រដ្ឋមន្ត្រីក្រសួងអប់រំកម្ពុជា និងឯកឧត្តមឯកអគ្គរដ្ឋទូតចិន អញ្ជើញជាអធិបតីក្នុងវគ្គផ្តាច់ព្រ័ត្រនៃកម្មវិធីប្រកួតចម្រៀងចិន «ពានរង្វាន់ឯកអគ្គរដ្ឋទូត» ឆ្នាំ២០២៤
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និង ឯកឧត្តម វ៉ាង វិនពីន ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា នាថ្ងៃទី១៣ ខែវិច្ឆិកា ឆ្នាំ២០២៤ បានអញ្ជើញចូលរួមជាសហធិបតី ក្នុងវគ្គផ្តាច់ព្រ័ត្រនៃកម្មវិធីប្រកួតចម្រៀងចិន «ពានរង្វាន់ឯកអគ្គរដ្ឋទូត» ឆ្នាំ២០២៤។ បេក្ខជនឆ្នើមចំនួន១៦នាក់ក្នុងចំណោមបេក្ខជន១១៨នាក់ មកពីរាជធានី-ខេត្តក្រុងនានា បានចូលរួមក្នុងការប្រកួតនេះ។
បេក្ខជនទាំងអស់បានបកស្រាយបទចម្រៀងចិនពិរោះនិងមានប្រជាប្រិយភាពខ្ពស់ ដែលជាការបង្ហាញនូវទេពកោសល្យ និងជាសមិទ្ធផលនៃការសិក្សាភាសាចិនផងដែរ។ ជាលទ្ធផល សូមចូលរួមអបអរសារទរដល់ បេក្ខជន ម៉ា លីនណា មកពី សាលារៀន ទួនហ្វា បានទទួលជ័យលាភីទី១ ក្នុងការប្រកួតចម្រៀងចិន «ពានរង្វាន់ឯកអគ្គរដ្ឋទូត» ឆ្នាំ២០២៤ នេះ។
ក្នុងឱកាសនេះ ឯកឧត្តម ឯកអគ្គរដ្ឋទូត បានបញ្ចាក់ថា បទចម្រៀងចិន មានបង្កប់នូវមនោសញ្ចេតនា និងផ្នត់គំនិតរបស់ប្រជាជនចិន។ ការប្រកួតនេះ ក៏បានបង្ហាញអំពីកម្រិតខ្ពស់នៃការផ្លាស់ប្តូររវាងប្រជាជននិងប្រជាជន កម្ពុជា-ចិន ក្នុងវិស័យវប្បធម៌ និងភាសា ឯកឧត្តម ឯកអគ្គរដ្ឋទូត សង្ឃឹមថា សិស្សានុសិស្ស និងនិស្សិតដែលជាបេក្ខជនប្រកួត និងទស្សនិកជន នឹងបន្តធ្វើជាបេសកជននៃចំណងរវាងមិត្តភាពកម្ពុជា-ចិន បន្ថែមទៀត។
ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងថា ការប្រកួតបែបនេះ គឺជាកម្លាំងចលករដ៏សំខាន់ក្នុងការលើកកម្ពស់ការអប់រំភាសាចិននៅប្រទេសកម្ពុជា និងការផ្លាស់ប្តូររវាងប្រជាជនប្រទេសទាំងពីរ សំដៅឆ្ពោះទៅការកសាងកម្លាំងយុវជនដ៏មានសក្តានុពល សម្រាប់បន្តវេនពូនជ្រំមិត្តភាពដ៏យូរលង់របស់ប្រទេសទាំងពីរឱ្យកាន់តែជិតស្និតពីមួយជំនាន់ទៅមួយជំនាន់ទៀត។
សារជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់ អគ្គរដ្ឋទូតចិនប្រចាំកម្ពុជា រាជបណ្ឌិតសភាកម្ពុជា និងអ្នកពាក់ព័ន្ធទាំងអស់ ដែលបានផ្តួចផ្តើម សម្របសម្រួល និងគាំទ្របង្កើតការប្រកួតនេះឡើង ដើម្បីផ្តល់ឱកាសឱ្យបេក្ខជនបានបញ្ចេញសមត្ថភាពរបស់ខ្លួន និងជំរុញការអនុវត្តស្មារតីឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤ និងកិច្ចសហប្រតិបត្តិការអប់រំភាសាចិន៕
