អ៊ីរ៉ង់បដិសេធគម្រោងសម្លាប់លោក Trump
បរទេស៖ អ៊ីរ៉ង់បានបដិសេធការចោទប្រកាន់របស់សហរដ្ឋអាមេរិកថា ខ្លួនប៉ុនប៉ងរៀបចំផែនការធ្វើឃាតប្រធានាធិបតីជាប់ឆ្នោត លោក Donald Trump នៅមុនការបោះឆ្នោតខែវិច្ឆិកា។
អ៊ីរ៉ង់បានច្រានចោលការចោទប្រកាន់នេះថាជាការបោកបញ្ឆោតដែលរៀបចំឡើងដោយតួអង្គគាំទ្រអ៊ីស្រាអែលក្នុងគោលបំណងធ្វើឱ្យភាពតានតឹងកាន់តែខ្លាំងឡើងរវាងទីក្រុងវ៉ាស៊ីនតោន និងទីក្រុងតេអេរ៉ង់។
កាលពីថ្ងៃសុក្រ ក្រសួងយុត្តិធម៌អាមេរិកបានអះអាងថា មន្ត្រីអ៊ីរ៉ង់បានស្នើសុំបុរសម្នាក់ឈ្មោះ Farhad Shakeri ឱ្យផ្តល់ផែនការដើម្បីសម្លាប់លោក Trump ដោយបន្ថែមថាគាត់ក៏មានភារកិច្ចធ្វើឃាតពលរដ្ឋអាមេរិក និងអ៊ីស្រាអែលនៅខាងក្នុងសហរដ្ឋអាមេរិកផងដែរ។
លោក Shakeri ត្រូវបានគេពិពណ៌នាថាជាជនជាតិអាហ្វហ្គានីស្ថានដែលរស់នៅក្នុងទីក្រុង Tehran បន្ទាប់ពីត្រូវបាននិរទេសចេញពីសហរដ្ឋអាមេរិកក្នុងឆ្នាំ២០០៨ បន្ទាប់ពីកាត់ទោសជាប់ពន្ធនាគាររយៈពេលវែងពីបទប្លន់។
ការចោទប្រកាន់នេះក៏មានជាប់ពាក់ព័ន្ធនឹងពលរដ្ឋអាមេរិកពីរនាក់គឺ លោក Carlisle Rivera និងលោក Jonathan Loadholt ដែលត្រូវបានចោទប្រកាន់ថាបានជួយ Tehran តាមដានពលរដ្ឋអាមេរិកដើមកំណើតអ៊ីរ៉ង់។
លោក Christopher Wray នាយក FBI បានឲ្យដឹងនៅក្នុងសេចក្តីថ្លែងការណ៍មួយថា ការចោទប្រកាន់ដែលបានប្រកាសនៅថ្ងៃនេះបង្ហាញឱ្យឃើញពីការបន្តការប៉ុនប៉ងដ៏អាក្រក់របស់អ៊ីរ៉ង់ក្នុងគោលដៅលើពលរដ្ឋអាមេរិក រួមទាំងប្រធានាធិបតីជាប់ឆ្នោត លោក Donald Trump មេដឹកនាំរដ្ឋាភិបាលផ្សេងទៀត និងអ្នកប្រឆាំងដែលរិះគន់របបនេះក្នុងទីក្រុង Tehran។
