ប្រុងប្រយ័ត្ន! អាជ្ញាធររកឃើញករណីឆបោកតាមអនឡាញថ្មី ក្រោមរូបភាពក្លែងបន្លំជាមន្ត្រីអគ្គិសនីកម្ពុជា

ភ្នំពេញ៖ ថ្មីៗនេះ ក្រុមជនខិលខូច បានផ្ដើមប្រើវិធីសាស្ដ្របោកប្រាស់ ក្រោមរូបភាពបន្លំខ្លួនជាមន្ត្រីនៃអគ្គិសនីកម្ពុជា ទាក់ទងមកជនរងគ្រោះ រួចបញ្ឆោតឱ្យជនរងគ្រោះ បង្ហាញលេខសម្ងាត់ចូលកម្មវិធីធនាគារ។

យោងតាមនាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា ជនខិលខូចបានក្លែងបន្លំខ្លួនជា មន្រ្តីនៃអគ្គិសនីកម្ពុជា (EDC) ហើយទាក់ទងមកជនរងគ្រោះ និងណែនាំឱ្យជនរងគ្រោះដំឡើងកម្មវិធី EDC ដើម្បីទាញយកទំនុកចិត្តពីជនរងគ្រោះ បន្ទាប់មក ណែនាំឱ្យដំឡើងកម្មវិធីឈ្មោះ Tailscale ដើម្បីគ្រប់គ្រងទូរសព្ទពីចម្ងាយ រួចបញ្ឆោតឱ្យជនរងគ្រោះ បង្ហាញលេខសម្ងាត់ចូលកម្មវិធីធនាគារ ដោយឆបោកថា ដើម្បីទទួលលេខកូដសម្ងាត់របស់កម្មវិធី EDC នៅក្នុងសារជូនដំណឹង (Notification) របស់កម្មវិធីធនាគារ។ ចុងក្រោយ..គេនឹងលួចប្រើប្រាស់គណនីធនាគាររបស់ជនរងគ្រោះ ដើម្បីលួចផ្ទេរប្រាក់ចេញ។

បន្ថែមលើនេះ នាយកដ្ឋានប្រឆាំងបទល្មើសបច្ចេកវិទ្យា សូមក្រើនរំលឹកដល់សាធារណជនទាំងអស់ មេត្តាគប្បីប្រុងប្រយ័ត្នដូចខាងក្រោម៖ ទី១.ផ្ទៀងផ្ទាត់៖ប្រសិនបើអ្នកទទួលបានសារ ឬការហៅទូរសព្ទដែលមិនព្រាងទុក សូមបញ្ជាក់ពីអត្តសញ្ញាណរបស់បុគ្គល តាមរយៈប្រភពពិតប្រាកដជាមុនសិន។ ទី២.កុំប្រញាប់៖ ជនឆបោកប្រើប្រាស់ ភាពបន្ទាន់ ដើម្បីដាក់សម្ពាធអ្នកធ្វើសកម្មភាពលឿន។ ទី៣.ចំណាយពេលរបស់អ្នក ហើយគិតឱ្យបានច្បាស់លាស់! និងទី៤.កុំចែករំលែកព័ត៌មានសម្ងាត់៖ អង្គការស្របច្បាប់នឹងមិនសួររកពាក្យសម្ងាត់ លេខកូដ OTP ឬព័ត៌មានរបស់គណនីធនាគារ តាមរយៈសារ ឬការហៅទូរសព្ទឡើយ៕