ ភ្ញៀវជាតិ និងអន្តរជាតិ ក៏ដូចជាអ្នកពាក់ព័ន្ធទាំងអស់។

ក្នុងឱកាសនេះ ឯកឧត្តម ឯកអគ្គរដ្ឋទូតសាធារណរដ្ឋកូរ៉េប្រចាំព្រះរាជាណាចក្រកម្ពុជា បានកោតសរសើរ និងវាយតម្លៃខ្ពស់ចំពោះសមិទ្ធផលរបស់អង្គការរហ្គូដណេប៊ឺសកម្ពុជាតាំងពីឆ្នាំ២០០៤មក ក្នុងការចូលរួមគាំទ្រចក្ខុវិស័យ និងយុទ្ធសាស្ត្រអភិវឌ្ឍន៍ប្រទេសកម្ពុជារបស់រាជរដ្ឋាភិបាល ក៏ដូចជាបានជួយគាំទ្រលើគម្រោង ODA (Official Development Assistance) របស់សាធារណរដ្ឋកូរ៉េ និងបន្តជឿជាក់ថា រាជរដ្ឋាភិបាលកម្ពុជា រដ្ឋាភិបាលកូរ៉េ អង្គការរហ្គូដណេប៊ឺសកម្ពុជា និងដៃអភិវឌ្ឍន៍ទាំងអស់ នឹងបន្តកិច្ចសហប្រតិបត្តិការជាមួយគ្នាបន្ថែមទៀត ក្នុងការជំរុញ ការអភិវឌ្ឍសហគមន៍ លើកកម្ពស់គម្រោងអភិវឌ្ឍន៍ គាំទ្របន្ថែមលើវិស័យអប់រំ និងជាពិសេសលើកកម្ពស់សុខុមាលភាពប្រជាជន។

មានប្រសាសន៍ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចូលរួមអបអរសាទរថ្ងៃគម្រប់២០ឆ្នាំ របស់អង្គការហ្គូដណេប៊ឺសកម្ពុជា(Good Neighbor Cambodia) និងបានវាយតម្លៃខ្ពស់ចំពោះសមិទ្ធផលដែលអង្គការហ្គូដណេប៊ឺសកម្ពុជាសម្រេចបាននាពេលកន្លងមក។ បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ក៏បានកោតសរសើរ និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងសហការីរបស់អង្គការហ្គូដណេប៊ឺសកម្ពុជា ដែលបានយកចិត្តទុកដាក់ខ្ពស់ចំពោះបេសកកម្មរបស់ខ្លួន ក្នុងការចូលរួមចំណែកជាមួយក្រសួងអប់រំ យុវជន និងកីឡាក៏ដូចជាចូលរួមក្នុងកិច្ចអភិវឌ្ឍនៃព្រះរាជាណាចក្រកម្ពុជា ឆ្ពោះទៅបម្រើផលប្រយោជន៍របស់កុមារ និងប្រជាជនកម្ពុជានាពេលកន្លងមក។

ក្នុងរយៈពេល២០ឆ្នាំនេះ អង្គការហ្គូដណេប៊ឺសកម្ពុជា(Good Neighbor Cambodia) បានបំពេញតួនាទី និងភារកិច្ចយ៉ាងសកម្មក្នុងការលើកកម្ពស់សុខុមាលភាពប្រជាជន និងការអភិវឌ្ឍប្រទេសជាតិដោយផ្តោតជាសំខាន់លើកម្មវិធីអភិវឌ្ឍន៍ រួមមាន៖ ១). ផ្នែកគាំពារកុមារ ២). វិស័យអប់រំ ៣). វិស័យសុខាភិបាល ៤). ផ្នែកទឹកស្អាត អនាម័យល្អ ៥). វិស័យកសិកម្ម និងអភិវឌ្ឍន៍ជនបទ ៦). ផ្នែកបរិស្ថាន ៧). ផ្នែកបង្កើនប្រាក់ចំណូលជូនប្រជាជនសហគមន៍ ៨). ផ្នែកការស្វែងរកមតិគាំទ្រ និង៩). ផ្នែកជំនួយសង្រ្គោះបន្ទាន់ និងការឆ្លើយតបលើគ្រោះមហន្តរាយ។

ជាមួយគ្នានេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ក៏បានថ្លែងអំណរគុណយ៉ាងជ្រាលជ្រៅចំពោះប្រជាជននិងរដ្ឋាភិបាលកូរ៉េ ដែលបានបរិច្ចាគថវិកាចូលរួមក្នុងកិច្ចអភិវឌ្ឍកម្ពុជា ជាពិសេសចំពោះវិស័យអប់រំ យុវជន និងកីឡា។

សារជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះអង្គការហ្គូដណេប៊ឺសកម្ពុជា(Good Neighbor Cambodia) អាជ្ញាធរមូលដ្ឋាន ដៃគូអភិវឌ្ឍជាតិ និងអន្តរជាតិ ព្រមទាំងសហគមន៍ទាំងអស់ ដែលបានសហការ និងចូលរួមគាំទ្រក្នុងការបំពេញបេសកកម្មរបស់អង្គការរហ្គូដណេប៊ឺសកម្ពុជា និងបានលើកទឹកចិត្តឱ្យអាជ្ញាធរគ្រប់លំដាប់ថ្នាក់ ក៏ដូចជាអ្នកពាក់ព័ន្ធទាំងអស់ ឱ្យបន្តកិច្ចសហការឱ្យបានល្អជាមួយអង្គការហ្គូដណេប៊ឺសកម្ពុជាលើគម្រោងនានា ដើម្បីបង្កើតឱកាសដល់សិស្សានុសិស្ស យុវជន និងប្រជាពលរដ្ឋក្នុងសហគមន៍ឱ្យទទួលបានប្រយោជន៍កាន់តែច្រើនថែមទៀតចេញពីការអនុវត្តកម្មវិធីអភិវឌ្ឍន៍៕