ភ្នំពេញ៖ ជើងទា និងចុងស្លាបមាន់បង្កកប្រមាណជាង៤តោន ត្រូវមន្ត្រីគយ និងរដ្ឋាករតំបន់៥ និងមន្ត្រីពេទ្យសត្វដុតបំផ្លាញចោល ក្រោយធ្វើការបង្ក្រាបបានក្នុងករណី២ផ្សេងគ្នា នៅចំណុចជាយក្រុងសិរីសោភ័ណ ខេត្តបន្ទាយមានជ័យ។
យោងតាមបញ្ជាក់ពីមន្រ្តីជំនាញបានឱ្យដឹងថា ប្រតិបត្តិការនេះ ធ្វើឡើដោយមន្ត្រីគយ និងរដ្ឋាករតំបន់៥ និងមន្ត្រីពេទ្យសត្វ ធ្វើការស្រាវជ្រាវរហូតឈានដល់ការបង្រ្កាបបាននូវ២ករណីផ្សេងគ្នា ពោលគឺ៖ ករណីទី១. កាលពីថ្ងៃទី២៨សីហា ឆ្នាំ២០២៤ នៅចំណុចភូមិសាស្ត្រស្រុកស្វាយចេក មន្ត្រីចម្រុះចុះបង្ក្រាបចាប់បានជើងទាបង្កក់ទម្ងន់ ១៦០០គីឡូក្រាម ដែលឈ្មួញលួចលាក់នាំចូលពីប្រទេសថៃ តាមច្រករបៀងខុសច្បាប់ដែលដឹកបង្កប់តាមរថយន្ត។ ដោយឡែក ករណីទី២. កាលពីថ្ងៃទី២៩សីហា ឆ្នាំ២០២៤ នៅក្បែរច្រកព្រំដែនក្នុងភូមិសាស្ត្រស្រុកស្វាយចេក ខេត្តបន្ទាយមានជ័យ មន្ត្រីចម្រុះបានបង្ក្រាបចាប់បានចុងស្លាបមាន់បង្កកទម្ងន់ ២៤០០គីឡូក្រាម ដែលឈ្មួញលួចនាំចូលតាមច្រករបៀងខុសច្បាប់ដឹកបង្កប់ក្នុងរថយន្ត។
ក្រោយចប់ប្រតិបត្តិការ២ថ្ងៃជាប់ៗគ្នានេះ មន្ត្រីជំនាញបានធ្វើការរឹបអូសវត្ថុតាងសរុបចំនួន៤តោន ជាប្រភេទទំនិញគ្មានច្បាប់អនុញ្ញាត និងដឹកគ្មានលក្ខណៈបច្ចេកទេសត្រឹមត្រូវ ដែលក្រុមឈ្មួញបម្រុងនាំចូលទៅលក់ចែកចាយតាមបណ្តាលរាជធានី-ខេត្តមួយចំនួន និងធ្វើការដុតបំផ្លាញចោលភ្លាមៗតែម្ដង។ ជាមួយគ្នានេះ មហាជនតែងមានចម្ងល់ថា តើទំនិញឆ្លងដែនខុសច្បាប់ទាំងនេះ ដឹកចូលប្រទេសកម្ពុជាបានដោយរបៀបណា បើមន្ត្រីជំនាញសុទ្ធតែដឹងច្បាស់ពីច្រកដឹកចូលអស់ទាំងហើយនោះ? តើមន្ត្រីយាមការពារច្រកព្រំដែនដេកលក់ ឬក៏មានចេតនាបើកដៃឱ្យក្រុមឈ្មួញប្រព្រឹត្តិបទល្មើសជាបន្តបន្ទាប់បែបនេះ? តើអាជ្ញាធរខេត្តមានវិធានការបែបណាលើប្រសិទ្ធភាព តម្លាភាព ចំពោះហេតុការណ៍ខាងលើនេះ ឬក៏ចង់ទុកបណ្តោយឱ្យនៅបន្តបែបនេះតទៅទៀត? ៕
