រដ្ឋបាលខេត្តសៀមរាប រៀបចំកិច្ចប្រជុំ ស្ដីពីការចុះស្រាវជ្រាវ ពីប្រសិទ្ធភាពនៃការផ្ដល់សេវាសាធារណៈ ការគ្រប់គ្រងរដ្ឋបាលដែនដី សណ្តាប់ធ្នាប់សាធារណៈ សុវត្ថិភាពសង្គម និងការអភិវឌ្ឍមូលដ្ឋាននៅកម្ពុជា
ភ្នំពេញ៖ នាថ្ងៃទី២៨ ខែសីហា ឆ្នាំ២០២៤ នៅបន្ទប់ប្រជុំលេខ ១ រដ្ឋបាលខេត្តសៀមរាប មានកិច្ចប្រជុំ ស្ដីពីការចុះស្រាវជ្រាវអំពីប្រសិទ្ធភាពនៃការផ្ដល់សេវាសាធារណៈ ការគ្រប់គ្រងរដ្ឋបាលដែនដី សណ្តាប់ធ្នាប់សាធារណៈ សុវត្ថិភាពសង្គម និងការអភិវឌ្ឍមូលដ្ឋាននៅកម្ពុជា ដឹកនាំដោយ ឯកឧត្តមបណ្ឌិត ទូច វិសាលសុខ រដ្ឋលេខាធិការក្រសួងមហាផ្ទៃ និង លោក សុខ ថុល អភិបាលរងខេត្ត តំណាង ឯកឧត្ដម ប្រាក់ សោភ័ណ អភិបាល នៃគណៈអភិបាលខេត្តសៀមរាប និងមានការអញ្ជេីញចូលរួមពី ឯកឧត្ដម លោកជំទាវ អនុរដ្ឋលេខាធិការ លោក លោកស្រី មន្ត្រីពាក់ព័ន្ធ ។
ក្នុងកិច្ចប្រជុំនេះដែរ លោក អភិបាលរងខេត្ត ក៏បានថ្លែងអំណរគុណយ៉ាងជ្រាលជ្រៅដល់ក្រុមការងារគណៈប្រតិភូក្រសួងមហាផ្ទៃ ដែលដឹកនាំដោយ ឯកឧត្ដមបណ្ឌិត ទូច វិសាលសុខ ក្នុងការចុះបំពេញបេសកកម្មនៅខេត្តសៀមរាប និងបានរាយការណ៍ជូនគណៈប្រតិភូអំពីវឌ្ឍនភាពការងារលេីការផ្ដល់សេវាសាធារណៈ ការគ្រប់គ្រងរដ្ឋបាលដែនដី ការអនុវត្តគោលនយោបាយភូមិ ឃុំ សង្កាត់មានសុវត្ថិភាព សណ្តាប់ធ្នាប់សាធារណៈ សុវត្ថិភាពសង្គម ការអនុវត្តគោលនយោបាយវិមជ្ឈការ វិសហមជ្ឈការ និងការអភិវឌ្ឍខេត្ត និងបញ្ហាប្រឈមនានាដែលរដ្ឋបាលខេត្តបាន និងកំពុងជួបប្រទះ ។
ឯកឧត្ដមបណ្ឌិត ប្រធានគណៈប្រតិភូ ក៏មានមតិចូលរួម និងផ្ដល់អនុសាសន៍ល្អៗ ជូនដល់អង្គប្រជុំ និងបានបញ្ជាក់អំពីគោលបំណងនៃការចុះស្រាវជ្រាវនាពេលនេះ ដែលជាគម្រោងទី១ និងជាឆន្ទៈរបស់ ឯកឧត្ដមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដេីម្បីប្រមូលធាតុចូលពីថ្នាក់ក្រោមជាតិ ក្នុងការបង្កើតយន្តការថ្នាក់ជាតិដោះស្រាយឱ្យចំគោលដៅពីបញ្ហាអាទិភាពចម្បងៗ ដែលរដ្ឋបាលថ្នាក់ក្រោមជាតិកំពុងជួបប្រទះ និងត្រូវវិភាគ ផ្ទៀងផ្ទាត់ជាមួយរដ្ឋបាលឃុំ សង្កាត់ ឱ្យបានច្បាស់លាស់ លេីផែនការអភិវឌ្ឍមូលដ្ឋាន អភិវឌ្ឍធនធានមនុស្ស និងរៀបចំបេីកវគ្គបណ្ដុះបណ្ដាលមន្ត្រីឃុំ សង្កាត់ ស្ដីពីការអភិវឌ្ឍសមត្ថភាពលេីការរៀបចំគម្រោងអភិវឌ្ឍឃុំ សង្កាត់ និងឱ្យមន្ត្រីឃុំ សង្កាត់អាចរៀបចំផែនការអភិវឌ្ឍ គម្រោងអភិវឌ្ឍឃុំ សង្កាត់របស់ខ្លួនឱ្យស្របតាមលក្ខណៈភូមិសាស្ត្រ និងប្រជាសាស្ត្រ ៕
