វេទិកាសម្ព័ន្ធសង្គមស៊ីវិល សហការជាមួយរដ្ឋបាលខេត្តស្ទឹងត្រែង រៀបចំវេទិកាសន្ទនាជាមួយអង្គការសង្គមស៊ីវិល នៅខេត្តស្ទឹងត្រែង

ភ្នំពេញ៖ នៅព្រឹកថ្ងៃទី២៩ ខែ សីហា ឆ្នាំ២០២៤នេះ វេទិកាសម្ព័ន្ធសង្គមស៊ីវិល ដែលដឹកនាំដោយ ឯកឧត្តម កឹមរ័ត្ន វិសិដ្ឋ នាយករងខុទ្ទកាល័យ សម្តេចធិបតី នាយករដ្ឋមន្ត្រី រដ្ឋលេខាធិការ ទីស្តីការគណៈរដ្ឋមន្ត្រី និងជាប្រធានក្រុមប្រឹក្សាភិបាលនៃវេទិកា សម្ព័ន្ធសង្គមស៊ីវិល បានអញ្ជើញជាអធិបតីភាព ក្នុង កម្មវិធីវេទិកាសន្ទនាជាមួយអង្គការសង្គមស៊ីវិលនៅខេត្តស្ទឹងត្រែង ក្រោមប្រធានបទស្តីពី “ការឈ្វេងយល់អំពីតួនាទីអង្គការសង្គមស៊ីវិល ក្នុងក្របខ័ណ្ឌយុទ្ធសាស្ត្របញ្ចកោណដំណាក់កាលទី១”។

ក្នុងកម្មវិធីនោះដែរក៏មានការអញ្ជើញជាគណៈអធិបតី ដោយ លោក យឹម ផែន អភិបាលរងខេត្តស្ទឹងត្រែង តំណាងឱ្យឯកឧត្តម អភិបាលខេត្ត និងមានចូលរួមដោយ អង្គការសង្គមស៊ីវិល និងសមាជិកដៃគូសហការរបស់ វ.ស.ស ជាច្រើននាក់។

មានប្រសាសន៍ស្វាគមន៍ក្នុងពិធី លោក យឹម ផែន អភិបាលរងខេត្តស្ទឹងត្រែងបានគូសបញ្ជាក់ថា ការរៀបចំអង្គវេទិកាដ៏មានសារៈសំខាន់ នេះឡើង ពិតជានឹងបានរួមចំណែកមួយផ្នែកទៀតក្នុងកិច្ចសហប្រតិបត្តិការពីសំណាក់ អង្គការសង្គមស៊ីវិល ដៃគូអភិវឌ្ឍន៍ និងគ្រប់តួអង្គពាក់ព័ន្ធ ដើម្បីរួមគ្នាឆ្ពោះទៅសម្រេច បាននូវក្របខ័ណ្ឌយុទ្ធសាស្ត្របញ្ចកោណដំណាក់កាលទី១” របស់រាជរដ្ឋាភិបាលកម្ពុជា ដើម្បីកំណើន ការងារ សមធម៌ ប្រសិទ្ធភាព និងចីរភាព សំដៅសម្រេចឱ្យបាននូវកម្មវិធី គោលនយោបាយអាទិភាពទាំង៦ ព្រមទាំងគោលដៅកាត់បន្ថយនូវអត្រាភាពក្រីក្រ និង លើកកម្ពស់កម្រិតជីវភាពរបស់ប្រជាពលរដ្ឋ ដែលបានចែងនៅក្នុងផែនការយុទ្ធសាស្ត្រ អភិវឌ្ឍន៍ជាតិ ព្រមទាំងផែនការអភិវឌ្ឍន៍រយៈពេលប្រាំឆ្នាំរដ្ឋបាលខេត្ត ក្នុងការឆ្លើយតប ទៅនឹងរបៀបវារៈការដឹកនាំ គ្រប់គ្រង អភិវឌ្ឍន៍ស្ថាប័នរដ្ឋបាលសាធារណៈ និងសុខដុម នីយកម្មនៃកិច្ចដំណើរការប្រព័ន្ធសេវាសាធារណៈរដ្ឋបាលថ្នាក់ក្រោមជាតិ។

ក្នុងនោះលោក បានបន្ថែមថា អង្គវេទិកាក៏នឹងផ្តល់ឱកាសឱ្យមានការចូលរួមពិភាក្សា សន្ទនាយ៉ាងសកម្ម ពីអ្នកចូលរួម ក្រោមការសម្របសម្រួលរបស់វាគ្មិនសំខាន់ៗ ដែលមានវត្តមាននៅទីនេះ និងស្របទៅ តាមកម្មវិធីនៃអង្គវេទិកាទាំងមូល។

ឯកឧត្តម កឹមរ័ត្ន វិសិដ្ឋ រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមប្រឹក្សាភិបាល វេទិកាសម្ព័ន្ធសង្គមស៊ីវិល បានបញ្ជាក់បន្ថែមថា÷ ជានិច្ចជាកាល រាជរដ្ឋាភិបាលកម្ពុជា ក្រោមការដឹកនាំដោយសម្តេចមហាបវរតិបតី ហ៊ុន ម៉ាណែត នៅតែបន្តយកចិត្តទុកដាក់ និងផ្តល់សារសំខាន់ដល់តួនាទីរបស់អង្គការសង្គមស៊ីវិល ដែលជាដៃគូដ៏សំខាន់ និងវាយតម្លៃខ្ពស់ចំពោះការចូលរួមចំណែករបស់អង្គការសង្គមស៊ីវិលជាមួយរាជរដ្ឋាភិបាល ដើម្បីធ្វើឱ្យសម្រេចបាននូវយុទ្ធសាស្រ្តបញ្ចកោណដំណាក់កាលទី១ និងការអភិវឌ្ឍសេដ្ឋកិច្ចសង្គម ។

ឯកឧត្តម កឹមរ័ត្ន វិសិដ្ឋ មានប្រសាសន៍បន្តថា វេទិកាសន្ទនាដែល វេទិកាសម្ព័ន្ធសង្គមស៊ីវិល រៀបចំធ្វើជាទៀងទាត់រៀងរាល់ឆ្នាំ ដើម្បីស្វែងយល់ពីសុខទុក្ខរបស់អង្គការសង្គមស៊ីវិលនៅថ្នាក់ក្រោមជាតិ ដើម្បីពង្រឹងពង្រីកភាពជាដៃគូសហការជាមួយអង្គការស៊ីវិល។ បន្ថែមពីលើនេះ ឆ្នាំនេះ វ.ស.ស. បានជ្រើសរើសប្រធានបទស្តីពី «ការឈ្វេងយល់ពីតួនាទីអង្គការសង្គមស៊ីវិលក្នុងក្របខ័ណ្ឌយុទ្ធសាស្រ្តបញ្ចកោណដំណាក់កាលទី១» និងផ្សព្វផ្សាយពីអត្ថប្រយោជន៍ជាច្រើន ដែលអង្គការសង្គមស៊ីវិលទទួលបានពីកម្មវិធីបេឡាជាតិសន្តិសុខសង្គម (ប.ស.ស.) ដោយមានការចូលរួមធ្វើបទបង្ហាញពីតំណាង ប.ស.ស. ប្រចាំខេត្តស្ទឹងត្រែង ផងដែរ ។

បន្ថែមពីនោះដែរ ឯកឧត្តមរដ្ឋលេខាធិការទីស្តីការគណៈរដ្ឋមន្ត្រី បានបន្តទៀតថា÷ សម្រាប់អង្គវេទិកាទាំងមូលបានបើកឱ្យមានការពិភាក្សាយ៉ាងផុសផុល និងមានការចូលរួមយ៉ាងសកម្មពីសំណាក់អង្គការសង្គមស៊ីវិល និង បានផ្តល់ឱកាសឱ្យពួកគាត់ទទួលបាននូវពុទ្ធិថ្មីៗ អាចចែករំលែកបទពិសោធន៍ជាមួយគ្នាទៅវិញទៅមក និងផ្លាស់ប្តូរមតិយោបល់ដោយត្រង់ទៅត្រង់មកអំពីបញ្ហាប្រឈម និងសំណូមពរនានា ស្ថិតក្នុងបរិយាកាសស្និទ្ធស្នាល ក្នុងនាមជាគ្រួសារសង្គមស៊ីវិលក្នុងខេត្ត  ដោយគ្មានការរារាំង ព្រមទាំងពេញចិត្តយ៉ាងខ្លាំងជាមួយនឹងអត្ថប្រយោជន៍ ដែលអាចទទួលបានពី ប.ស.ស. ដែលនេះបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលដល់សុខភាព និងសុខុមាលភាពរបស់ប្រជាពលរដ្ឋទូទៅ ជាពិសេសអង្គការសង្គមស៊ីវិល ។

ឆ្លៀតក្នុងឱកាសនោះដែរ  ឯកឧត្តម កឹមរ័ត្ន វិសិដ្ឋ ប្រធានក្រុមប្រឹក្សាភិបាលនៃវេទិកា សម្ព័ន្ធសង្គមស៊ីវិលបានផ្តាំផ្ញើដល់អង្គការសង្គមស៊ីវិលបន្តធ្វើសកម្មភាពរបស់ខ្លួនប្រកបដោយភាពស្មោះត្រង់ ក្នុងកិច្ចសហការជាមួយក្រសួង-ស្ថាប័ន និងអាជ្ញាធរថ្នាក់ក្រោមជាតិ ក្នុងការអនុវត្តសកម្មភាពរបស់ខ្លួន ដោយគោរពតាមគោលការណ៍ច្បាប់ និងលិខិតបទដ្ឋានគតិយុត្តជាធរមាន និងលក្ខន្តិកៈរបស់ខ្លួន ៕