ថ្នាក់ដឹកនាំអគ្គនាយកដ្ឋានពន្ធនាគារ អញ្ជើញចូលរួមកម្មវិធីរត់ម៉ារ៉ាតុងរបស់សមាគមពន្ធនាគារនិងសេវាអប់រំកែប្រែអន្តរជាតិ

ភ្នំពេញ៖ តបតាមការអញ្ជើញរបស់លោកជំទាវ Shie Yong Lee អគ្គស្នងការពន្ធនាគារសិង្ហបុរី ឯកឧត្តម ឧត្តមអគ្គានុរក្សលេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានចាត់បញ្ជូនឯកឧត្តម ឧត្តមអគ្គានុរក្សថ្នាក់លេខ១ នុត សវនា អគ្គនាយករង នៃអគ្គនាយកដ្ឋានពន្ធនាគារ ដើម្បីទៅចូលរួមកម្មវិធីរត់ម៉ារ៉ាតុង Yellow Ribbon Prison Run លើកទី២០ ចំងាយ ១០គីឡូម៉ែត និងវេទិកាថ្នាក់ដឹកនាំសេវាពន្ធនាគារ (Head of Service Forum) ដែលជាផ្នែកមួយនៃសិក្ខាសាលារយៈពេល៥ថ្ងៃ របស់សមាគមពន្ធនាគារ និងសេវាអប់រំកែប្រែអន្តរជាតិ (International Corrections and Prisons Association) ពីថ្ងៃទី០២ ដល់ថ្ងៃទី០៦ ខែកញ្ញា ឆ្នាំ២០២៤។

កម្មវិធីទាំង០២ ខាងលើក៏មានការអញ្ជើញចូលរួមពីសំណាក់ឯកឧត្តម Lee Hsien Loong អតីតនាយករដ្ឋមន្រ្តីសិង្ហបុរី និងលោកជំទាវ Josephine Teo រដ្ឋមន្រ្តីអភិវឌ្ឍឌីជីថល និងព័ត៌មាន និងជាអនុរដ្ឋមន្រ្តីក្រសួងមហាផ្ទៃ សិង្ហបុរីផងដែរ។

សូមជម្រាបជូនថា កម្មវិធីរត់ម៉ារ៉ាតុង Yellow Ribbon Prison Run ជាកម្មវិធីធ្វើឡើងដើម្បីសុំការគាំទ្រ និងចូលរួមពីសហគមន៍ជាមួយការងារអប់រំកែប្រែ និងស្តារនីតិសម្បទា ស្វែងយល់ពីជីវិតរបស់ទណ្ឌិត ដើម្បីផ្តល់ការគាំទ្រជូនពួកគេក្នុងដំណើរការធ្វើសមាហរណកម្មបន្តិចម្តងៗចូលសង្គមវិញដោយជោគជ័យ។ សម្រាប់កម្មវិធី Yellow Ribbon Prison Run គម្រប់ខួប២០ឆ្នាំ ឆ្នាំ២០២៤ នេះថវិកាដែលរៃអង្គាសបានគឺ ៥៥៧,៣៧០ ដុល្លាសិង្ហបុរី និងមានអ្នកចូលរួមប្រមាណ ១២,០០០នាក់៕