ទេសាភិបាលធនាគារជាតិនៃកម្ពុជា ស្នើឲ្យពលរដ្ឋប្រុងប្រយ័ត្ន ចំពោះការចាញ់បោកពីការខ្ចីកម្ចីក្រៅផ្លូវការ និងការវិនិយោគទទួលបានការប្រាក់ខ្ពស់ហួសហេតុ
ភ្នំពេញ៖ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានបង្ហាញការព្រួយបារម្ភ និងស្នើឱ្យប្រជាពលរដ្ឋមានការប្រុងប្រយ័ត្ន ចំពោះការចាញ់បោកពីការខ្ចីកម្ចីក្រៅផ្លូវការ និងការវិនិយោគទទួលបានការប្រាក់ខ្ពស់ហួសហេតុ ស្របពេលសេដ្ឋកិច្ចមិនសូវល្អ។
ក្នុងសន្និសីទសារព័ត៌មាន ស្តីពី «ស្ថានភាពវិស័យធនាគារ និងហិរញ្ញវត្ថុនៅកម្ពុជា» នាថ្ងៃទី៨ ខែតុលា ឆ្នាំ២០២៤ លោកជំទាវ ជា សិរី បានលើកឡើងថា ការផ្សព្វផ្សាយការផ្តល់ឥណទានក្រៅផ្លូវការ បានកើតឡើងច្រើន តាមបណ្តាញសង្គម និងការបិទប្រកាសលេខទូរសព្ទ តាមដើមឈើក្នុងទីសាធារណៈ ហើយគ្មានទីតាំងច្បាស់ជាដើម។ ជាមួយគ្នានេះ ការផ្សព្វផ្សាយពីការសន្យាដាក់លុយ ទទួលបានការប្រាក់ហួសហេតុ ដូចជា វិនិយោគ៣០០ដុល្លារ និងទទួលបាន ១៨០០ដុល្លារ បន្ទាប់ពី២៤ម៉ោង, វិនិយោគ ៥០០ដុល្លារ នឹងទទួលបាន ៣៥០០ដុល្លារ បន្ទាប់ពី២៤ម៉ោង, វិនិយោគ ១០០០ដុល្លារ នឹងទទួលបាន ៨៥០០ដុល្លារ បន្ទាប់ពី២៤ម៉ោង ក៏មានច្រើនផងដែរ។
ទេសាភិបាលធនាគារជាតិនៃកម្ពុជា បានអំពាវនាវឱ្យប្រជាជនមានការប្រយ័ត្ន ព្រោះអ្វីដែលងាយពេក និងស្រួលពេក គួរពិចារណាឡើងវិញ ហើយប្រសិនបើត្រូវការកម្ចី សូមឱ្យខ្ចីនៅក្នុងប្រព័ន្ធធនាគារ និងមីក្រូហិរញ្ញវត្ថុ ដែលមានអាជ្ញាប័ណ្ណពីធនាគារជាតិនៃកម្ពុជា។
ទេសាភិបាលធនាគារជាតិនៃកម្ពុជា បន្ថែមថា ក្នុងអំឡុងពេលដែលប្រជាពលរដ្ឋមានវិបត្តិហិរញ្ញវត្ថុ មានអ្នកឆ្លៀតឱកាសច្រើន ព្រោះនៅពេលដែលគាត់មកស្នើសុំកម្ចីផ្លូវការ នៅតាមបណ្តាគ្រឹះស្ថានធនាគារ និងមីក្រូហិរញ្ញវត្ថុមិនបាន ប្រជាពលរដ្ឋអាចនឹងងាកទៅខ្ចីក្រៅការ ដែលមានភាពងាយស្រួល ក្នុងការទទួលបានកម្ចី ៕
